2 “Na Yakub birye deiamsise nang ati, na nyapnusin yupu kekepnululume. Nara, anggun ni koproba Israel unune. 3 Ruben, anda narye min yuma dunye deipkise. Na mikip weik ulamse talak, min yuma deipkise mi ara, an uka. Yuk nang ati si erelamak bukni, anti ara weika arye si erekinyake. Yuk nang ton mikip ara mitik anun unyak bukni, anda mikip weik deiyoknye ulyame. 4 Winibuka ulyamce, weik mek balamlirye, lonting-lonting alamle atonun ulyam bukni, aminyan talak ara weik sisinanye kum unamlame. Ara, talye ati kum bukni, deiyok ara, an ni koproba malamukak weleplumce, na domse kil ubula yoplum deice arye, malye kipdeipnuluma ati, ayupu nyapkine.” Yakub birye Ruben biti nyabuk.

5 “Simeon ap, Lewi ap ara, sik neikto touk, urudake. Sik parang ya ap, yin ap dobuka, ninye olbarudake. 6 Ati, sik ap, yuk nang ap yupu nyanamak talak ara, na ap melibuka bukibirye kum kekenamne. Sik ap, yuk nang ap bulubikce talak ara, na ap bukibirye sik ap neika kum unamabe. Deiyok ara, sik bitinye nang ara, yu weik ubukba ninye weik oplobrik. Sikce, ‘Winipnuname,’ tenedurak touk, yuk ninye sik weilamak sapi yan milmil sekeldongodurake.

7 Ninye bico tenena pia kum nang arye, yu weik upliba ninye oltakarudake. Aning ara pia malye ati Allah arye wenepnamsile. Weneplirye, sik yala ninye nirya dobuka Israel yala ninye unamak mutuku noutam bukni, yuk-yuk bokuka dopkwetepliba, yuk-yuk unamake.” Yakub birye sik Lewi ap, Simeon ap, sikce deiprikceba, dadeipdanin banamak ninye ati nyabuk. 8 “Yehuda, an weit capu silip nirya arye anti, ‘Elda pia mambulnye’ nyabuka si erenamkiyake. An ni koproba deiamuk mapu arye, an si erena ati, sik nong kanupdongobikirye, si erenamkiyake. Ance yuk malye nang ati obuka malye kipmince, an taruk arye sik ngang kotokuka onamlame.

9 Singa mi ara, mikip weik uplirye ilil kum asa weik ulamle touk, Yehuda, an babye atonun ilil asa kumce mikip weik ulyame. Singa arye ‘Aning obuka dipnun’ tenen, kaliknin banmalya ani, oplirye diplyopura, el kanye deibuka asik teleb arye tamubuka yangalamle touk, an babye atonun winilyame. Singa din eiplirye kalikuka pipmalya arye, erebuka odilamle touk winilyame. Yu singa mapmalyak, ninye kum kam kamulamak touk, yata ninye arye anti yanuka kam kamupketing do?

10 Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.

11 Atalak ara, ninye tuku ninye mutuku-mutuku nirya arye, el yupu uk kekebikirye, el amu tamuk unamake. Ilil kumce, talye kanye bobuka teleb ubuka ulamlamye bira, el keledai basam bobuka anggur tapu kirikuka delilamak atonun, tonda el kuda bobuka teleb yo dam kirikililamle touk, Yehuda, an yala nang ara kanye deibuka telebuk unamake. An yala ninye arye anggur tapu mekwen purupdongobikirye, amekwen deice ara, sik baju mek likinamake.

12 Teleb anggur mek ara pia mirilamle touk, sik asing ara pia teleb ubuka mirinamle. Sapi moum asing pia kurulamle touk, Yehuda yala ninye sik si teleb ubuka kurunamsile. Sikda pia telebukirye, urasin teleb ninye uk unamake. 13 Zebulon, an yala ninye ara, weik laut mekwen kup-kup binuka unamake. Weik mok piripna doplye talak ara, laut mekwen deice balamle mek lia yo ara, ‘Piripna arye opsilyak’ tenen, sik unamak mutuku wekelbikirye, tia ati yanuka unamake. Sik unamak mutuku sirya ara, Sidon mutuku dam anyapce sekropnamle.

