Nyabuka asipdeyukbuk, ayanganmoknye birye tamubuka nyabuk. “Nara diksukum yupu nyananye yanmane. Nara mikip weiknye ununa anya arye, Allah el ‘Na’ tenen, ninye nirya ati, sik Lyena Deiyoknye unune. Na mikip weik ununa anya arye, anggun nirya ati lyepsitinye,” nyabuk. 2 Anyasik kaliknanye birye, ayanganmoknye biti tamubuka asipdeyuk. “Yata deiyok ati, an ongopmalam baju ara, anggur tapu mek purunmace nang ining bi dulamle touk winipmalam do?” nyabuka asipdeyuk.

3 Nyabuka asipdeyukbuk, ayanganmoknye birye tamubuka nyabuk. “Nara anggur tapu duk dakuka mek purunmangu sukum unmace nang, sik baju deice ining bi, bol pilamle touk, nara malye-malye winin nang weik onmanu talak ara, na baju deice ara ining bol pipmanile. Amalye nang onmanu talak ara, yuk pera mutuku nang ton kum melipmanunge. Na aryuk amalye nang obukapnurye sirya dakmane. Ati aining bol pipmanil ning ara, anggur mek ining bi kume. Ara, ninye ining bol pipmanile.

Ara, ninye mutuku-mutuku nirya malye winiceba, na yu unulul ninye nirya ati, obuka yaniptapmanba, sik ining ara aupmanil atia. Sik ining weik unmoa anya arye, na baju nirya ining bol pipmanile,” nyabuk. 4 Anang oplopmana deiyok ara, ani. Ara, minop talak arye na tenelamse touk, wini talak akunum upmala ati, na mapu Israel ninye ati obuka sirya dakik nang kwang dakmane. Na tenen ninye Israel ninye ati obuka sirya dakikce, ‘Tapu koubuka deiamika noutamak arye, lopnirye lyepnamne,’ tenelamse talak akunum upmoa ati, amalye winin nang opmanue.

5 Malye nang on talak ara, ‘Yuk nang arye ton melipnamniyak’ tenen, enmanu bukni, nati melipmanto nang ton pia kum eipmanua ati, kum melipmaniyake. Melipmanto nang ton pia kum unmangua ati, ‘Se,’ tenepmanue. Utenepmanu ning ara, na mining mikip deice aniryuk amalye winin ninye nirya oplopmane. Tonda na yu weik upnukce, tonok babye ton batakna kum diparyuk, aninye nirya obuka sirya dakmanue. 6 Na yu weik upnuka deice arye, im sirya, mutuku sirya nirya malye winilamik ninye obuka yaniptapmanue. Winipmanu ara, na yu weik upnuka ati, sik aninye nirya ati ninye kanye wangalamak ning arepmanuba, sik nong nirya ikin upmoa deice arye, na ton tamubuka opmanto kum upmanunge ati, naryuk sikti, obuka sirya dakmanue. Winipmanu arye, sik ining dobuka, tuku deice diklopnuba banmoe.

7 Allah Yahweh, el kanye aryuk, Israel ninye ati teleb kibuka melilamuk ning ara, ‘Ninye nirya kekenamak’ tenen, laka nyanamne. Amambul pil dolamuk ning nirya ati, ninye nirya arye, Allah ati, el si erebuka kinamake. Nun ni koprop Yahweh arye meliamsuk ning ara, kum nukmanto ulul touk pia weik tonun laka nyanamne. Yuk yala ninye ara, pia kum meilyamuk bukni, nun Israel yala ninye ati, weik tonun melilamsuke. Nun malye ulamupu ning ati, talye lukparabuka opsutu bukni, bico tenelamsukce, lyelolamsuke. Allah arye nun Israel ninye ati, batakna pia kumce, weik tonun bico tenesilirye, melisulula deice arye, lyesulule.

