3 Apil dobik ning ara, like weik 40 sum deice arye apil dobik. Deiyok ara, diplamik ninye sik nong lyuna ati sekeldongon obat delilamika ara, wala tonok atonun deice arye, like 40 sum deice arye apil dolamik. Aning akunum winibikura, sik Mesir mutuku ulamik ninye arye Yakub el si erena ati like 70 sum deice arye mambul kanye bona ap, engena ap, malye nyana ap ulamika ani sirya dakik.

4 Sik awinibuka kanye se tenelamikce, engena ap, si erena ap, anirya winilamika akunum dakikopura, Yusup birye Firaun el amu tam ulamik deiyok ninye ati nyabuk.

Anggunce nati telebnye tenepnulumce, kanye deipnumunyopura, na melin ati Firaun dam binuka nyaplulume. 5 Yusup birye nyapkile. “Na ni koproba min kum diamuk talak ara, moropnukba, narye, ‘Aning moropmanilam atonun dipkoprob winipnamkine,’ nyapdeipse. Na ni birye nyapnuke. ‘Na adiparyuk dipnamna ati, Kanaan mutuku noutamak, narye ninye weinak palipsi tuku pum bisikuk, na dipnyopura, anyaka uk weipnamnilyame,’ nyabuka moropnuke. Ati, wini talak ara, ‘Telebe,’ nyapniminyeura, na ni el nong bobuka weilbinamne. Winipnyopura, adiparyuk tamubuka an dam yanamne. ‘Yusup birye nyabuka moropmakile,’ nyabuka, Firaun biti nyaplulume,” Yusup birye anang ati nyapdeibukba, sikce ayupu bobuka Firaun nyalbiyik.

6 Akunum nyabikba, Firaun birye Yusup biti, “Telebe. Yusup an ni koprop arye, ‘Winipnamnilame’ nyabuka morobukba, ‘Na dipkoprob winipnamkine’ nyapdeiplum touk winipnalame,” nyabuk. 7 Firaun birye Yusup biti nyabukba, Yusup birye el li el nong bobuka ‘Kanaan mutuku tam noutamak weipnaman’ tenen, bobiyuk. El bisik banmok talak ara, Firaun el amu tam ulamik deiyok ninye ap, ara Mesir mutuku noutam ulamikce weik pil dolamik nang ap, ton yuk nang ap neika ansinibuka biyik.

8 Tonda Yusup el mapu silip nirya ap, el aik neika pil dobuka ulamik ninye ap, el du yapu ap, el li Yakub el yala nang ap, sik mapu silip ap, sik nirya arye Kanaan mutuku welebiyik. Sik biyik bukni, Gosyen mutuku asukumuk batakik nang ara, sik anang sik mapu uk batakik. Tonda, sikce talibuka weilamik ning, kam ning nirya bobuka kum biyik. 9 Sik welebiyik talak ara, kuda basam balye deice bukuka balamik nang ap, kuda basam arye lipdakuka balamikba, tuku deice balamuk ning ap dobuka bobiyik. Yusup ap bisik banmek nang ara, yupa weik arye bisik banmek.

10 Sik nirya bisik banmeka ani, Yordan mutuku dam bukni mutuku si Atat mutuku biyikce, gandum duk dakuka deipmanabuk,^a miknaba aduk talibuka kweklamnak aduk yamupra saklamuk mutuku biyik. Amutuku biyikopura, sik nirya arye mambul kanye bopmikce, ‘Nun ni koproba Yakub dibuke’ tenen, weik yupu deice arye malye nyana ap, engena ap unmek. Yusup birye like tek sum deice arye, el li si erena ati, malye nyabuka, engenmokce, ikin kanye bopmuk.

11 Sik nirya wininmek bukni, amutuku ulamik nang Kanaan tam ninye eibikce nyabik. “Se, sik Mesir tam ninye arye weik yupu arye malye nyana ap, engena ap unmaka ara, urdem ati kume. Ara, sisinanye dibuka ati unmaka anya arye, mambule.” Nyanmeka ati ara, otam arye dipdongobuka anoutam talak nirya ap, amutuku si ara Habel-Misraim nyabuka si dobikce, si silamik.

12 Ati ara, Yakub birye, “Aning ara winipnamlulume,” nyapdeiamuk touk elce deiamuk mapu arye aninguk winibik. 13 Yakub el mapu arye el nong bobuka Kanaan tam noutamak bobiyik. Ara, mutuku si Mamre mutuku dam, wa tuku si Makpela wa noutamak uamuk keil deiya pum bisik dongobik. Akeil deiya ap, awa tuku ap ara, minop talak Abraham arye, ‘Na yala nang ninye weina ati,’ tenyamukce dekamuk tuku atia. Tonda atalak ara Het yalanye el si ara Efron taleamuka anya arye Abraham arye dekna ning yo bok arebukba, Epron arye Abraham biti awa ap, akeil deiya ap nukuk.

