2 Hanei sil raiam u katuun u omi te kato homieier u tuenrei,

na te kato here rari u muki,

bate poeier alimiou go hapöiam.

3 A markatona i puta na markato te hapö uaier ema kato raneira u katuun tere Sunahan.

E möa.

Ara u katuun hamana tere Sunahan,

taraha ara e hatsunonera e Sunahan i torirara bate sasaala mera e Iesu Kristo.

4 Alia sane go ngil,

ba lia te tatei haröto negu a mamana markatona i tar i puta te roron ranga ner u katuun tego taguhe ioulia.

E noahasina tara saha mar katuun te poeiena nonei e ka mena a mamana markatona i puta te tatei taguhe nen,

alia e antunan kato salsaluhe gen tara manka teka.

5 Hena,

turu hatöalina u lan ti poseia lia,

ba lia e pöe riou.

Alia u töa u rahatsing turu katunura i Israel,

a toun Hibru hamana,

taraha alia u tuhanaia tara hun katuun tere Bentsamen.

Na lia has a töa Parasi i manasa,

na lia u tagala sil korui a Lo turu Jiu.

6 Alia u tagala sil korui u lotu turu Jiu bate kato hakamits regu a pal katuun tere Iesu.

Na tara Lo turu Jiu,

alia a katuun a matskö koru i manasa.

7 I manasa alia u ron ranga bate poeiegu a manka teka te roron taguheiou lia.

Kaba i romana alia e poeiegu a manka teka a manka pinopino,

taraha alia e hamana tala gia tere Kristo te niga bala nena a manka teka.

8 A manka hoboto te butuia i tar e here tala nei a manka pinopino te hakats menagi lia e Iesu Kristo a Tsunono i tar.

Alia e atei sil talegu e Iesu,

na nonei te niga bala nena a mamanaka hoboto.

Alia e ngil korue gen bate ngöe gi a mamanaka ti ngil korui lia i manasa a bita pinopino.

Ba lia te pile kap hakarapoto nagou e Kristo.

9 Alia e ngilegu a peisar ega ka nitöa uu tere Kristo tara mamana nikaka tar i puta.

Alia ema tatei pei lenegi alia a katuun a matskö te kukute mena gilia a Lo turu Jiu.

E möa.

Alia e tatei poeiegu e Sunahan te kato hamatsköe ialia i matanen,

taraha alia e hamana uagu tere Kristo.

10 Alia e ngilin atei haniga sil korueiegu e Kristo.

Na lia e ngilin atei sil hasegu a nitagala te hatakei ien tara tou mate.

Alia e ngilin sagohegu a kamits te sagoheien,

ba lia tena here noahase goien tara pöatan mate i tanen.

11 Na lia e ngilin takei pouts hasigu romana tara tou mate i tar bate töatöa poutsugu.

12 Alia ema peigi alia u kato hakapi a manka teka bate niga nitöagu.

E möa.

Alia e torohana noahasegu tego here menai lia a mar katuun te hopö kap sil mei lia e Iesu Kristo.

13 A matsi hahatoulana,

alia ema peigi alia u lu hakapi a markato teka.

Kaba alia e ron hakats negu,

alia e ngilin solopala negu a manka ni manasa bate kato hatagala silegu a manka tena butu hamurimuri nama romana.

14 Alia e heregi a katuun te pipiatana turu resis tegona lu menaien ta hihol.

Na hihol i tar,

e Sunahan e ngö sila nanoua lia tere Iesu Kristo ba lia te la uagou i tanen iasa.

15 Ara hoboto te atei haniga silera a Tsunono ega kamei u mar hakats u niga.

Na te hakats halhal ria a palai i tamilimiou,

ba e Sunahan te hamatsköe nou u hakhakats i tamilimiou.

16 Na ragi pile hakarapotein a markato a niga ti lu hakapa mamira.

17 A matsi hahatoulana,

alimiou go kukute hoboto nitöa neiam a markato i tar.

Alam u haröto hakapa raiou limiou ime tego markato uaiam limiou,

ba limiou te tara kap has ramiou u katuun te markato uaier te markato has uemu lam.

18 Alia u solon hatei railimiou a ka teka tara mamana pöata,

na lia e sulunmata koru megu te ranga lel mena gien lia:

u katuun u parpara koru tema hanigeri u hihatutsina te mate uu e Kristo tara kuruse.

19 Nori e ka ria tara marorona tegi tia uaien,

taraha nori e hakats sil talaser a tou nou,

bate sasaala mer te haniga menarien a man markatona tara nimatsingolo,

bate hakats puku lasner a mankana i puta.

20 Kaba a han i tarara e kana i Kolö,

na ra e hahalosera a Tsunono i tarara e Iesu Kristo tega koul men i Kolö batemi lu pouts ranoura.

21 Nonei e hapalisena romana u tuenrei i tarara bate kato here naneien u tuenrei i tanen te niga nitöana.

Nonei e katoenou a ka teka tara nitagala noahas temar tsunono pan mena neien a mamanaka.