Ba sɛ̀ nuhâ Da Vwel Sairus
6
Ano kwong,
Da Vwel Dariyus a nɔng nu na be ngyɛgɛt bebok-basâ pyɛ̂ bare yê Beda vwel de ba tik vɛ e Babilɔn.
2 Ko a de sè e ji pomô Ɛkbatana hê bak vwêl Medya de ba de sɛ̀ gwining e ji bebok-basa,
de be gunus vɛ,
de gwa vɔk ɛ ha hemo ngan:
3 Sairus,
Da Vwel a nɔng nu e ji shey hê mɛsɛng hê negwɔm mɛ,
na be to lɔk Gbɔng Duk Re Fongol e Yɛrusalɛm,
yaga na wo sè kwɔn de bê nása ɛ nenɔrɔ yas vɔk na Dagwi.
Gbɔng Duk o wa rɔda sè mita kuru baba na vɛ betaama vɔk e rak o,
na mita kuru baba na vɛ betaama e netês wɛ.
4 Ba rɔda lɔk vara mo lɔk tat hê beta,
ko be raa na hê sesêk cɔ́gɔt hining,
be dopse segsa ano pere wɔ̀ kunus.
Dyâm fwom o mwa ba rɔda nɔngɔs yɛ yi e ji gban lɔ gwɔ̀m.
5 Ba rɔda to toyo na pyɛ̂ fwom yê dyam shinang na dyam pyɛng vɔk e kwɔn de ya kana sè ɛ e ji Gbɔng Duk o e Yɛrusalɛm.
E yɛ à pyɛ́ de Gbɔng Gwɔ̀m Nɛbukadnɛzar á kana hashe e jeng como ko a vey na yɛ e Babilɔn.
6 E bama de Dariyus a basa bwok-basa mo,
a tomo a Tatɛnai,
gwɔmna bàk vwêl Rwa Ta Wo Gwɔrɔt Ɛifaratɛs,
na Shetar-Bozenai tanga besâ fwom mɛn toyo hemo ngan:
Ma sé yang in,
yin sǎ e jey yi e kwɔn hane!
7 Yin tɛ̀ nu min e ra hâ lɔk o wɛt.
Tík in gwɔmna bak vwêl Yuda,
yɛ na bemât nuyêl BeYuda be to lɔk Gbɔng Duk Re Fongol wo Dagwi e kwɔn de wá kana sɛ̀ ɛ raane.
8 Ma sé nɔng in nu,
yin sɛlɛ hɛn na yɛn a to lɔk wɛ.
Yin a rɔda talsa dyâm fwom o dey-dey yi e dyâm gwɔ̀m de yin e seres e bak vwêl Rwa Ta Wo Gwɔrɔt Ɛifaratɛs.
Yin tik pyɛ cak ye dul rê nuyêl fwom o wɛt.
9 Kahɛ tuk,
a sé gbing-gbing,
yin a nɔngɔ̂s bepiris e Yɛrusalɛm kayɛ pyɛ de yɛn a yang in,
yɛn e simo yaga nása nenɔrɔ vɔk na Dagwi wo lagwi.
Nɔngɔs hin hɛn bebôt bemus na beturuk tanga byôt tyīmit,
mwa na alkama,
na nevwashe,
na nshî anap tanga něy pwat.
10 Yin a rɔda ragas ano,
yaga na yɛn a bin tɔk nása nenɔrɔ de na sé pyɛ sey na Dagwi wo lagwi,
na yɛn a ragas won,
yaga na a tɛ̀ nerat mɛ e ra me tanga nèy hom.
11 Ma to gwɛ̌ nɔng in nu,
ka sede mwat hwak a kyɛ́ ɛ nà gyeng redu remo,
ko tik na be wɔ̀ pat gwoswesêk cɔgɔt yi e duk mɛ,
be tsep nu mo hining myóm-myom na be luga hɛ e ra gwɛ.
Ko be gangas lɔ mo arɔng,
he tɛ́ ɛ gwɔ̂t fongol.
12 Tik na Dagwi de a kasa repomô Yɛrusalɛm,
na re sè kwɔn de bê re a yɛ fongol,
a wey na negwɔm kawɛ gbɔng gwɔ̀m,
kɛ kayɛ yerê bemat de ba kyɛ́ ɛn nà gyeng redu remo,
ko ba saa e de jamâ gwông wey na Gbɔng Duk Re Fongol o e negya.
E me Dariyus de ma nɔng redu remo.
Tik na be gyeng tyɛng pyɛ de ma ha e ji redu mo.
Ba tik Gbɔng Duk Re Fongol jaram yaga Dagwi
13 Ano kwong,
Tatɛnai,
gwɔmna na Shetar-Bozenai tanga besâ fwom mɛn ba ra tyɛng pyɛ de Da Vwel a nɔng nu e ra yɛ.
14 Ko bemât nuyêl BeYuda ba re nuyel naka na fwôm lɔk Gbɔng Duk o.
Hagai na Zɛkarya Ido,
bezarap Dagwi,
ba tɛ̀sɛ a yɛn gâp râ gwɛ.
Yɛn a yɛnɛ lɔk o,
sede remo de Dagwi a nɔng ɛn nu,
mwa tanga Sairus,
na Dariyus tanga Artasɛrsɛs,
Beda vwel Pɛrsya.
15 Yɛn a yɛnɛ lɔ̂k Gbɔng Duk o e tuk hê tat hê pwɛ̂l Adar e ji shey hê tyiimin hê negwɔm Da Vwel Dariyus.
16 BeIsrayɛl mwa,
yɛn bepiris na BeLevi tanga bwang bemat de ba ga kana toyo yi e de sesam ba tik Gbɔng Duk o jaram yaga Dagwi.
Yɛn a ra ano na yey pyɛng sizɔng.
17 E jeng nzem o,
yɛn a nára a Dagwi nɔrɔ̂ bemus naga (100),
beturuk naga beba (200),
na tyīmit naga benaas (400).
Ba to nára begam kuru na vɛ beba (12),
yaga nɔrɔ fûng banɛn,
gwining yaga kayɛ yerê BeIsrayