A tolo i Malta
28
Pöata tu sung hakapaia lam,
ba lam e töan atei silem a tolo teka i ngöei i Malta.
2 U katunur tara tolo teka i kapiena haniga koru raiou lam.
A langits e polo tania ba ka e hamuri koruna,
ba nori e hatseier u tula me ngö rariou lam.
3 Ba e Pol ena soro hobotenama a kopa ruei,
ba pöata temi hopöeien a rue turu tula ba töa kökötsi a omi e bus lakasa nenama u hiski memi kotena a limanen.
4 Pöata ti tareia u katunura tara tolo teka a kökötsi e kuteia i limana e Pol,
ba nori e hiararangar me poeier,
“A katuun banei teka a hihipuli romana.
Nonei e katosabe nama i tasi,
kaba a got na tara hipou e hapiou nena tega töatöa uaien.”
5 Be Pol e tsibil ba nena a kökötsi me rus uana turu tula,
kaba e Pol ema lu homi ii.
6 Ba nori e pepeito kap ner tego puku uu a limanen tsi tego singotei rus uaien bate matena.
Nori i solon hahaloso kaba nori ima tarei ta ka ta omi ega butuia i tanen,
ba nori e paliser u hakats i taren me poeier,
“Nonei a töa got.”
7 E Publius,
a tsunono tara tolo teka,
e ka mei a makumun tsiktsiki te sukusukuia tara makum teka.
Nonei e las raioulam ba lam e ka gono memen turu topisa u lan.
8 Tara pöata teka e tamana e Publius e opö mei a peisanen e lolanga mei a siki na e ka has mei u purus.
Be Pol ena tare nen me singo uana tere Sunahan.
Ba nonei e hatakopena a limanen i tanen me kato haniga poutse nen.
9 Pöata te kato uaien teka ba u katuun hoboto tara tolo teka ti ka mei a siki e la uarima i tanen banonei emi kato haniga pouts has ranen.
10 Ba nori e hala rari lam a manka a man parpara.
A töa tolaalana i Aleksenria e hahalosoia tara tolo teka tega kapa uu tasi pan.
Ba i murina tu ka hakapaia lam tara tolo a topisa a tsihou,
ba lam e katsin la lel talam,
ba nori e hoseier a mamanaka hoboto tu ngili lam,
tara tolaala.
E Pol e tukuia i Rom
11 Ba lam e osa mia tara tolaalana i Aleksenria me lam,
a solonen u Mun Toulana u Puna e ohoia tara tolo ti kaia lam.
12 Ba lam ena hasung mia i Sirakus me keiem u topisa u lan.
13 Ba lam e laba nem a taun teka be sila mia i rehina kotolana mena sung mia tara taun i Ritsiam.
Ba turu hamahö ba belbelahaa e takei nama,
ba turu hahuoluna u lan ba lam ena tuku mia i Puteoli.
14 Ba tara taun teka ba lam e saberaiam u katuun ti hamanaia tere Iesu.
Ba nori e ngö rariou lam ba lam ena ka gono meramen u tohit u lan.
Ba lam e töan la uaiem i Rom.
15 U katuun ti hamanaia tere Iesu i Rom i hengoin tu la uama lam,
ba palai e taatago mera rimei lam tara taun te kaia i gusuna kalana a solonen a Hanin Töana i Apias.
Na palai i taatago mera mei lam tara taun ti ngöei a Topisa Taven.
Pöata te tara raien e Pol ba nonei e haniga uana tere Sunahan ba peisanen e tagala poutsuna.
A taun i Rom
16 Pöata tina tukuia lam i Rom ba tsunono turu soldia e haniga nena tego ka pepeisa uu e Pol na töa puku a soldia,
tega taratara kap naien.
17 U topisa u lan e la hakapa be Pol e ngö gögono rena a pal kapan turu Jiu.
Pöata ti gono hoboto men ba nonei e poeiena i taren,
“A matsi hahatoulana i tar,
alia uma katoei ta töa ta ka tego tula puta menai lia u katuun i tarara na u mar hihatutsina turu tuburara.
Kaba nori i karabuse ma lia i Jerusalem,
ba nori e hala mena rilia turu katunura i Rom.
18 Pöata ti rangrangatei lia ba nori e katsin hapurese riou lia,
taraha nori ima sabie mei ta töa ta ka tegi atung hamate sile ien lia.
19 Kaba pöata tima haniga ia u Jiu,
alia u möa lel ta maroro ba lia e töa kato silegu tego la peisa uu lia turu kout tere Sisa.
Kaba alia ima ka mei ta ka tego kout gono sil merai lia a hun katuun i tar.
20 Nonei a ka teka te ngö gögono sil mera gi lia alimiou bate ngilin ranga gono mera goulimiou.
Taraha,
nonei a nihamana te kame gulia tara katuun te hahaloser u katunura i Israel te kits sile gia lia tara tsien teka.”
21 Ba nori e poeier i tanen,
“Alam uma luei tu pas i Judia tega ranga sile ioulö.
Na man hahikapien i tamulam ima söata hase mei tu rangana i Judia tega markato uu teka,
na e möa has ta katuun tega ranga homi sileiou lö.
22 Kaba alam e ngilem alö peisa tego hatei rameilam a ka te hamana mia lö.
Taraha,
alam e atei silem u katuun tara han hoboto ema ngileri u lotu teka.”
23 Ba nori e hakeier u lan tegi gono hoboto meien e Pol,
ba u katuun u parpara e la uarima tara makum te kaia e Pol.
Tara bongbong mena antunena a lahibong nonei e ranga hatararein a Nipepeito tere Sunahan.
Nonei e kato sil tega antunan palis meien u hakats i taren tere Iesu,
bate hatei raneien u raranga te kana tara Lo tere Mosis na u raranga turu propet.
24 A palai i hamani a ka te ranga naien,
kaba a palai i hahamana naien.
25 Ba nori ema hiahanhaniga ri,
ba pöata ti katsin taruraien be Pol e hala lel raneien ien u tana u raranga.
Ba nonei e poeiena,
“U Namnamei u Göagono tere Sunahan e ranga hamana i manasa tara pöata te harangeien e Aisaia a propet tere Sunahan me ranga gono mena u tubumilimiou.
26 Nonei e pei tere Aisaia:
‘Alö gona hateir u katuun teka bate poeiem,
Alimiou e hahengo mou bate hengo tuun las mou,
kaba limiou ema atei sile moi ta töa ta ka.
Alimiou e tara mou bate tara tuun las mou,
kaba alimiou ema tara hamana koru moi.
27 Taraha,
u katuun teka a tui i taren e bout hakapa,
na talingaren ema hengo haniga nei
na nori i hasoho hakapa hasi a mataren.
Nori e namots tara naier a mataren,
na e namots hengo naier a talinga ren,
ba tui taren te ateina.
Nori e raman habirits pouts uaier i tar balia te kato haniga pouts ragen.’
“E Sunahan temar ranga uu teka.”
28-29 Be Pol e pei hasena,
“Na lia e hatei ragoui limiou,
a nihitaguhu teka tere Sunahan e la tala uana turu katuun tema Jiu ri,
nori tena hengo riou.”
Pöata te ranga hakapa ia e Pol ba u Jiu e tarurar me hiangenngenar.