2 Allah Yahweh arye, el mapu Israel ninye nirya ati nyabuk,

“Narye anggun nirya ati, bico tenesunune. Bukni, anggun Israel ninye arye tamubuka, Allah nati nyanululume. ‘Kume, Allah Yahweh anda nunti yata ning winisiminya deice arye bico tenebuka melisilyam do?’ nyabuka asinululume. Bukni, na Allah Yahweh arye tamubuka nyapsine. Ara, Esau elda Yakub el weit koproba ulamuk do? Narye Yakub elti, weik arye se bicoe tenelamsirye, weika arye melilamse do, kum do? Kume, weika arye melilamse.

3 Diba, Yakub biti bico tenelamse bukni, el du koproba Esau biti ara, yu kanye bolamsirye, ‘Anye bira na like,’ tenelamse. Ayu ulamnuka deice arye, Esau el ulamuk mutuku nirya ara, amutuku deice dakuka akunum malye kibuka batakse. Winibuka batakse ning ara, narye el ulamuk mutuku tuku nirya ara, dobuka talye bai tam, kam ulamle ning, bai kam atonun ning ati, pata mutuku ulamikak uk arepsiba, malyeuk winilamuka ati, ninye arye el mutuku noutamak teleb kibuka kum unyake,” Allah arye nyabuk.

4 Nyabukce, ayupu ton nyabuk. Winilamsibuk, Esau el tam nang Edom mutuku unyak ninye arye, “Kume, nun ulamupu asik mutuku ara, dakuka uluplopsik bukni, nun babye tuba tamubuka lipsisikuka dopnamapca,” nyabuka yupu talinyake. Nyabuka yupu talinyaka ati ara, sik aninye arye, tamubuka dobica babye, na Allah Yahweh arye aning-aning nirya talibuka, im deice yin talin malaikat sik, weik deiyoknye^b ununa anya arye, narye ila tamubuka, sik mutuku asik dopnamaka nirya ara, dakuka uluplonamne. Winipniba, yuk mutuku ninye nirya arye aning eibikirye, sik Edom yala nang ulamik mutuku ati ara, ‘Se, amutuku ara, malye winin ning deiyok talibuka, ulamik mutuku,’ nyanamake. Tonda, Edom ninye ati ara, ‘Se, Allah Yahweh arye sik Edom mutuku ulamik ninye ati, pia yu ulule,’ nyanamake.

5 Aning nirya winipniba, anggun Israel ninye nirya, anggun bidamnye asing arye ipmunce, nyapnamlume, “Se, dipkoprop, Allah Yahweh elda mikip weik arye Israel ninye unyap mutuku ap, yuk pera mutuku noutamak nirya ap, weik mambul pil dolule. Nun kum unyap mutuku noutamak babye, elce talibuka, mambul piluk dolule,” nyabuka nyanamlume.

6 Na Allah Yahweh, aning-aning nirya talibuka, im deice yin talin malaikat sik weik deiyoknye unune. Narye, na si eren aik pum tam, pil dona deiyok nang, anggun imam-imam nang ati nyapsine.

Anggun teneipdelulume. Anggun kele, yata ninye do, sik mapu arye, sik ni yapu ati kanye delinyake. Atonun, weik nang amu tam unyakce, aik pum tam talye pil donyak ninye ara, sik deiyok nang ati kanye delinyake. Nara, anggun ni koproba Allah Yahweh unune. Tonda anggun weik deiyoknye unune. Ati ara, yata ning ati, anggunce nati, si kum erenululum do? Nara, weik mambulnye unun bukni, anggunce nati, ilil kum usulul do? Dipkoprop anggunce na ap, na si ap ati, malye nyanululume. Bukni, aning nyapsiniba, angguncuk tamubuka nyalulume, “Nunda yata ning wininyaba deice arye, an si ati malye nyanyap do?” nyabuka asipdenulume.

7 Narye nyapsine. “Anggunce na si eren ati, kam un ning opmunce, aning bobuka, na arena ati, na si eren aik dam keil yangapdeiplumak, adeice uku dalulum bukni, yata deiyok ati, kam un ning malye ninguk bobuka, na dam boyangamunce, nati arenululum do? Winimunya deice arye, na si ati malye nyanumunce, yaninululume. Bukni, anggunce nati, asinululume. “Ara yata wininyaba deice arye, ‘Allah elda mambulnye kume,’ tenebuka an si ati yanikinyap do?” nyabuka asinululume. Narye tamubuka nyapsine.

Kume, ara minop talak arye, narye anggunti, ‘Kam un ning pia teleb ninguk arenamnululume,’ nyapdeiamsise bukni, anggunce kam un ning, nong malye ninguk bobuka, na si eren ati kintinip deibik sukumuk boyanganululume. Winimunya deice arye, na si yaninumunce, ‘E, Allah el ap, el arena ati keil lelepdeibupu sukum ap ara, mambul kume,’ tenemunce, malye ululume, nyapsine.” Allah arye nyabuk.

