3 Nyabukura, Allah arye nyabuk. “Nara Allah unune. An ni koproba Isak birye, si erelamuk Allahuk unune. Mesir mutuku koulukuka bana ati, ilil una pia kume. Deiyok ara, oumutuku bimunyeura, narye amutuku noutamuk pia teleb kipdeipnamkine. Narye meliamkiniba, an mapu arye deibikiba, dadeipdanin banamak ninye nirya, pia weik upnin banamake. 4 Narye Mesir mutuku noutam melibuka binamsine. Neikauk bananame. Aning atonun, an mapu kilapu nirya bobuka, tuba tonap amutuku uk tamubuka boyanamne. An dipminyopura, an mi Yusup el taruk aryuk, an asing kupdongopnamkile.” Allah arye Yakub birye, lengdar mapmoka deice nyabuk.

5 Nyabukura, mapmeka berekukopura, Yakub ap,^a el mapu kilapu ap Bersyeba mutuku batakuka bisik banmek. Ara, Yakub el mapu arye, sik ni ap, sik kilapu ap, sik mapu nirya ap, bobuka Firaun arebuk tuku deice boban ning deice deipdongobuka bobanmik. 6-7 Tonda, sik weilamik ning, aning-aning nirya ara, sik Kanaan mutuku noutam delilamikce, taleamik ning ap, aning-aning nirya bobuka, Mesir mutuku koulukuka biyik. Ara Yakub ap, el mapu kilapu nirya ap, elce deiamuk mapu ap, elce deiamuk kilapu ap, sikce deiamik mapu ap, kilmapu ap, sik nirya Mesir mutuku koulukuka biyik.

8 Yakub ap, el mapu silip ap, Mesir mutuku biyik ninye ara, sik si ani. Yakub birye, min yuma talak deiamuk mi, el si ara Ruben. 9 Ruben birye deiamuk mapu sik si ara, Henok ap, Palu ap, Hesron ap, Karmi ap biyik.

10 Yakub birye, aminyan talak deiamuk mi, Simeon ap biyik. Simeon arye deiamuk mapu si ara, ani. Jemuel ap, Jamin ap, Ohad ap, Jakhin ap, Zohar ap, tonda Kanaan mutuku kil arye Deiprik mi, el si ara, Saul ap biyik.

11 Yakub birye deiamuk mi Lewi ap, elce deiamuk mapu sik si ara, Gerson ap, Kehat ap, Merari ap biyik.

12 Tonda, Yakub birye deiamuk mi Yehuda ap, elce deiamuk mapu sik si ara, Sela ap, Peres ap, Sera ap, tonda Peres birye deiamuk mapu, Hesron ap, Hamul ap biyik. (Yehuda birye, el mapu bitinye ton, sik si ara Era ap, Onan ap deiamuk bukni, amapu ara, min arye Kanaan mutuku noutamak akunum dipdika anya arye, sikda Mesir mutuku kum neika kum biyik.)

13 Tonda Yakub birye deiamuk mi, Isakar ap, elce deiamuk mapu sik si ara, Tok ap, Pua ap, Jasub ap, Shimron ap biyik.

14 Tonda Yakub birye deiamuk mi Zebulon ap, elce deiamuk mapu Sered ap, Elon ap, Jalel^b ap biyik.

15 Adeice tam sekmap mapu nirya ara, Yakub ap, Lea ap, Mesapotamia (tonda Padan-Aram) mutuku neika ulamdik talak arye deiamdik. Tonda, sik kilmu tonok el si ara Dina deiprik. Sik si ara nukuka yupa weik 34 ninye ulamik.^c

16 Yakub birye deiamuk mi ton Gad ap, elce deiamuk mapu sik si ara, Sepon ap, Haki ap, Suni ap, Esbon ap, Eri ap, Arodi ap, Areli ap biyik.

17 Tonda, Yakub birye deiamuk mi Aser ap, elce deiamuk mapu sik si ara, Imna ap, Ispa ap, Ispi ap, Beria ap, tonda kilmu el si ara Sera ap biyik. Tonda Beria birye deiamuk mapu, sik si ara Heber ap, Malkiel ap biyik. 18 Ura, adeice tam sekmap ninye si ara, ara Yakub ap, Silpa ap arye Deiprik mapu. Ara, Lea el li koproba Laban birye, ‘Akil el pil melin kil unamle’ tenen, areamuk kil ati. Sik si nukuka yupa weik 16 unyake.

19 Tonda, Yakub ap, Rahel ap arye deiamrik mapu, sik ton biyik. Sik si ara, ani. Yusup ap, Benyamin ap ulamrik.

20 (Tonda Mesir mutuku noutam Yusup ap, el kil Asenat ap arye Deiprik mapu si ara Manasye ap, Epraim ap ulamrik. Asenat, ara On mutuku (tonda Heliopolis mutuku nyalamik) ninye arye isa si erena deiyoknye el si ara Potipera, elce deiamuk kilmu Yusup domuk.)