8 Allah arye nun Israel ninye ati lyesulula ara, urdem ati kume. Allah arye nyapsuke. “Dipkoprop Israel ninye ara, na mapu unyake. Sikda, ‘Na’ tenen, ninye unyake. ‘Anang ara na mapu koproba anya arye, sikce nati kum yaninamniyake,’ tenelamukce nyapdeiamsuke. Allah arye utenelamuka ati, ‘Nara, sik Lyena Deiyoknye unamne,’ tenebukce nyalin yupu nyapdeipsuke. 9 Allah bico tenelamsukce, ‘Israel ninye lyenamne,’ tenelamsuka ati, Israel ninye nun dam ikin ning yangalamsukba, ikin weik ulamupu talak noutam nirya ara, el babye ikin kanye bolamuk. Winilamuka ati, ikin ulamsuk bukni, lyepsuk ning ara, ara el dam ulamuk malaikat dopdeipmokba, kum lyepropsuke. Tonda, yuk melin nang ton dolilamukba, kum lyepromsike. Aning kum bukni, nun ikin ulamsuk ning nirya ara, Allah elcuk lyelolamsuke. Allah arye, ‘Na mapu bicoe, minopce kum wenepnamne’ tenen, melibuka lyelolamsuke. Minop talak keting tamun yupa weik noutam nirya, Allah arye nun apu Yapu Israel ninye ati, melibuka bobalamsuke.

10 Allah arye Israel ninye weik tonun meliamuk bukni, sikce elti, ‘Nun like’ tenen, el yupu yaniltalamikba, Allah el Dib Kanye arye, ‘Se yata ati wininyak do?’ tenen, malye kanye bobuka talima uk dilamuk. Winilamukba, Allah el Dib Kanye aryuk Israel ninye sik wenena ati obuka sirya daklamuk.

11 Allah arye Israel ninye ati wenelamukba, adeice arye sik moubuka tenelamik. Minop talak Musa ap, sik apu yapu ap, neika balamik ning ati teneipre ulamik. Winilamikce nyabik. “Musa birye nun apu yapu nang, Mesir mutuku ulamikba, boyangalamuk Allah ara, wini talak dan unmal do? Nun apu yapu yangalamik talak, Ining bi Laut mekwen noutam bokuka, dana-dana kiprobukba, anoutam bisik menekuka balamukba, sik aminyan yangalamik. Bukni, nun ni Allah ara, wini talak dan mutuku ulul do? Winipmanto ara, domba basam weina deiyoknye birye, el domba basam ati melibuka weilamle touk, nun apu koproba Musa biti melibuka nyalilamuk Allah ara, wini talak dan mutuku ulul do? Tonda, minop talak ulamik Israel ninye, sik noutamak, el Dib Kanye dolkwetelamuk Allah ara, wini talak dan mutuku ulul do? Akunum bataksuk do?” nyabuka asilelamik. Aning nirya ara, sik Israel ninye malye winilamikba, Allah arye sikti, wenelamuk talak ara, sik mining ninye uk asilalelamik.

12 Allah Yahweh, el mikip weik deice arye, Musa meliamukba, weik mekwen dam yanuka tikukce “Melipsilyame,” nyabuka morobukba, aweik mekwen deiamuka, adiparyuk noutam bokuka, dana-dana kiprobukba, anoutam bisik mikukura, nun apu yapu arye yanibuka abisik biyik. Allah arye amambul pil ninye arye dopmanto kum pil dobuk ning ati, ninye mutuku-mutuku nirya kekelamikce, el si erelamik. Israel ninye arye, “Apil dolamuk Allah ara, wini talak dan mutuku ulul do?” nyabuka asilalamik.