8 Minop talak ara, ‘Kam un ning nong pia bol teleb ninguk obuka, na arelyanganamnululume,’ nyapdeiamsise bukni, anggunce aning batakuka, na arena ati, bobuka delilyanganululum kam un ning ara, nong bol malye ninguk delilyanganululume. Ara, asing kuamlye ning ap, isin talin ning ap, yok bulakamlye ning ap, bobuka arelyanganululum ning ara, teleb ning arenululum do? Kume, malye ninguk arenululuma ati ara, pia malye ululume.

Anyapmasin ning atonun, uk bobuka, anggun deiyoknye Gubenur dam bobuka bitumce, areptum bukni, elce, ‘E, teleb ning boyanmaniaka ati, dipkoprob si erenmaniyake’ tenen, kanye deibuka, telebe nyapsutu do? Kume, aning ara, kum winipmantoe. Na Allah Yahweh,^c aning-aning nirya talibuka, im deice yin talin malaikat, sik weik deiyoknye unirye, nyapsine.

9 Aning bobuka, yangamunye ning ara, anggunce na arena deiyok nang, imam-imam nang ati, ‘Wini talak ara nun malye wininyap ning lyena ati, boyanmap ning deice arye, Allah moropsumunba, nun malye wininyap ning kilibuka lyepsilirye, namin kipnamsil,’ nyabuka, weik yupu arye nyaptumba, na Allah ati moropnitinga babye, na Allah arye kekebuka kum lyepropnamsine. Anggunce malye ninguk bobuka, na dam boyanganululumce, arenululuma ati ara, yata deiyok ati kanye deipsitinye do? Kume, anggunce malyeuk ululuma anya arye, kanye kum deipnamsine.

10 Ati ara, na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine. Teleb ning ara, anggun kan-kan noutamak, tonoknye mambul kanye bopturye, na si eren aik bublan ara, tirikdongoptuba, na kanye deiptinye. Ara, urdem ati kume. Akat bublan tirikdongoptuopura, anggunce kam ning malye ning bobuka, na arena ati, uku kum dongopmantonye ton upsutue. Bukni, na arena ati, pia malye ninguk arelyanganumunya ati, narye kanye kum deipsine. Anggun ti na lik unulule. Tonda, anggunce malye ning arelyanganumunye ning ara, pia kum dopropnamne.

11 Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.

12 Bukni, anggun Israel ninye arye nati malye kipdeipnulume. Ara, na si eren ati, kintiniplumce aning-aning nirya, malye ninguk dobuka delilyangalulumak, ara, ‘Allah Yahweh el si erenak pia mambul kume,’ teneluluma deice arye, malye winiplume. Tonda, anggunce malye tenelulum din ninguk dobuka, nati arelyangamumnya deice arye, ‘Allah el arena ati, keil lelebuka yangeibupe ning babye, mambule kume,’ tenelulumce, malye ululume.

13 Anggunce nyamunye yupu ara ani. ‘Se, nunce aning nirya dobuka, arelyangalamububa, lik usulule. Allah Yahweh ati, el si erena ap, el amu tam una ap, el yupu moubuka kekena ap ara, ikin usulula ati ara, nun walwale,’ nyalulume. Tonda, narye anggunti, ‘Wininamlulume, aning ara kum wininamlulume. Malye ning ani, teleb ning ani,’ nyapdeiamsise yupu ati, anggunce, ‘Kume, aning ara, ikin asa aniryuk kekebuka dobolbanyaba anya arye, nun like,’ tenemunce, ayupu nirya batakalulume.

Na Allah Yahweh, aning-aning nirya talibuka, im deice yin talin malaikat, sik deiyoknye birye nyapsine. Narye nyapsine, anggun ton teneipdelulume. Anggunce, na arena ati, nong bol malye kam un ning bobuka, arelyanganumunye ning ara, teleb do, malye do? Ara, kam ulul ning ubula dolomunye ning ap, yok kwalilamle ning ap, uk dilamle ning ap bobuka, nati arelyanganululume. Winimunye bukni, anggunce tenemunya ara, ‘Aning ara, Allah Yahweh arye dolosululce, kanye deipnamsile,’ tenelulum do? Na Allah Yahweh arye nyapsine. Anggun malye winilulum ning kilina ati, ato malye kam un ning doproptinirye, anggun malye winimunye ning namin kibuka, lyepropsitinye do? Kume, ara kum winipmanto.

14 Ati ara, anggunce na si eren ati kam ning ara, bol malye bomlye ning obuka boyakirye, ‘Nunda Allah Yahweh el si erena ati, yim domba pia teleb ning arebape,’ nyabuka tilila yupu nyanyak nang ara, Allah Yahweh arye sik anang ati, ‘Malye unyake’ tenen, supliba, ikin weik ning sik dam yalyopura, malyeuk wininamake.

Ara, urdem ati kume. Na Allah Yahweh, talinye kum unune. Nara, aning-aning nirya ap, tukwak ninye mutuku-mutuku nirya ap talibuka, sik weik deiyoknye ununa ati ara, nara dipkoprob pia weik mambulnye, Raja unune. Na Allah Yahweh, aning-aning nirya talibuka, im deice yin talin malaikat nirya, sik weik deiyoknye unune. Na Allah ninye deiyok nang nirya deice tam, eitam ununa ati ara, winipniba yuk yala ninye im sirya, mutuku sirya nirya arye, nati kibuka, si ereninyake. Allah arye nyabuk.