3 Ura Yakub bira, mapu weik delilamuk bukni, sikda mitik tonunuk kanye deiamuk bukni, Yusup bira, Yakub el akunum wisi deiamuk talak arye deiamuka anya arye, Yusup biti weik arye kanye deiamukce, talima areamuk. Ati ara, tonok talak Yakub birye, el mi Yusup ati, alip tam ongolamik baju, warna teleb ubuk ning, pia teleb baju urdem arebuk. 4 Yakub birye Yusup biti, kanye delilamuk ati, sik yuk mapu nirya ara, Yusup biti utenelamik. ‘Kume, nun ni koprop arye, Yusup ati pia teleb tenelul bukni, nunti ara, mitik tonunuk teleb tenesulule’ tenebuka, talima wililamikce, Yusup biti, el du yapu arye, teleb yupu pia ton kum nyalamik.

5 Atonok lukunyan noutamak ara, Yusup bira, lengdar mapmoka deice arye eipmok ning, el du yapu ati, laka nyabuk. Aning nirya laka nyamok ning ati, sikce elti, ‘Elda nun pia like,’ tenelamik. 6-7 Yusup birye nyamuk ning ara, ani. “Na du yapu, na lengdar mapmanu anyak, eipmanu ning ara, laka nyapsiniba, kekepnululume. Na lengdar mapmanu noutamak ara, nun nirya neika pil donmapce, nun kouamupu ning, el si gandum sekuka, tapu arye koubuka delinmabe. Maning atonun ning, el si ara gandum, sekuka deipmap bukni, narye deipmanu ning ara, tikmobuk, anggunce tapu koubuka delinmalum ning nirya ara, na ning dam bulubuka yayakce, na dipmanu ning si erena ati, anggun nye nong kanupdongobuka kinmake,” Yusup birye nyabuk. 8 Nyanmokba, el du yapu nirya arye, ‘E deiyok ani,’ tenebikce, nyanmek. “Ura, ance tenepmasilama ara, kel bikiyabe. ‘Nara ninye deiyoknye Raja kipniba, na du yapu nirya, na amu tam ubikirye, kisal donamniyake,’ tenepmasilam do?” nyanmik. Nyanmikce, minop talak Yusup biti, malye kanye bolamik bukni, atalak arye dipdongobuka, pia malye kanye bobikce, ‘Elda, nun like,’ tenelamik.

9 Aminyan talak, Yusup birye, lengdar deice ton mabukce, el du yapu ati nyabuk. “Na du yapu anggun kekepnululume. Na lengdar mapmanu talak eipmanu ning ara, ani. Ura, keting ap, wala ap, kurya sebelas ap, sik nirya arye nati, kisal dopmaniakce, nong kanupdongopmake,” nyabuk. 10 Nyabukce, el li koproba ton, ayupu uk nyabukba, el li Yakub birye nyabuk. “Lengdar deice mapmamu buk, eipmamu ning ara, aran do? An yata deiyok tenepmasilamba, ‘Na ni ap, na nin ap, na du yapu nirya ap, sik nirya arye, na si erena ati, na dam yakirye, nong kanupdongobuka kipnamniyak’ tenen, nyapmasilam do?” nyabuka wenebuk.

11 Yusup el du yapu nirya, sik talima tulum ubukba, Yusup biti, malye kanye bobikce, ‘Nunda weik nang kiptibye, elda kume’ tenelamikce, malye kanye bolamik. Winilamik bukni, Yusup el li koproba Yakub, el tonok ara, Yusup birye nuklamuk ning kekebuka, kanye pum tam bolamuk.

12 Ura, datalak noutamak ara, Yusup el du yapu nirya arye, ‘Amutuku maning dinamak’ tenen, sik ni koproba weilamuk domba bobuka, Sikem mutuku bobiyik. 13 Daulamik bukni, aminyan talak Yakub birye, Yusup biti nyabuk. “An kele, an du yapu arye, na domba nirya bobuka, Sikem mutuku dam bobiyikba, omutuku uk maning dinmake. Ati, ‘Teleb unmak do?’ tenen, dopdeipkiniba, dilbilyame,” nyabukura, Yusup kekebukce, “Telebe,” nyabuk. 14 Nyabukura, el li birye, “An du yapu ap, sikce weinyak domba ap, ‘Nirya teleb unmak do?’ tenen, dipdemince, na kekena ati, tamubuka nyalyanamnilyame,” nyabuk. Nyabukce dopdeibukura, Yusup birye, amutuku Hebron lyu mutuku bisibukce, batakuka biyuk.