14 Ninye arye mikip weik keledai basam bobuka, bona weik libuka, el balye tam koupdongobiceura, balamle talak ara, el dikdik sena ati, binuka winipliba, abona lin ning arye tuku barilule. Winilamle touk, Isakar an yala ninye aning atonun wininamake. 15 Isakar yala ninye dipdekirye, ‘E, nun mutuku ara pia telebe, nun dikdik senak ap, unak ap ara anyaka pia telebe’ tenen, kel kipnamake. Bikibicopura, sikce ikin ning bobuka ereipnamake. Yuk nang arye sikti, malye kibikirye, sik alip tam ukirye, ‘Nun pil urdem pil dopsululume,’ nyabuka pil dibikirye, ikin ning sik nong deice deibicopura, teleb uka tenebikirye, pia piribuka pil talye mangkau arye donamake.

16 Dan, an yala ninye ara, Israel yala ninye unyaka anya arye, sik yala nang ati, teleb kibuka yupu bokolinamake. 17 Weik karayong bisik do, talye mitik bisik do, yu kwatima maning noutamak duknubuka mapmalya arye, kuda deice bukmalinye asukum balyopura, kwatima arye akuda yan si topliba, kuda lukdanuka erepdopliba, bopmalinye tongopkwetepliba tukwak sakalule. Aning atonun, Dan, an yala ninye ara, ayu kwatima atonun unamake.” Yakub birye el mapu ati nyabuk.

18 Nyabukopura, Allah morona ati nyabuk. “Se, na ni Allah, ‘an dem aryuk lopdeipnimince, melinamnilam’ tenen, dinauk ukunune,” nyabuk. Nyabukopura, ayupu ton nyabuk.

19 Gad, an yala ninye ara, yuk yu nang arye, ‘Anang obibirye sik ning ubula dopropnamap’ tenen, olyanamsiyake. Winipnamak bukni, Gad el yala ninye arye ayu nang ati, tuba tamubuka sik aminyan tam dobolbikirye, obisipnamake. 20 Asyer, an yala ninye arye dipnamak ning ara, to pia teleb ning dinamake. Sik ninye deiyok nang, Raja nang dilamak ning atonun ning ara, Asyer el yala ninye arye bulubuka kintinilinamake.

21 Naftali, an yala ninye ara, wininamake. Ninye arye bai tam rusa basam talibuka koupdongopmakca ani, aminyan talak arusa lopdeibikceura, pia kanye deibuka bai sakuka balamle touk wininamake. Rusa basam kil ning arye, pia teleb kibuka rusa mapu delilamle touk unamake.

22 Yusup, an yala ninye ara, mitik mek balamle mek lilun anggur tapu paplirye, nepnin balamlya ani, duk weik mouplirye, ninye dolamak poka deice balirye, el bok arye singiplirye, duknulamle touk unamake. 23 Yu nang arye an yala ninye ati, yin talibuka oplopnamak bukni, kum opnamake. ‘Aninye ara oplopnamap’ tenen, yu upliba, maraplopnamake.

24 Bisik abuka maranamak bukni, Yusup anda mal kum biknamkile. Elda ilil una kumce, yin darapdongobuka talinamle. El taruk ara mikip weik anya arye, sirim kum talinamle. Winibuka teleb upnamaka ara, talye ati kume. Deiyok ara, Yakub birye si erelamuk Allah, Pia Mikip Weik Allah ara, el taruk deice arye talibuka melinamla ati, telebuk unamake. Tonda, domba wein nang arye, sik domba ati bico tenebikirye, teleb ubuka weilamak touk, Allah arye Israel ninye ati, pia kalikuka melinamle. Weik mutuku yangan keil erepmanto kum ati, apia ubuka atonun, Allah ara pia ulirye, Israel ninye ati melinamle.

