E Iesu e pan nena e Mosis
3
A matsi hahatoulana,
e Sunahan e ngö sil railimiou tego katuun uaiam limiou i tanen.
Na limiou go hakats naiam e Iesu.
E Sunahan e hala sile mei e Iesu tegomi aposol uen turu lotu i tarara na tegomi tsunono pan meraien u pris turu lotu i tarara.
2 E Iesu e kukute hanigei e Sunahan te hopö kap naien tara toukui teka,
te markato haniga has menai e Mosis a toukui i tanen i gusuna u katuun tere Sunahan.
3 A katuun te habuti a hun haposa a solonen e pan bala nena u katuun i tanen.
Na e markato has uana iesana,
e Iesu e ka mena a solo te pan bala nena a solo tere Mosis.
4 A mamana hun haposa e ka mena a katuun te habuteien,
kaba e Sunahan te habuti a mamanaka hoboto.
5 E Mosis,
a katunun kui tere Sunahan,
e katoe a toukui a niga i gusuna u katuun hoboto tere Sunahan,
bate hatei nena a manka tega rangein e Sunahan i murimuri.
6 Kaba e Kristo,
a Pien Tson tere Sunahan,
e tara kap haniga rena u katuun tere Sunahan.
Na tegi hamana haniga uu ra i tanen bate hamana silera a manka man niga i tanen,
ara u katuun hamana i tanen.
U katuun tere Sunahan e tatei husar
7-8 U Namnamei u Göagono e poeiena:
“Te hengoe mia limiou u raranga tere Sunahan i romana,
ba limiou tema tatei mar hipus len uami ti mar hipus uu tubumilimiou
bate tori tsuga nariou lia
batena torohane ria lia tara makum a palaka.
9 Aa,
u tubumilimiou i tarei a man toukui pan i tar turu tohats u maloto u hiningal,
kaba nori i torohana noa haseiou lia.
10 Ba nori u katuun teka e kato haraharaha korue riou lia,
ba lia e poeiegu,
‘Nori e roron tori hasoalar.
Ba nori tema kukutieri a maroro i tar.’
11 Na lia u raharaha koru me ranga hamana gia iasa me poeiegu,
‘Nori ema antunan la koru uari tara hanin husa i tar.’ ”
12 A matsi hahatoulana,
haneiam.
Möa tu ka meiam u tori u omi te hahamanana bate laba namiou e Sunahan te töatöa nitöana.
13 Alimiou go hihitaguhi iam turu mamana u lan antunana te ka noa uana a pöata.
Taraha,
a markato a omi ena mots gamo ranou limiou bate kato hahihipus ranou limiou.
14 Tegi hamana hatagala nitöa uu ra tere Sunahan ti mar hamana mam uu ra,
ara e ka uara tere Kristo.
15 Na lia e hatei hahuol ragi limiou a ka te ranga nena u Buku u Göagono:
“I romana,
te hengoe moua limiou u raranga tere Sunahan,
alimiou ema tatei mar hipus len uamoi timar hipus uu tubumilimiou
bate tori tsuga nariou lia.”
16 Eresi nori u katuun ti hengo u raranga tere Sunahan bate tori tsuga naren?
U katuun te peigi rema e Mosis tara han i Itsip.
17 Na eresi u katuun ti raharahi e Sunahan turu tohats u maloto u hiningal?
Nonei e raharaher u katuun ti kato homi bate mater,
bate laba rarien tara makum a palaka.
18 E Sunahan e rangein eresi tara pöata te ranga hamana uaien iasa bate poeiena,
“Nori ema antunan la koru uari tara hanin husa i tar”?
Nonei e rangein u katuun ti hipus naien.
19 Na ra e atei sil talera nori ima la mei tara hanin husa i tanen,
taraha nori i hahamanein e Sunahan.