Ton tam Ibrani yupu kel weik nang arye, nyanyake. “Kume, ayupu nirya ara, tonoknye birye, el dopnamuk kil ati, weik tonun bico tenelamukce, kanye deibuka ati, ayupu sekukba, el dopnamuk kil ati arebuk. Arebukopura, akil arye, ayupu kekebukce, tuba tamubuka el dopnamuknye biti, akil arye tenelamuk ning ton sekdeibuk.

Anye birye, akil tonok ati, moun dilamukce, weik tonun kanye deibuk. Yuk kilapu nirya ara, pia kum patalamuka ati, kum tenelamuk. Atonun, akil arye yuk nang ati, patana kumce, el dopnamuknye bitibuk, kanye delilamuk. Ati ara, ‘Kidung Agung buku ara, sik anang bitinye nyalamdik yupu ati, upsile,’ tenenyake. Akunuma. Ton tam kel weik nang ara, aninguk tenenyake.

Bukni, ton tam kel weik nang arye, aning kum tenenyake. Sikda, ‘Kume, Kidung Agung yupu ara, winipmanto yupu, tonda, domon yupu atonun usulule, tenenyake. Sik anang arye, ‘Abuku deiyok noutam ara, ani,’ tenenyake.

‘Kume, nun tukwak nang arye, nun ni Allah ap, nun du Yesus ap ati, diba tenebuka kanye delinamabe. Sik bitinye ati, diba tenebibirye, sikce nyasururak yupu dem, moubuka taliptibirye, aninguk wininamap’ tenen ati, adomon yupu Kidung Agung ara, sekuka arepsike,’ tenenyake.

Ton tam kel nang arye, utenenyake. ‘Kume, ayupu ara, domon yupu ulul bukni, ayupu deiyok ara, Allah Yahweh arye, sik Israel nang ati, ‘Na tenen nang unamak,’ tenebukce, tukwak nang yala-yala nirya kan-kan noutam arye, sik Israel yala nanguk wipdeibukce, sik tibuk weik tonun bico tenelule. Yuk nang yala-yala nirya ton, bico tenesilirye, lyemsulul bukni, el pia mining dam nang, el ‘Na’ tenen nang kum unyabe. Israel yala nang ati, weik tonun bico tenelirye, kanye delilule. ‘Aning kel biknamak’ tenen, abuku Kidung Agung ara, arepsik,’ tenenyake.

Ton tam kel nang arye nyanyake. “Kume, abuku ara, domon yupu ulul bukni, el deiyok ara ani. Ara, tukwak nang ara, sikce akunum domik kilapu ati, lik tenebikirye, adiparyuk akilapu batakikirye, yuk talye kilapu dobuka unyake. Tonda, yuk talye kilapu ton ubula yolanyake. Tonda, yuk nang arye, akunum domik kilapu ubula dolonyake. Bukni, Allah arye, ‘Aning ara, na pia like,’ nyasulule. Ati, Kitab Kidung Agung deice arye, awelnye ap, elce dopnamuk wel kil ap, yuk nang, tonda yuk kilapu tenena pia kumce, sik bitinye arye, weik tonun bico tenelalamdikce, kanye delilanauk ulamdik. Aning atonun, nun tukwak nang nirya babye, Allah el tonok ati, diba teneptibirye, nun kanye talima nirya, el deiceuk deiptibye. Yuk talye ning ati, ‘Nun ni koproba ani,’ tenen, isa si kum ereptibye. Tonda, ‘Nunce donyap kilapu batakuka, yuk kilapu kum dopnamabe’ teneptibirye, kel biktibye ati, ‘Abuku Kidung Agung arepsik,’ tenenyake.

Tonda, abuku noutam ara, walwal usulul ning ton ani. Ara, akitab Kidung Agung noutam ara, Allah el si pia kum sekik. Tonda, yuk-yuk Kitab noutam nirya ara, Allah arye mambul yupu nyasulula atonun ara, Kidung Agung noutam ara, sekikba pia kum ulule. Ati, akitab, el yupu deiyok ara, ani. Ara, tonok welnye ap, tonok wel kil ap, bico tenepdanamdikce, kanye deipdanamdike. Anye bira, akil ati, ‘Se, akil doptinye’ tenen, moun dilamuk. Atonun akil arye, ‘Se, anye dopnutue’ tenen, moun dilamuk. Winilamdikce, kanye delilan yupu ap, kanye lon yupu nyana ap, tonda bico tenelan yupu ap nyalalamdikce, sekdik ning ara, Alkitab kintinipsik nang arye areyamsik. Dipkoprob ning ara, ayupu sekdik talak ara, anye birye, akil min kum dobuk bukni, ‘Akil dopnamne’ tenen, sekuk. Awel kil ara, ‘Anye birye, dipkoprob dopnamnil’ tenen, sekuk.

Ati ara, ninye arye el akunum dobuk kil nyapmanto ning atonun nyabuk. Akil arye, ninye akunum dobuk kil arye, el akanye biti nyapmanto yupu nyabuk. Tonda, minop talak ara, sik Israel nang arye, nyalamik yupu ap, gambar atonun, tonda winipmanto yupu nyalamik ning ara, pia yuk ulamuk. Wini talak unyap nang ara, aning atonun tuba kum nyanyabe. Bukni, sik minop talak ulamik nang arye, aning atonun nyalamika ati, aninguk sekuka arepsikba, aulule.