A man munmun tahol na galapien i taren
6
A galapien,
alimiou go hengo haniga raiam u tamamilimiou na u tsinamilimiou,
taraha a ka teka e nigana i matana a Tsunono.
2-3 U Buku u Göagono e poeiena,
alö go solosei hapani e tamamölö na e tsinamölö ba lö tena ka haniga mou batena töatöa halehana moa i puta.
Nonei a lo tutuun turu Maloto u Raranga tere Sunahan te hatei nena a ka a niga tega hale ii e Sunahan a katuun te hengoe nen.
4 Na limiou u tamar a galapien,
alimiou goma ranga sisi nitöa mia tara galapien i tamilimiou bate kato haraharaha ramen.
E möa.
Kaba alimiou go hatuts ramien u raranga tara Tsunono.
U katunun kui na u tson mammam i taren
5 U katunun kui,
alimiou go hengo raiam u tson mammam i tamilimiou.
Alimiou go hapan ramen bate torohana hatagala silemiou tego kato hasasaala mera mien.
Na limiou go kui hanigaiam bate kui heremi u katunun kui tere Kristo.
6 Alimiou goma tatei kui sil tuun nemi a toukui teka tegi haniga merai limiou u katuun te pepeito kap rariou limiou.
E möa.
Kaba limiou go kui memien u tori u niga bate kukutie miou u ngilngil tere Sunahan.
7 Alimiou go sasaala meiam a toukui i tamilimiou,
taraha alimiou ema kui bemi a katuun tuun.
E möa.
Alimiou e kuibe hase miou a Tsunono.
8 Ba Tsunono te hala nanou a hihol a niga turu katuun hoboto te kuir,
na katuun te kui peisa mena u ngil i tanen na tara katuun has te hakuie ier.
9 Na limiou u tson mammam,
alimiou go markato has uaiam iesana turu katunun kui i tamilimiou,
ba limiou tema ranga hamatmatout ramien.
Alimiou na u katunun kui i tamilimiou e ka memiou a töa puku a Katuun Pan i tamilimiou i Kolö,
na nonei e ngil hahihinatoe hoboto rena u katuun.
A man kaan hiatatung hoboto tere Sunahan
10 Alia e mar hakapa menagi u raranga i tar teka.
Alimiou go tagala mia tara Tsunono na tara nitagala pan i tanen.
11 Alimiou go hamatsköe iam a peisa milimiou bate tuol hakarapoto namou a man gamo tere Satan,
bate heremi u soldia te hahaloser a hiatatung.
12 Taraha,
ara ema hiatatung merei u katuun tuun.
E möa.
Ara e hiatatung mera u liliahanei u omi na i kolö na a pal kapan i taren.
Ara e hiatatung mera a nitsunono i taren na u liliahanei u omi te tara kap ner a han i puta te ka noana turu kuhil.
13 Te markato uanen teka ba limiou te hake miou a man kaan hiatatung hoboto tere Sunahan ba limiou te tatei tuol hakarapoto mia tara pöata a omi bate tuol noa has mou tara pöata te kapana a hiatatung.
14-17 A katuun te hiatatung silena e Sunahan e kato uana tara soldia te hamatsköena a man kaan hiatatung i tanen.
Nonei e hapouseiena a lete na e hasogeiena a kaan hatukap turu lumluma na e hasogeiena u sendol na e pile nena a kaan hatukap na e hakopeiena u hatan hiatatung na e pile nena u kilatan hiatatung.
Te markato tala uanen teka ba limiou te katoemiou u ranga te manana bate katoemiou a markato a matskö bate polasemiou u Bulungana u Niga tara masalohana.
Na limiou go pile hakarapoto has naiam u nihamana bate lu hasemiou a nihitaguhu tere Sunahan,
be Satan tema antunan kato homi ranoui limiou.
Ba limiou te hake mia u raranga tere Sunahan i torimilimiou.
U Namnamei tere Sunahan e kato homieiena a toukui tere Satan.
18 Alimiou go singo nitöa mia tara nitagala turu Namnamei tara mamana pöata te singo mia limiou tere Sunahan,
ba limiou te katoemiou u mamana u mar singo.
Na katuun te singona egoma tatei hanöa bana ii te singo uanen,
ba nonei te singo sil has raiena u katuun hoboto tere Sunahan.
19 Na limiou go singo be hase moulia,
ba tara pöata te katsin ranga goua lia be Sunahan te hale noui lia u raranga,
ba lia tema matout goui tego habulungana menai lia u Bulungana u Niga te mous i manasa.
20 Nonei a ka teka te ka sile gia lia tara karabus,
ti habulungana menai lia u Bulungana u Niga.
Na limiou go singo sile moulia balia tema tatei matout gi tego habulungana menai lia u Bulungana u Niga.
E Pol e hakapena u pas i tanen
21 E Tikikus nonei a hahatoulana koru i tarara tara hun katuun te hamana ria tere Iesu,
na nonei a katunun kui a niga koru tara Tsunono.
Nonei ena hatei ranoui limiou ime te marka uagu lia.
22 Nonei koru a ka te hala sile gouien lia i tamilimiou,
tegona hatei meraien limiou ime te marka uamu lam na tegona hatagala has menaien a torimilimiou.
23 E Sunahan e Tamarara na e Iesu Kristo a Tsunono e tatei hala nariou a masalohana na u ngilngil hamana i tamilimiou hoboto te hamana mia tere Iesu,
bate taguhu has rariou limiou tego hamana haniga uaiam limiou.
24 E Sunahan e tatei taatagi rena u katuun hoboto,
ba u ngilngil i taren tere Iesu Kristo a Tsunono i tarara tema antunan kapa nei.
Nonei talasi.
Alia e Pol