5
U Jiu e markato uaier teka:
nori e hopö kap ner a tsunono pan turu pris i taren bate hale rien a toukui tego kui be menaien e Sunahan bate taguhu ranen.
A tsunono pan turu pris e hala mena nei a man kaan halhala puku na mamana mar kaan haats tere Sunahan tego luba menaien a man markato a man omi turu katuun.
2 Nonei a pris teka ema tagala kap nanei a man markato a man omi,
taraha nonei a katuun tuun,
ba nonei te tuatami na turu katuun ti moa ta niatei na tema kukutieri a maroro tere Sunahan.
3 Nonei ega haats sil a man markato a man omi turu katuun na man markato a man omi has i tanen,
taraha nonei ema tagala has nei.
4 A katuun ema lu menei a nitsunono teka u ngil peisa i tanen.
E möa.
E Sunahan peisa te ngö sile nei a katuun a toukui teka,
temar ngö has menaien e Eron a pris i manasa.
5 Na e kato has uana iesana tere Kristo.
Nonei ema hala sei ii a peisanen tega tsunono pan uaien.
E möa.
E Sunahan noahas te katoe ii e Kristo a tsunono pan turu pris.
Nonei e Sunahan te ranga mei e Kristo me poeiena,
“Alö a Pien Tson i tar.
I romana alö e hatamana mia i tar.”
6 Na nonei e pei hasi tara tana makum turu Buku u Göagono,
“Alö e pris nitöa mou tara mamana pöata
te markato has uu e Melkisedek a pris.”
7 Tara pöata te kaia e Iesu i puta,
nonei e singo hatagala koru u tere Sunahan bate ngala hapan koru mena te singo sil menaneien ta hitaguhu,
taraha e Sunahan e antunan hatongo kap nanen tara tou mate.
Na e Sunahan e hengo haseien,
taraha nonei e hengo koru hasi e Sunahan.
8 E manana,
nonei a Pien tere Sunahan,
kaba nonei e sagoho noahasi u kamits,
na ka teka e hatutseien a markato te hengo haniga menaien e Sunahan.
9 Be Sunahan e katoe neien a pris te niga saluhe koru.
Ba nonei te taguhu rena u katuun hoboto ti hengoeien bate hala raneien a nitöatöa te ka nitöana.
10 E Sunahan e katoe ii e Iesu a Pris a kapan saluhe te markato has uu e Melkisedek a pris.
Ara gima hapolasa bana ii e Sunahan
11 U raranga u parpara tara ka teka e kanoana,
kaba alam e lagi hahatarare namen i tamilimiou,
taraha alimiou e lagi atei koru miou.
12 Alam u solon hatuts raiou limiou antunana alimiou go hihatuts hamanasa iam.
Kaba e möa.
Alimiou e ngil noa hasemiou a tana katuun tega hatuts lel railimiou a man markato turu raranga tere Sunahan ti hatuts tutuun railimiou.
Alimiou e here pouts lel rami u göama te sus noar,
tema antunan noueri a kannou a kihil.
13 U katuun temar kato uar teka ema tatei tara hanigeri a ka te nigana na ka te omina.
14 Kaba u hihatuts pan e ka uana turu katuun ti solon atei sil a markato a matskö,
bate tatei hamoueier a ka te nigana na ka te omina.