3 Ara u katuun tere Kristo aragi solosei e Sunahan,

e Tamana e Iesu Kristo a Tsunono i tarara.

E Sunahan e hala ranei ra a mamanaka a nigana i Kolö,

a mamanaka turu Namnamei,

na u bulungana teka e kato hasasaala koru ranoura.

4 I mamuma te habuteia e Sunahan u kolö na u puta,

nonei e hopö kap sil raira tegi katuun uu ra i tanen,

te hamana uarara tere Kristo.

Nonei e ngilena tegi katuun uu ra i tanen batema ka merei ta markato ta omi i matanen.

5 E Sunahan e taatagi koru raioura,

na nonei e hopö kap mam raioura tego hahahu sila meraien ra tere Iesu Kristo.

Nonei a ka te ngileien te tara hanigana i matanen.

6 Na ragi solosei e Sunahan te taatagi meraien ra te pala uarara tara Pien Tson i tanen e Iesu Kristo.

7-8 Pöata te mateia e Kristo,

bu rahatsing i tanen e sakahis ranoura be Sunahan e luba nena a man markato a man omi i tarara.

A nitaatagi i tanen e pan koru,

ba nonei e hitaguhu haniga koruna i tarara.

9 E Sunahan e atei soköna,

na nonei e haröto raira a ka te mous i manasa,

a ka te ngilin kato meien e Kristo.

10 E markato uana teka:

pöata te butu nama romana a pöata te hopö kap mamin e Sunahan,

be Sunahan te gone nou a mamanaka hobotona i kolö na i puta bate hapane nou e Kristo bate tsunono ranou uen.

11 A mamanaka hoboto te butuna e tahongona tara manka man kapan te ngilena e Sunahan.

E Sunahan e hopö kap sil raira i manasa tegi katuun uu ra i tanen bate ka hoboto gono mera e Kristo,

taraha nonei a ka te ngilin katoeien.

12 Alam u katuun tu hamana tutuun uu tere Kristo,

alam go haniga uu tere Sunahan te pan saluhena bate soloseie men.

13 Na limiou has,

e Sunahan e hopö kap merai limiou u Namnamei u Göagono te ranga hamana naien.

Nonei e hopö kap sil railimiou tego katuun uaiam limiou tere Kristo.

Taraha,

alimiou u hengoeiam u raranga u mana na u Bulungana u Niga te poeiena e Sunahan e ngilin lu pouts mera nei limiou i tanen,

ba limiou te hamana uamiou tere Kristo.

14 U Namnamei tere Sunahan te kana i tarara e here nei u raranga u tagala hamana te haröto raneira e Sunahan,

e hala ranoui ra a ka te ranga hamana naien turu katuun i tanen.

Ne haröto has nena e Sunahan e sakahis pouts nitöa ranoura te katuun hoboto uarara i tanen.

Bara te haniga uara tere Sunahan te pan saluhena bate soloseie ren.

15-16 Nonei te haniga hiton sil bera gilia alimiou tere Sunahan.

Pöata ti hengo naia lia temar hamana uami limiou tere Iesu a Tsunono,

na temar ngil koru mera milimiou u katuun hoboto tere Sunahan,

alia ima mala solopala railimiou tara man singo i tar na ti haniga sil merai lia alimiou tere Sunahan.

17 Alia e singosingo uagu tere Sunahan e Tamana e Iesu Kristo a Tsunono i tarara,

e Tamanen te ka mena a nitsunono pan.

Alia e singo silegu tego hala meraien limiou ta niatei na tego haröto menaien a peisanen i tamilimiou,

ba limiou te atei sile mou e Sunahan.

18 Alia e singo silegu e Sunahan ega kalati a baku milimiou ba limiou te atei sile mou a ka te ngö sil meraien limiou tego hamana sileiam limiou,

ba limiou te atei sil hase mou temar niga koru uana a manka te ranga hamana naien turu katuun i tanen.

19-20 Na lia e singo sil hasegu tego atei sil mena milimiou temar pan saluhe koru uana a nitagala i tanen te kuina iaharara u katuun te hamanara.

Nonei a töa noa lahas a nitagala pan te hatakei mei e Sunahan e Kristo tara tou mate bate hagume nen tara pal matou i tanen i Kolö.

21 E Kristo e tsunono na tara makum teka bate pan saluhe nena a mamana mar tsunono na mamana mar nitagala.

Na nonei e pan saluhe has nena a mamanaka hoboto te ka mena a solo pan,

tara han i puta i romana na tara hanina i murimuri.

22 E Sunahan e hakeia a mamanaka hoboto i limana e Kristo,

bate katoe neien a tsunono pan turu katuun hoboto i tanen,

u katuun te hamana uar i tanen.

23 U katuun tere Kristo e hereri a tuenrei nen na nonei e here nei u baku.

Nori e ha onote ren,

na nonei has e ha onoto hasena a mamanaka tara mamana makum.