A kapakapana a pöata
3
Alö go atei haniga,
tara kapakapana a pöata a nomi pan e butu nou.
2 U katuun e ngil korue riou romana a peisaren na e ngil koru hase riou a moni.
Nori e ranga sesei nariou a peisaren bate poeier,
“Alia a katuun pan.”
Na nori e ranga hohomi rariou u katuun na e Sunahan has,
bate hipus rariou u tsinaren na u tamaren.
Nori ema niga sile roi a manka te ka meren,
na nori e rama nariou a markato a niga.
3 U katuun ema ngil has raroui u katuun na ema taatagi has raroien.
Nori e gamo nariou a tana katuun ba nori tema antunan pile kap naroi u ngilngil u omi i taren.
Nori e kato hohomi pinopino rariou u katuun,
na nori e omi hase riou a markato a niga.
4 Nori e hala rariou u katuun u niga turu pakö i taren.
Nori e kato homi pinopino riou batema hakats haniga naroi a markato i taren.
Na nori e haka sei korueriou a peisaren.
Nori e ngil korue riou a markatona i puta batema ngileri e Sunahan.
5 U katuun e kukutie riou a man markato pinopino turu lotu,
bate holis naier tega ka menai u lotu ta nitagala.
Alö go hatalis bar u mar katuun teka.
6 A palai ena hohou kapiena rariou a man munmun tahol bate angöngoso mera roi a touhaliou u tutu u hihatuts u omi i taren.
A touhaliou teka e saputu koru mer a man markato a man omi bate kukutier u mamana u ngilngil u omi i taren.
7 U mar touhaliou teka e saken töa naier ta niatei,
kaba nori ema antunan atei sileri a ka te manana.
8 Ti markato uu ere Janis mere Jambris,
nori ima hengoei e Mosis.
U mar katuun teka u hakats i taren e omi hakapa,
nori ema hamana lel ri.
9 Kaba nori ema kato nitöa uaroi teka,
taraha,
ema pina noi ba u katuun te atei sile riou te tutu uaren,
ti kato has uu ere Janis mere Jambris.
U tana u hihatuts lel
10 Kaba lö o Timoti,
u kukutiema u hihatuts i tar,
na markato i tar,
na ka te kato sile gulia.
Alö e atei silem temar hamana uagu lia tere Sunahan na te ngil meragi lia u katuun na te tuol hatagala uagu lia bate tuatami mera gen.
11 Na te omi menari lia u katuun na ti söata mena mei lia u nikamits u parpara tara man taun i Antiok na i Aikoniam na i Listra.
Alia u söati a man nikamits teka ba Tsunono e luba nanei lia a man niomi teka.
12 Na lia e hatei goulö,
u katuun e kato homi puku rariou u katuun te pala uaier tere Iesu Kristo.
13 U katuun u omi na u katuun u gamogamo e omi koru riou bate omi susul lasir.
Na nori e gamo rariou a palai,
ba nori tena gamo lel has riou.
14 Kaba o Timoti,
alö go pile hakarapotein u raranga u mana ti hatutse ii lö.
Alö e atei silem e si te hatutseiou lö.
15 Tu tetenei noaia lö,
alö i hatutse ii u Buku u Göagono te antunan hale noi lö a niatei temar lu pouts mera nei e Sunahan u katuun,
te hamana uaren tere Iesu Kristo.
16 E Sunahan e hakolotein u raranga hoboto turu Buku u Göagono.
U raranga teka e ka mena a toukui a niga tegi hihatuts menai u raranga u mana,
na tegi hapiou menai a ka te omina,
na tegi hamatskö meraira,
na tegi haröto meraira ime te markato haniga uarara i matana e Sunahan.
17 Be Sunahan te hala ranoira a niatei te antunan kui haniga koru meroi a mamana toukui a niga.