6 Sik nirya daulamika ani, Yehuda el min yuma deiamuk mi Era biti, kil morobukba arebik. Akil si ara, Tamar ulamuk. 7 Yehuda birye, ‘Na mi Era dopnamle’ tenen, Tamar morobukba, arebik bukni, Allah el si Yahweh,^a el kanye ara, ‘Kume, Era pia malye-malyeuk winilule’ tenelamuka ati, Allah el si Yahweh arye, dipna deiyok ning arebukba, Era dibuk. 8 Dibukba, Yehuda birye, el aminyan talak deiamuk mi, Onan biti nyabuk. “Ura, nun amutuku unyap ninye winilamupu touk, an du koproba dibukba, youwak batakuk kil ara, ance dobuka, neika mapmarumunyeba, an du koproba, el domuk kil youwak dakminyeura, mapu deipnamdurume,” nyapdeibuk.

9 Yehuda birye, el mi Onan biti, nyabuk bukni, Onan birye utenebuk. ‘Kume, akil ap, neika mapnimnyeba, mi deiplyopura, ami ara, dipkoprob na ninguk kum upnamle,’ tenen, ulamuk. Ara, el ap, Tamar ap, neika malamrik talak nirya ara, el den yung kum weklamuk, bai tam puruldonoklamuk. Winilamuka deiyok ara, ‘Na du koproba, el domuk kil youwak daknamne bukni, akil ap, na ap arye, mapu ton kum deipnamname’ tenen, winilamuk. 10 Utenelamukce, winilamuk bukni, Allah el si Yahweh arye, el kanye ara, ‘Onan birye, awinilye ning ara, malye weik winilule,’ tenelamukce, anye Onan biti, Allah el si Yahweh arye, dipna deiyok ning arebukba, dibuk.

11 Dibukopura, Yehuda birye Tamar biti, nyabuk. “Wini talak ara, an ni koprop dam, tamubuka bimince, youwak kil kibuka asukumuk unamlame. Narye deipse mi Shela bira, tuba mitik mi unmala ati, mitik tonun ton neplyopura, elce anti dopkutue,” nyabuk. Yehuda birye nyabuka deiyok ara, ‘Na mi Shela babye, diplyak do?’ tenen, ayupu nyabuk. Nyabukura, Tamar birye, Yehuda dam batakuka, el li koprop dam tamubuka binuka ulamuk.

12 Sik nirya ara, pia ulamika ani, aminyan talak ara, Yehuda birye domuk kil dibuk. Ara, Shua el kilmu atia. Yehuda el kil dibukba, ikin kanye bobuka daulamuka ani, aminyan talak, ikin ton kum ulamuk talak ara, mutuku si Timna mutuku welebuk. Ara, domba basam potong kona kel ninye ulamik mutuku anya arye, el domba potong konmek talak welebiyuk. El banmok talak ara, el kwit Adula mutukunye, Hira ap birik. 13 Sik bitinye bisik banmarik talak ara, yuk nang arye Tamar biti nyabik. “An yamal koproba Yehuda bira, ‘Na domba basam potong kopnamaniyak’ tenen, Timna mutuku bana ati, bisik banmale,” nyabik.

14 Nyabikopura, Tamar kekebukce, sik amutuku youwak kilapu winilamik touk, el youwak kilapu baju ongolamuk ning ara, batakuka, yuk talye baju ongobukabukce, ‘Na urasin eipnilirye, bikeipnilyak’ tenen, el urasin ap, kisok ap, kanupdongobuk. Winibuk ning ara, Timna mutuku lyu bisik noutamak, tonok mutuku si ton, Enaim mutuku biyukce, amutuku dana-dana poka domika bublan dam binuka bukmok. Winibuka deiyok ara, ‘Kume, na domnuknye, el weit koproba Shela bira, akunum nebuk bukni, elce nati, min kum dopnamnile. Ati abisik noutamak bukmaniba, na yamal koproba yanuka eipnilyopura, teneipnamnile’ tenen, Enaim mutuku bisik bublan dam bukmok. 15 Abukmok bukni, Yehuda yayukce, eibuk bukni, ‘Akil el urasin baju arye, lilipdongopmala anya arye, Ara, yo bok arebikirye, talye yolamak kil atia,’ tenebuk. 16 Yehuda talye mangkau kanye bobukce, ‘E, akil ara, na mi arye domuk kil’ tenena kumce, el bukmokak binuka nyabuk. “Akilo, nun neika mapnamanam ati, aning ‘Se,’ tenepne,” nyabuka morobuk. Nyabukura, Tamar birye, tamubuka nyabuk. “An ap mapnimnyopura, ance yatato ning arepnamnilam do?” nyabuka asipdeyuk.

17 Asipdeyukura, Yehuda birye, “Kume, na weinun domba basam noutamak arye mitik yim domba dobuka arepnamakine,” nyabuk. Nyabukopura, Tamar birye, “Ati ara, ‘Yim domba dipkoprob aminyan arepnamnile talye kum nyapnil,’ tenenamne, ati, yata ning arepnutum do? Yim domba akunum dopropnyopura, arepnamnilam ning tamubuka arepnamkinarya,” nyabuk.