13 “Karu weik mekwen deiamuk noutam arye melibukba, yanamik Allah ara, dan mutuku ulul do?” nyabuka asilalamik. Tonda, kuda basam arye pata mutuku talye lukparabuka balamle atonun, Allah arye aninye meliamukba, sik anang babye kwelana kumce, diksukum bisikuk balamik. 14 Tonda, Allah Yahweh arye bobuka, sik unamik mutuku boyanamuk. Winipmanto ara maning teleb kibuka palamlye sukum, domba basam bobinuka kiriklamak touk kibuka boyanamuk. Allah Yahweh el Dib Kanye arye aninye ati, kanye deibuka, lamapdongobuka dakeiyam asa un ning arebukba, teleb kibuka ulamik. Nun ni Allah ance, aning nirya winibuka ulamluma deice arye, Israel an ‘Na’ tenen, ninye ati, bobuka balamlume. Winilamlum ning ati, ninye mutuku-mutuku nirya kekekirye, an siuk erebuka kisal dokinyake.” Nabi Yesaya birye nyabuk.

15 Diba nun ni Allah Yahweh, anda im deice alip tam pia telebak umince disilyame. Anda pia mikip weiknye ulyame. Malye ning tonok babye kum winiminya ati, weik erebuka eitam umince, im deice pia teleb mutuku ulyame. ‘Ance bico tenesimince, ilil kumce malya kibuka, nunti melisilyam ning ara, wini talak dan sukum ulul do? Tonda ance talye lukparabuka opsutum bukni, lyelosilyam ning ara, dan sukum ulul do?’ tenekinyabe. ‘Anda yata ning ati, nunti yukuna atonun winilisilyam do?’ tenekinyabe. 16 Aning nyanyaba ara, urdem ati kume. Ara, Allah anda dipkoprob nun ni koproba ulyam bukni, nun apu yapu minop talak ulamdik nang, Abraham ap, Yakub ap, sikce nunti bita kel kum bikamsirike. Bukni, nun ni Allah Yahweh, anda nun ni ulyamce, minop talak arye dipdongobuka, wini talak nirya babye, nunti akunum wipdeipsulumce, lyepromsulumnye, an tonok ulyame.

17 Diba, nun ni Allah Yahweh, anda yata ning ati nunti namin kipsulumba, bisik kirikuka banyap do? Tonda, ance nunti lik kanye bon ning arepsulumba, nunce anti, ilil kum upsiliba, anti tuba kum tenekibirye, yata deiyok ati kwanim bisikuk banyap do? Yata deiyok ati, ance bataksulumba, nun talima pum tam ara malye tenen kanye upsukba, anti nun kum ilil usulul do? Wininyaba ati, na nio, ance melipsilyame. Nunda an mapu koprop unyabe. Tonda, nun Israel ninye yala yuk-yuk unyap nang nirya ara, an ‘Na’ tenen, ninye uk unyaba anya arye, ance tamubuka nunti lyepnamsilyame. Tonoknye birye deipliba, el min yuma deiamlye mi uk el talilamle ning dololamle touk, sirya talak ara nun Israel ninye dopropnamsilama ati, tamubuka melinamsilame. Na nio, nun talima pum tam pil dopsiminba, tuba tonap moubuka teninamabe. 18 Yata deiyok ati ance bataksulumba, an mal olan nang arye, an si eren aik, Yerusalem mutuku noutam mambul aik ara, daklomik ninguk tuba malye kilinyak do? Minop talak ance, ‘Na si amutuku deice deipniba, pia kurun mutuku unamle,’ nyalamlum bukni, nun an mapu arye, tia taleamupu buk, wini talak ara, malye nang aryuk akunum yaninyake.

19 Minop talak donirye dipdongobuka wini talak nirya ara, ikin ning noutamakuk ulamupa ati ara, yuk nang arye, nunti, ‘Anang ara, Allah el ‘Na’ tenen, ninye kum unyake. Allah si erenyakba, elce aninye taliplirye, kalikuka melilul ninye kume,’ tenepsetinge. Ara, urdem ati, kume. Nun ikin unyap ning ap, an si eren aik ati malye nang arye, yanibuka malye kilinyaka ap ati nyababe. Ati, nun ni koproba Allah ance melipsilyame, nyakinyabe. Sik Israel ninye arye, ‘Se’ tenen, malye kanye bobuka, Allah ati morobik.