A Schabꞌil Carta
SAN JUAN
Sco xajanej co bꞌa
1
A in icham vinac in tic,
tzin tzꞌibꞌejbꞌat jun in carta tic dꞌayach,
ach vanabꞌ yedꞌ dꞌa ebꞌ uneꞌ.
A ex to sicꞌbꞌil exxo el yuj Dios vedꞌoc.
Val yel tzex in xajanej.
Man̈oc inn̈ej,
palta tzex xajanej pax smasanil ebꞌ ojtannac jun abꞌix te yel.
2 Tzex co xajanej,
yujto a jun abꞌix te yel tic,
ayxo och dꞌayon̈ dꞌa juneln̈ej.
3 Tzin nibꞌej to a co Mam Dios yedꞌ Yuninal aton Jesucristo tzꞌocꞌ scꞌool dꞌayex,
syacꞌanpax svachꞌcꞌolal dꞌayex taꞌ,
yujto ayoch co pensar dꞌa jun cꞌaybꞌubꞌal to yel,
sco xajanan pax co bꞌa.
4 Ix te ja val in tzalajcꞌolal,
ayic ix vabꞌani to ay ebꞌ uneꞌ van sbꞌeybꞌalan jun cꞌaybꞌubꞌal te yel,
icha yaj yalancan co Mam Dios dꞌayon̈.
5 A ticnaic tzin cꞌan dꞌayex taꞌ to slaj co xajanej co bꞌa co masanil.
A jun checnabꞌil svalbꞌat tic dꞌayex,
man̈ bꞌabꞌelocto eyabꞌan tic.
Yujto atax ix cacꞌanoch Dios dꞌa co cꞌool ix cabꞌani.
6 Tato van co bꞌeybꞌalan schecnabꞌil Dios,
sco xajanej co bꞌa syal chiꞌ.
A jun checnabꞌil cabꞌnacxo atax cochnac yicoc Dios,
a tzꞌalani to sco xajanejecn̈ej co bꞌa.
A ebꞌ tzecꞌ acꞌan es
7 A ticnaic,
man̈ jantacoc ebꞌ esalvum tzꞌecꞌ dꞌa yolyibꞌan̈qꞌuinal tic,
tzecꞌ yalan ebꞌ icha tic:
Ayic yulnaquecꞌ Jesucristo,
man̈ ul yacꞌnacoc ochlaj sbꞌa animail,
xchi ebꞌ.
A ebꞌ tzꞌalan icha chiꞌ,
yes ebꞌ,
ajcꞌool ebꞌ dꞌa Cristo.
8 A exxo,
tzeyil val e bꞌa dꞌa ebꞌ yic man̈ nabꞌan̈ejoc e munlajel taꞌ.
Tato icha chiꞌ tzeyutej e bꞌa,
tzꞌacan ol e cha spac tas ol yacꞌ Dios dꞌayex.
9 A mach tzꞌactancan cꞌaybꞌubꞌal yalnaccan Cristo,
syacꞌanoch stzꞌacubꞌ jun cꞌaybꞌubꞌal chiꞌ,
man̈ ayocochlaj Dios dꞌay syal chiꞌ.
Palta tato ayn̈ejoch spensar dꞌa scꞌaybꞌubꞌal Cristo chiꞌ,
ayoch co Mam Dios dꞌay,
ay paxoch Yuninal dꞌay.
10 Tato ay ebꞌ scꞌoch dꞌayex,
palta chꞌoc cꞌaybꞌubꞌal tzecꞌ yal ebꞌ,
man̈ e chaoch ebꞌ dꞌa yol e pat.
Man̈ ex tzalaj yedꞌ ebꞌ ayic scꞌoch ebꞌ chiꞌ dꞌayex.
11 Tato vachꞌ tzeyabꞌi ayic scꞌoch ebꞌ chiꞌ dꞌayex,
locan ex yedꞌ ebꞌ dꞌa jun yic chuc chiꞌ syal chiꞌ.
Tzꞌacꞌjibꞌat stzatzil scꞌool ebꞌ
12 Tzijtumto tas in gana sval dꞌayex,
palta malaj in gana tzin tzꞌibꞌejbꞌat dꞌa jun in carta tic,
yujto tzin naꞌ ta icha chiꞌ ol bꞌat ex vilaꞌ.
Ato taꞌ ol in vachꞌ alejcan juntzan̈xo tic dꞌayex,
yic vachꞌ ol ja co tzalajcꞌolal taꞌ.
13 A ebꞌ yuneꞌ jun ix a nulej dꞌa tic,
aton ix sicꞌbꞌilxoel yuj Dios,
syacꞌbꞌat stzatzil e cꞌool ebꞌ.