14 Ura, Yusup birye el li koproba akunum weibukopura, el ap, el du yapu ap, sik neika biyik ninye nirya ap tuba tamubuka bisik banmeka ani, Mesir mutuku tamubuka biyik. 15 Yakub akunum dibukba, Yusup el du yapu nirya arye nyapdayik, “Se, nun weit Yusup biti pia ikin ning el nong deice deibupu ning ara, tuba teninauk usulul do? Yusup bira el talima noutam aninguk diba tenepsilirye, ‘Kwang daknamsil do?’ tenen, ilil kanye bobuka mambul kirikuka nyanmek.”

16 Ilil weik nyanmika ati, sikce yupu nyapdeibikba, yuk nang arye Yusup dam laka nyalbiyik. Sikce nyabik. “Nun ni koproba min kum diamuk talak ara, ayupu ton nyamsuke. 17 Yusup biti nyapnamlulume. An ni koprop arye nyapkile. An du yapu arye anti pia malye-malye weik winibikika deice arye ikin ning weik an nong deice uamkuke. Bukni, sikce pia malye winilamik ning ati ara namin kipnulyame. An ni koprop arye si erelamuk Allah ara, an du yapu babye el siuk erebuka si erenyake. Ati, sikce malye kipdeipkik ning ara namin kipnulyame. An ni koproba Yakub birye nyabuka moropkuke.” Yusup el du yapu arye ayupu nyapdeibikura, yuk nang arye ayupu bobuka laka nyalyayikba, Yusup kekebukopura, engebuk.

18 Aminyan talak Yusup el du yapu arye el dam yanuka, el si erena ati, el urasinak tuku deice dinikdongobka alye dakdayikak arye nyabik. “Wini talak nunda an urdem pil dona ninye atonun unamabe. An amu tam uk unamabe,” nyabik. 19 Nyabik bukni, Yusup birye sikti, nyabuk. “Kume, anggun ilil ati kwarana bataklulume. Nara Allah ulye touk, yupu lipsisikuka bokolina weik deiyoknye ununa ati, ayupu nyapnulum do?

20 Minop talak ara anggunce, ‘Yusup oplopnamabe’ tenen, dipkoprob malye kipdeipnulum bukni, atalak ara Allah el kanye ara, ‘Kume, winibuka dawinibice bukni, aminyan talak anye Yusup, el pil dolamnilya deice arye, dipmanto ninye weik lyepnamle,’ tenyamnuke. Ati elce kel biksukba, malye kipnulum ning ara, teleb uka. Wini talak apil donyap deice arye Allah min arye tenyamsuk ning ara akunum lakak upmalaba, kel bikape.

21 Aning ati ara, anggun ilil una bataklulume. Narye anggun ap, anggunce deiamlum mapu ap, anggun mapu silip nirya ap ati, anggun patasilye ning talye mangkau arye arenamsine.”

Yusup birye el du yapu ati nyabuk. Ayupu atonun yupu ton nyabuka deice arye sik talima kwa dibukura, teleb yupu ton nimalya arye nyabukba, sik nirya talye kanye bobuka telebuk ulamik.

22 Yusup ap, el mapu silip ap, ara, el li koprop arye deiamukba, sikce deiamik ninye nirya ap Mesir tam uk pia ulamik. Yusup bira, keting tamun yupa weik 110 tahun deice ulamuk. 23 Atalak noutamak ara elce deiamuk mi Efraim bira kil dobukura, sikce Deiprik mapu ap tonda, anang ton sikce deibik mapu ap, amapu arye deibik mapu ap eibuk. Aning atonun, Yusup el mi Manasye birye deibuk mi el si ara Makhir, elce deibuk mapu ton eibuk. Ara, amapu deibik talak ara, ‘Yusup eipnul’ tenen, amapu bobuka Yusup el keil deice delilbalamikba, elilamuk.

24 Sik daulamika ani, aminyan talak Yusup birye el du yapu ati nyabuk. “Winira na dipnamnarya. Na dipnaman bukni, Allah arye anggun nirya ati melipnamsile. Ara, Allah arye nun apu yapu Abraham ap, Isak ap, Yakub ap ati, ‘Amutuku arepnamsine,’ nyalilamuk mutuku ara melibuka bobinamsile. Mesir mutuku noutamak dopropsilirye, Kanaan tam bobinamsila ati nyapsine,” Yusup birye nyabuk.

25 Nyabukce ayupu ton dukdongopbuka nyabuk. “Na du yapu, na kele. Allah melipsilirye bobuka Kanaan mutuku bobinamsile. Ati ara, Mesir mutuku batakuka Kanaan mutuku tam binamunye talak ara, na yok bobuka Kanaan mutuku tam bobinamnululume. Na yok ara amutuku noutamak batakna kume. ‘Pia diba tenepsitinye’ tenen, anggunce nati, ‘Nunda dipkoprob an yok dobuka, Kanaan mutuku bobinamabe,’ nyapnululume,” Yusup birye nyabuka morobukba, el du yapu arye “Diba winipnamabe,” nyabik.

26 Ura, sik daulamika ani, aminyan talak Yusup dibuk. El dibuk talak ara keting tamun yupa weik 110 tahun wisi akunum danamuk. Dibukba, ‘El nong minopce lyuplyak’ tenen, sik aning kel nang arye lyuna sekelongon obat el nong deice deibikce, kwemdina delin bisik dongobikce, Mesir mutuku asukumuk deibik.