Abuku sekuk deiyoknye bira, Lukas ulamuk. Lukas arye, buku Rasul babye, sekamuk. Lukas ara, Yesus arye webuka deiamuk mapu, sik obarye (12) nang kan-kan ton kum ulamuk bukni, el ap, Paulus ap, neika pil dolamrik. (Pilemon 1:24; Kolose 4:14). Lukas ara, ninye kwetenanye ulamuk. Tonda, Lukas Yahudi yala kumnye, Yunaninye ulamuk. El ka Teofilus ap, yuk dib tenyamik ninye ap ati, asurat sekuka dopkwetebuk. Deiyok ara, Yunani ninye babye, diba tenebikcopura, Allah arye el mapu kipdeipnamle. Ayupu ara, ‘Dib tenepnamak’ tenen, asurat sekuk.

Lukas arye, ‘Yesus ulamuk ning nirya moubuka kel biknamak’ tenen, pia teleb kibuka, lilibuka sekuke. Buku Lukas noutamak, aning ara ‘Weik mambule’ tenen, sekuk ning ara, ninye lyena ning ap, Allah El Dib Kanye ap, talye kankan ninye ap, kilapu ap, Allah morona ap ati yupu weik sekuk. Mitikanun walwal unyabbuk, Injil buku sekeipsik talak ati ara, ninye weika arye tabakuka dib tenenyabe. Markus minop sekukura, aminyan ara, Matius arye el buku sekuk. Asirya ara, Lukas arye abuku sekeipsuke.