21 Yakub birye deiamuk mi el si ara Benyamin ap, biyuk. Benyamin arye deiamuk mapu sik si ara, Bela ap, Beker ap, Asbel ap, Gera ap, Naman ap, Ehi ap, Eros ap, Mupim ap, Hupim ap, Arad ap deiamuk. 22 Yakub ap, Rahel ap arye deiamrik mapu ara, nukuka yupa weik 14 ulamik. Sik si ara ei deice tam sekmabe.

23 Tonda Yakub birye deiamuk mi ton el si ara Dan biyuk. Dan arye deiamuk mi ton Husim biyuk.

24 Yakub birye deiamuk mi ton el si ara Naftali ap biyik. Tonda elce deiamuk mapu ton biyik. Sik si ara, Jahasiel ap, Guni ap, Yeser ap, Silem ap biyik. 25 Amapu nirya ara, Yakub ap, Bila ap arye Deiprik. Rahel el li Laban birye ‘Akil ara pil melibuka don kil unamle’ tenen, areamuk kil ani. Yakub birye dobukura, Bila birye amapu deiamuk. Sikda ninye si nukuka 7 ulamik.

26 Ura, Yakub ap, Mesir mutuku biyik ninye ara, nukuka yupa weik 66 ulamik. Ara, Yakub birye deiamuk mapu ap, sikce deiamik mapu ap ati nyapmabe. Elce deiamuk mapu arye domik kilapu si kum nukmabe. 27 Yusup el kil dobukce, sik bitinye arye Mesir mutuku noutamak Deiprik mapu bitinye ton tabakuka nukeipyopura, sik yupa ara 70 ulamik. Ara Yakub ap, el mapu silip ap Mesir mutuku noutamak neika ulamik ninye ati nyapmabe.

28 Yakub ap, el mapu silip ap Mesir mutuku noutamak bukni, ‘Gosyen mutuku bindopnamap’ tenen, banuyik talak ara, Yakub birye el mi Yehuda dobuka minopce dopreibuk. Ara, Yehuda Yusup dam minopce, Yusup birye, “Gosyen mutuku bisik bana ara, winibuka-winibuka abisikuk binamalulume,” nyabuka laka nyapliba, ‘Nyalyanamnil’ tenen, dopdeibuk. Dopdeibukba, sik aminyan tam bisik banmeka ani, Gosyen mutuku damak biyik.

29 Biyik talak ara, Yusup birye nyapdeibukba, el amu tam pil don nang arye el tuku deice boban ning kintinibik. Kintinibikura, aning deice welebuka bisik banmokce, ‘Na ni bisik noutam epdanamanam’ tenen, biyuk. Biyukura, Gosyen mutuku noutam epdarik talak ara, Yusup birye el li koproba ati iripdobukce, pia weik engenmok. 30 Engenmok bukni, el li koproba Israel birye Yusup biti nyabuk. “Wini talak ara, na asing arye akunum eipmakine. Anda dipkoprob kam tuba ulyame. Akunum eipmakina ati, wini talak ara na dipna teleb uka,” nyabuk.

31 Aminyan talak Yusup birye el du yapu ap, sik mapu silip nirya ap ati nyabuk. “Winira Firaun el dam laka nyalbinune. Binirye nyapnamne. Na nie, na ni koproba ap, na du yapu ap, sik mapu silip nirya ara, Kanaan mutuku tam ulamik bukni, winira na dam akunum yanmake. 32 Aninye nirya ara kam ulye ning aning-aning weik tanyaka ati, sikda basam yala atonun ning wein ninye uk unyake. Sik domba basam ap, sik unta basam ap, sapi basam ap ato ning ap, ara, sik talinyak ning aning-aning nirya bobuka boyanamake.” Yusup birye, “Nyapnamne,” nyabuk.

33 Nyabukce ayupu ton dukdongopbuka nyabuk. “Aminyan talak Firaun birye anggunti nyapsilyopura, yamunyeba, asipdenamsile. Elce, ‘Anggunda yata pil dolulum do?’ nyabuka asipsilyopura, anggunce tamubuka nyapnamalulume.

34 ‘Kume nio, nunda mitik mapu ulamupu talak danirye dipdongobuka anoutam talak nirya ara, kam ulye ning wein ninye ulamuburye, tuba apiluk donyabe. Nun ni yapu arye apiluk dolamik touk, nun babye apiluk talibuka basam aning-aning nirya wein ninye unyabe,’ nyabuka, laka nyapnamalulume. Aninguk nyapmunyopura, Firaun birye nyapliba, Gosyen mutuku arepnamsile. Deiyok ara, sik Mesir mutuku noutamak unyak ninye arye kam ning wein ninye nirya ati, ‘Se, ato nang ara nun like. Nun dam una like,’ tenenyaka anya arye, mitik pera mutuku Gosyen mutuku arepsiliba, anoutamakuk unamlulume.”

Yusup birye el du yapu ap el li ap, sik mapu silip nirya ap ati nyabuk.