2 Yusup bira, weik bouku sukupmoka anya arye weik engenmokba, sik anyaik dam unmek Mesir mutuku ninye kekebikce, Firaun el aik ulamik ninye ati, laka nyabik. 3 Yusup birye, el du yapu ati laka kibuka nyabuk. “Nara anggun weit dipkoprob Yusup, aunune. Na ni kopropba arando? Tuba kam ulul do, kum do?” nyabuk. Nyabuk bukni, el du yapu nirya arye lukdayikce, ilil weik ubukba, elti yupu tamubuka, kum nyapmanto ubik.

4 Winibikba, Yusup birye sikti, nyabuk. “Kume, na dam yalulume,” nyabukba, sik yayikopura, nyabuk.

Kume, nara yuknye kume. Min arye anggun weit koproba dobuka, ‘Mesir mutuku bobinamak’ tenen, yuk mutuku ninye ati dekuka areplumba, Mesir mutuku bobinamniknye bira, Yusup na aunune. 5 Winipnulum bukni, wini talak ara, ilil una kume. Tonda anggun bidamnye ati, ‘Se, Mesir bobinamak’ tenen, ‘Nun weit koproba dekuka ara, yata ati do?’ tenen, waldana kum unamlulume. Deiyok ara, aning ara talye ati kum winipnuke. Aning kum bukni, Allah arye, ‘Ninye dibicak’ tenen ati, ‘Yusup dopdeibikca deice arye, ninye lyepnamne,’ tenyamuka deice arye winipnulume.

6 Oketeng tamun tonok deice arye deiyok koubukce, atalak keting tamun bitinye, noutam talak arye, nun din nirya kum dasukba, amutuku unyak ninye nirya, din patan asa, talye urdemuk unyake. Aning atonun, wini talak arye dipdongobuka, orketeng tamun pamubarye deice arye tonap, amutuku ninye arye wa wina ap, lilbana ap kumce, urdemuk unamake. 7 Winipnamsil bukni, anggun winiryuk yalum talak ara, Allah arye na bobuka, amutuku noutam dopdeipnukba, unune. Ara, talye ati kume. Deiyok ara, ‘Yakub birye deiamsuk mapu ap, sik mapu silip nirya ap dibicak’ tenen, ‘Ton ninye lyepnirye, na ning unamake,’ tenebukce, amutuku dopdeipnuk. Tonda, elce, ‘Na weik mambul pil dopnirye, Yakub el mapu silip lyepnamne,’ tenebukce, na amutuku dopdeipnuke.

8 Aning ati ara, anggunce na dobuka, Mesir mutuku kum dopdeipnulume. Allah elce dopdeipnuke. Allah dopdeipnukce, elce ereipnuka deice arye, Firaun el mi koproba atonun kipdeipnuke. Tonda, Firaun el aik unyak ninye nirya, el pil donyak ninye nirya, na amu tamuk unyake. Nara sik deiyoknye unune. Mesir mutuku nirya talinune. Aning nirya ara, Allah elce ereipnukba unune. 9 Na ni dam minopce binamlulume. Bimunyopura, nyapnululume. Yusup birye nyapkile.

Allah elcuk ereipnukba, Mesir mutuku nang nirya talibuka weiknye unune. Anya arye, adiparyuk anggun mutuku batakuka, na dam yanamlume. ‘Aminyan do?’ tenena kum bukni, adiparyuk dilyanamlulume.

10 Yamunyopura, Mesir mutuku noutam bukni, mutuku si Gosyen mutuku unamlume. Ara, na dam unamluma atia. Ara an ap, ance deyamlum mapu ap, sikce deiamik mapu ap, anggun weilul domba nirya ap, unta basam ap, ara, anggunce talilulum ning nirya ap, bobuka boyanamlulume.

11 Oyanamle keting tamun pamubarye noutam ara, din pia kum danin banamsile. Wini talak ara, ninye nirya dina kum, talye urdemuk unamake ati, narye an ap, an mapu silip nirya ap ati, pia melinauk unamsine. Kumopura, an ap, an mapu silip nirya ara, pia ikin weik upsiliba, talye bona utoto kum ninye atonun unamlume. Winipsilyak ati, na dam yamunba, na melinamsine, “Yusup birye nyapkile,” nyalbinamlulume.

12 Yusup birye nyabukce, ayupu ton dukdongobuka nyabuk. “Wini talak ara, anggun asing arye eipmanuluma anya arye, anggun ap, na weit koproba Benyamin ap, anggun nirya arye, ‘E, ara nun weit koproba Yusup birye ayupu nyapmasile’ tenen, akunum kel bikmanulume. 13 Ati anggunce na ni dam bimunce, nyapnamlume. ‘Kume, sik Mesir mutuku nang arye, nun weit koproba Yusup biti, weik arye si erenyake,’ nyapnululume. Anggunce amutuku noutam eipmalum ning nirya ara, na ni biti laka nyapmunce, el bobuka na mutuku boyanamnulume.” Yusup birye, el du yapu ati nyabuk.