18 Nyabukura, Yehuda birye, “Kume, ‘Nong winipnamle, tenen, arepnutue,’ tenepmalam ning ara, yatato ning ton tia arepnukin do?” nyabuka asipdeyuk. Asipdeyukura, Tamar birye, “Ura, surat deice yo pia tablakalamak ning, tanda tangan kina ati, ayo pia deice daralongolamak ning, el si meterai ap, an ngang dam karaklum ning ara, lobuka arepnunilame. Tonda, ance talipmalam kama ton arepnunilame,” nyabuka morobuk. Nyabuka morobuka ati, Yehuda birye winipmok ning nirya dobuka, akil ati arebukce, sik neika mapmarikba, Tamar bira, mi akunum bobuk.

19 Amutuku batakuka, el asik koproba tamubuka biyukopura, el urasin ap, kisok ap, lilipmok baju kwiribukabukce, sik youwak kilapu ongolamik baju tuba tamubuka, tonap ongobukura, daulamuk.

20 Aminyan talak ara, Yehuda birye, ‘Na kwit arye yim domba bobuka, na talye neika mapnume kil arepliba, natia ati, akil arepse ning tamubuka arepliba, boyanamnile’ tenen, yim domba dobuka, el kwit Hira Enaim tamnye biti arebukba, bobiyuk. ‘Akil arepnun’ tenen, enmok bukni, kum eibuk.

21 Kum eibuka ati, amutuku ulamik nangak asipdeyuk. “Anango, min talak arye, Enaim mutuku bisik dam bulamuk kil, talye nang ap, neika mapre banyak kil ara, wini talak dan tam ulul do?” nyabuka asipdeyukura, sikce tamubuka, “Kume, nun mutuku ara, talye nang ap, neika mapre ban kil, Enaim mutuku bisik dam, ton kum bulamuke, ato kil ton kum ulule,” nyabik.

22 Amutuku nang arye nyabika ati, Hira tamubuka, Yehuda dam biyukce nyabuk. “Ance nyapnulum kil ara, asipdesi bukni, pia kum eipse. Tonda, amutuku nang arye, ‘Kume, talye nang ap, neika malamak kil ton, Enaim mutuku bisik bublan dam ton buna, kum elinyabe,’ nyapnike.” 23 Hira birye nyabukba, Yehuda birye tamubuka nyabuk. “Ati ara, dauaplye. Narye, akilak arepse ning ara, tuba nyapnimnyeba, yuk nang kekepsikirye, ‘Akutupsikceba, alye dakdanimnyak’ tenen, dauaplye. Tonda, narye, ‘Winipnamkine,’ nyapse touk, mitik yim domba arepsiba, bobindelum bukni, kum eipluma ati dauaplye,” nyabuk.

24 Sik nirya talye daulamika ani, wala winilye ton, akunum kibukura, yuk nang arye Yehuda biti, yanuka laka nyabik. “Amio, an mi arye domuk kil, el si Tamar bira, youwak ulul bukni, yuk nang ap, talye neika malamikba, winira mi akunum bopmala ati, laka nyapkiyabe,” nyabik. Nyabuka laka nyabikba, Yehuda birye nyabuk. “E, aning ara, pia malye weik anya arye, nun winilamap touk, akil dobuka boyamunce, weik uku sekuka dongopmunyopura, uku arye dipnamle,” nyabuk.

25 Nyabuka anya arye, anang arye, Tamar dopbolbinuka, dobuka boyanmek talak ara, akil arye el yamal koproba ati, surat sekdeibuk. Asurat noutamak ara, ayupu sekdeibuk. “Na mi bopmana ara, talinye birye kume. Na dopropse ning talilulnye ap, neika mapnume. Ati, atapu ap, akama ap, yo pia deice daralongolamak ning, tanda tangan kina ning dipdeminya deice arye, ‘Anye bira, ani’ tenen, kel biknamalam do, kum do?” nyabuka sekukce, asurat ap, aning winilye ap, dopdeibuk.

26 Dopdeipbukba, Yehuda dobuka, dipdeyukce, mambul kanye bobuka, ‘Se, aning ara, na ninguk ulule’ tenen, bikuk. Bikukce nyabuk. “Se, nun bitinye malye winipnumu bukni, narye akil ati, na mi Shela kum arepsa ati, nara weik malye winipse bukni, el tonok ara, mitik malyeuk winibuke,” nyabuk. Nyabukce, tuba tamubuka tonap, akil pia neika kum malamrik. Sik neika kum malamrik.

27 Ura, sik nirya talye daulamika ani, Tamar mi deibukopura, bikik. El mi mun pum tam ara, kwa bitinye mapu deibuk. 28 Akwa bitinye mapu delinmok talak ara, tonok mi arye, el taruk belepdeipmokba, akil mi mun pum tam arye, el taruk laka upmoka anya arye, ami delina ati, melin kil arye, ining bi tapu dobuka, el taruk duk mouse kirikdongobukce nyabuk. “Min yuma deipmo mi ara, ani,” nyabuk.

29 Nyabuk bukni, ami ara, el taruk memepropmokba, kwa bitinye mi ara, min yuma deipmok. Deipmokba, amelin kil arye nyabuk. “Winibuka lopdongopdanmamuba, deipmakila anya arye, an si ara, Peres^b nyanamkiyabe,” nyabuk. 30 Nyabukabukce, adiparyuk kwa bitinye mapu bukni, bitinye ning ara, aminyan deipmok. Adipmok mi ara, asum el taruk duk, mouse ining bi tapu kitipdongopmok mi atia. Aminyan deipmok mi el si ara, ‘Sera,’ nyabuka si dobuk.