15 Bisik banmoka ani, Sikem mutuku binuka, ‘Na du yapu danaka unmak do?’ tenen, dipdenin banmokbuk, tonoknye aunmoka arye, asipdeyuk. “Anda yata ning ati, asukum epnin banmalam do?” nyabuka asipdeyuk. 16 Asipdeyukura, Yusup birye tamubuka nyabuk. “Kume, na du yapu ati epnin yanganmane. Sik domba basam maning dinmakba, sikce kalikuka dinmak mutuku ara, an kel bikamtumura, laka nyapnutum do?” nyabuka asipdeyuk. 17 Asipdeyukura, anye birye nyabuk. “Kume, amutuku batakuka, yukak akunum biyik. Sikce mutuku si, Dotan mutuku binamabe, nyabikba, kekepse,” nyabuk. Nyabukaura, Yusup birye, Dotan mutuku binuka dinmokba, el du yapu ara, pera arye eibuk.

18 Yusup pera sukum dorapce yanganmok talak ara, el du yapu arye, Yusup eibikce, “Elda nunce opnamabe,” nyabuka yupu talinmek. Sikce nyanmik. 19 “Ura, dipdelulume. Lengdar diamuk malulnye bira, otam arye yanganmala atia,” nyabik. 20 Nyabikce, ‘Winipnuyabe,’ tenebik. “Elda, obibirye, amutuku weik tilinga tonok bakuk, abisik anyuk tuku pum tam, el nong dobuka dongopnamabe. Winibibirye, aminyan talak yuk nang ati, ‘Kume, bai ulamle ning weik yu kam arye obukce, el nong nirya dibuke,’ nyapnamabe. Aning nirya akunum winibipyopura, ‘Elce lengdar deice mapmalirye, nyasulul ning ara, nong dipkoprob winipnamle do, kum do?’ tenen, dipdenamabe. Aning winipnuyabe,” nyabuka, yupu talipdayik.

21-22 Yupu talilanmik talak, sik noutamak tonoknye, el si ara, Ruben birye, ‘Na weit koproba, Yusup melibuka lyepnun’ tenen, nyabuk. “Se, na kayape. Yusup bira dipkoprob kum opnuyabe. ‘Obibyeba, el ining panapnul,’ tenena kum bukni, el kam kipman doprobibirye, amutuku mek pia kum uamuk tuku pum bisik, weik tilinga noutamak dongobibirye, talye urdemuk bataktibye. Dipkoprop oltakana kume, el yuk dipnamalca,” nyabuk. Ruben birye, ayupu nyabuka deiyok ara, ‘Aminyan talak, na duknubuka tamubuka yanirye, na weit koproba lyepropnyopura, na ni koproba dam, tamubuka bobinamne,’ tenebukce, tenepce kunusa dobuka nyabuk.

23-24 Ruben birye nyabuk yupu, sik nirya kekebikce, Yusup el du yapu dam yayukopura, sik nirya arye, el nong talibuka, el alip tam ongopmok baju, warna teleb uamuk ning ara, (ara el li koprop arye areamuk ning) kwiribukabikce, el nong bobuka, amutuku uamuk weik mek tuku lukamika pum bisik dongobik. Atuku lukamika pum bisik ara, mekwen ton kum deiamuk. 25 Dongobikce, ‘Din dipnuyap’ tenen, damakuk bukmek talak ara, omutuku pera anirye, ninye yupa weik Ismael yala ninye yanganmekba, eibik. Ara, sik Ismael yala ninye, Gilead mutuku anerye, amutuku yanganmekba, eibik. Sik Ismael ninye arye, bona yala-yala weik kitipmik ning, sik unta basam balye deice deipmekce, pia weik boyanganmik. Sik boyanganmik ning ara, ‘Din siltong lepnamle’ tenen, boyanganmek ning, el si ara, bumbu-bumbu ap, ninye kwetena ati, nong bola deice likna ning, nintong teleb ning el si ara parfum ap, boyanganmik. Ara, ‘Mesir mutuku bobibirye, amutuku ninye arye, aning deknamak’ tenen, bobanmik.