25 Yusup, an yala ninye telebuk unamaka deiyok bitinye ning ara, an ni koprop arye si erelamuk Allah ara, anggun nirya melinamsil atia. Tonda, aning-aning alip tam ulirye, aning-aning nirya malye kibuka winilye Allah, elce an yala ninye ati, teleb kilinamsile. Allah arye melisilye ning ara yala weik bukni, im noutamak arye mok celamle ning ap, tukwak noutamak arye mek pu kutukuka balamle ning ap, talye mek balamle ning ap arye melisulule. Tonda, elce melisilyeba, sik kilapu mi bomikce ani, mi deibikcopura, moum dininyake.

26 Minop ubuk mutuku nirya ara, ‘Pia telebe’ tenenyap bukni, aning ara mitik teleb uka. An ni koprop arye teleb yupu nyabuka, teleb kipdeipnamsil ning ara, pia telebe. Narye, “Winipnamake, winipnamake,” nyabuka pia teleb yupu nyapmakina ara, ‘Allah arye melipkiliba winipnamkile,’ tenen, Allah moropmakine. Yusup bira, el du yapu weik daunyak bukni, elda weik mambulnye ulula anya arye, sikda talye nang otonun unyake. Elda sik deice tam ulirye, ninye deiyoknye bitonun ulule.

27 Benyamin, an yala ninye ara wininamake. Bura tam bai kam arye, el pataplye ning kalikuka oplirye, aning obuka dilamle. Beren tam talak ara, sirya batakmalye ning ara buklirye, el mapu ati arelyangalamle. Benyamin yala ninye ara, aning atonun wininamake.

28 Asi nyapmap nang ara, sikce deibikba, dadeipdanin balamik deice arye Israel yala ninye “Duabelas (12) yala unyake,” nyanyaka ara, sik apu yapu arup sekmabe. Tonda, sik ni koproba arye, el mapu 12 nang ati, ‘Allah arye anang ati winipnamle, winipnamle’ tenen, aminyan winipnamle ning ati ayupu nyabuka sik deice nyapdeibuk yupu ara akunuma.

Sik yuk-yuk bukni, sik nirya sik wininyak ning yuk-yuk winilamik touk, tenebukce ayupu uk nyapdeibuk.

29 Ayupu akunum nyabukopura, ayupu tonap dukdongopbuka nyabuk. “Winira na apu yapu diamik touk, na babye aminyan dipnamnarya. Na akunum dipnyopura, na nong bobuka Het mutukunye birye taleamuk wa noutamak, akeil deiya pum bisik weipnamnulume. Atuku ara Het yalanye birye el si ara Epron, elce taleamuk wa atia. 30 Ara, na apu koproba Abraham arye, ‘Na kil Sara weipnamne’ tenen, dekuk wa, Kanaan mutuku noutam bukni mutuku si Mamre mutuku dam, awa tuku dekukce, amutuku si ara Makpela sisibuk. Awa ara Het yalanye birye taleamuk tuku ap, keil deiya ap uamuk bukni, Abraham birye dekuk.

31 Akeil deiya tonok bukni, na apu koproba Abraham el kil dibukba, asukumuk weibuk. El Abraham ap, el mi Isak ap, Isak birye domuk kil Ribka ap diamikba, sik nong nirya akeil deiya pum bisikuk weilbalamik. Na domse kil Lea ton dibukba, akeil deiya pum bisikuk weipse. Na aminyan dipnyopura, anyaka uk weipnamnululume. 32 Ura, awa tuku ap, akeil deiya ap ara sik Het yala ninye arye nun apu koproba Abraham biti dekik,” Yakub birye el mapu ati nyabuk.

33 Nyabukopura, isin dakdopnuyuk talak ara, el yan tukwak deipmok bukni, memeprakukabukce el man amsuna deice uk malamuka ani, aminyan talak el babye dibuk. El isin kum dayukba, el apu yapu akunum min arye diamik touk, el babye dibuk.