14 Nyabukabukce, el weit koproba Benyamin biti, iribukabukce engenmok. Aning atonun Benyamin birye, el du Yusup biti, iribukce engebuk. 15 Tonda Yusup birye, el du yapu nirya ati, mutubukce, engenauk unmok. Anirya akunum winibukopura, el ap, el du yapu nirya ap, yupu sisikinmek.

16 Yupu sisikinmek bukni, yuk nang arye, “Yusup el du yapu yanmake,” nyabuka Firaun el ninye deiyoknye aik unmokak laka nyabikba, Firaun ap, el amu tam pil dolamik nang ap, kanye deibik. 17 Kanye deibikce, Firaun birye Yusup biti nyabuk. An du yapu ati nyapnulyame. ‘Anggun kuda basam deice, aning-aning nirya kitibuka deipmunce, Kanaan mutuku tamubuka bilulume.

18 Bimunyopura, anggun ni koproba bobuka, el ap, anggun mapu kilapu ap, anggun asik umunye ninye ap bobuka, na dam tamubuka boyalulume. Mesir mutuku noutam palye ning, pia teleb ning arenamsine nyabuk. Arepsinyeba, amutuku noutam ulye ning, teleb ning ara dinamlume.’ 19 Tonda nyapnamlulume. ‘Nun Mesir mutuku tuku deice balamle ning ton, bok binamalulume.’ Ara, anggun kilapu ap, anggun mapu ap, anggun ni koproba ap, aning deice bukikceura, libuka boyanamsile.

20 Anggun talilulum ning, anggun bona aton tenena kume. Mesir mutuku noutam pia teleb ninguk arepsiniba, dopnamluma atia. Firaun birye, Yusup biti nyabuk.

21 Firaun birye nyapdeibuka ati, Israel el mapu nirya kekebikce, ayupu nyabuk touk winibik. Firaun birye, ‘Aning ara, winipnamlulume,’ nyabuk touk, Yusup birye el du yapu ati, tuku deice balamuk ning arebukba, lipdakuka bobiyik. Tonda, sik bisik noutam dipnamik ning ati, din bokuka arebukba, bobiyik. 22 Yusup birye, el du yapu nirya ati, sik tonok-tonok ati winiryuk baju arebuk. Winibuk bukni, el weit koproba Benyamin biti ara, winiryuk baju pamubarye nukuka arebukce, dekna weik ning perak tiga setengah (3 ½) kilo ton arebuk.

23 Tonda, el li koproba, si erena ati, talye arebuk ning ara ani. Yim keledai basam (ara kuda basam atonun) 10 ap, kil keledai basam 10 ap, arebuk. Akeledai basam balye tam kitibuka deibuk ning ara, yim ning deice arye, Mesir mutuku pia teleb taleamik ning, aning-aning nirya libukce dopdeibuk. Kil keledai basam deice ara, din ning aning-aning weik, roti ap ara, bisik noutam patapnamuk ning, yala weik ap, tabakuka kitinipdeibuk. 24 Yusup winibukopura, el du yapu banuyik talak ara, nyabuk. “Bisik noutam banmamunye talak ara, yu upsiliba, yupu deice arye walana kume. Talya mangkau kanye bobuka binamalulume,” nyapdeibukba, bisik banmek.

25 Mesir mutuku outam arye batakuka, bisik welebanmeka ani, aminyan talak ara, sik ni Yakub el dam Kanaan mutuku noutam biyik. 26 Biyikce elti, nyabik. “Yusup bira, tuba kam ulule. Aninguk kum bukni, Mesir mutuku nirya, weik deiyoknye kibuka talibuke,” nyabik. Nyabikopura, Yakub bira lukdaukce, yupu kum nyapmanto ubuk. Elda sik nyanmek yupu, diba kum tenebuk.

27 Winibuk bukni, sik nirya arye, sik ni biti, Yusup birye nyapdeipmok yupu laka nyabikura, kekebuk, tonda Yusup birye, ‘Na ni aning deice bukliba, boyanamak’ tenen, dopdeibuk tuku deice bobana ning ap, aning-aning nirya ap eibukopura, diba tenebukce, kanye teleb ubuk. 28 Teleb ubukce nyabuk. “Ura, wini talak narye diba tenepsine. ‘Na mi Yusup tuba kam ulule’ tenen, diba tenepmana anya arye na min kum dipmanye talak ara, wini talak aryuk dilbinamne,” Yakub birye nyabuk.