26 Ati, Ismael yala ninye yanganmekba, Yusup el du yapu eibikce, sik noutamak tonoknye, el si ara, Yehuda birye nyabuk. “Na kayape, nun weit koproba ati, talye duknubuka obibyopura, nunce yata dekne ning doproptibye do? 27 Kum ati, winipnuyabe. Yusup bira, nun weit koprop ulula anya arye, kum opnuyap bukni, ‘Sik Ismael yala ninye arye elti, dobuka bobiting’ tenen, el bobuka, sik ak dekipyopura, teleb ning doproptibye,” nyabuk. Nyabukura, sik nirya arye, “Telebe, aninguk winipnuyabe,” nyabik. 28 Nyabikopura, sik Midian mutuku dekna ninye, Ismael yala ninye, Yusup el du yapu unmik dam yayikura, el du yapu arye, tuku pum bisik dopkwetepmekak anerye, Yusup dobuka, sik Ismael ninye ati dekik. Dekikura, el du yapu arye, dekna weik ning, el si ara, perak seperempat kilo doprobik. Ismael ninye arye, Yusup bobuka, Mesir mutuku bobiyik.

29 Aminyan talak ara, Ruben birye, ‘Yusup lyepnun’ tenen, sik dongopmik tuku lukamik pum bisik dam dilyayukbuk, Yusup akum bukmokba, kum eibukura, ‘Se’ tenen, mambul kanye bobuka, el babye baju kwiliklobuk. 30 Winibukce, el kwit capu dam tamubuka biyukce, nyabuk. “Se, Yusup bobuka, tuku pum bisik dongopmapu sukum ara, kum unmale. Winira, na mambul upnile. Yata wiripnaman do?” nyabuka, malye nyabuk. 31 Malye nyanmokba, sik nirya arye, Yusup el nong deice tam ongolamuk baju, warna-warna teleb uamuk ning ara, dobukabikce, kambing basam obuka, el ining sakmokak noutam dongobikba, ining weik abaju deice dubuk.

32 Winibikopura, Yusup el nong deice tam ongopmok baju, warna-warna teleb uamuk ning dobuka, sik ni Yakub dam bobiyikura, bepdeyikce nyabik. “Se na nio, abaju ara, talye bai tam ubuka anyak, eipmaburye, dobuka boyanmakiyabe. An mi Yusup, ‘El ning do?’ tenen, dipdelyame,” nyabik. 33 Tenepce arye nyabikba, Yakub dipdeyukce nyabuk. “Se, abaju ara, dipkoprob na mi Yusup el ning ongolule. Na kanye ara, bai tam yu weik ulamle kam arye, Yusup oplobukce, el nong nirya akunum dibuk,” nyabuka engenmok. 34 Yakub engenmokce, mambul kanye bopmukce, el baju kwiliklobukce, ‘Na mi Yusup akunum dipmale’ tenen, atalak weika arye engena ap, malye kanye bona ap, pia unmok. Tonda, amutuku ninye arye, ‘Yuk nang eipsikirye, ‘Se, sikda ninye dipmaka ati engenmake,’ tenenamsiyak’ tenen, ongolamik baju ton, Yakub birye ongobuk.

35 Atalak noutamak ara, Yakub birye minop deiamuk mapu ap, kilapu ap arye, ‘Nun ni koproba, el talima kwa dipnuyap’ tenen, el dam yanganmek bukni, Yakub birye kum kekebuk. Elce nyabuk. “Kume, mambul kanye bobuka, engenauk unmanya ani, aminyan talak dipnyopura, na mi dibukba, unmalyakuk, na babye amutuku binamne,” nyabuka malye nyanmokce, el mi Yusup biti, weik engelamuk. 36 Yakub birye, malye kanye bobuka, engelamok talak ara, sik Midian mutuku bukni, Ismael yala nang arye, Mesir mutuku biyikce, Yusup bobuka, ninye si Potipar biti, dekik. Potipar bira, ara Mesir mutuku taleamuk ninye deiyoknye Piraun, el amu tam pil dolamuknye, el yin talin nang, sik deiyoknye ulamuk. Ati, Potipar birye, Yusup dekukce taleamuk.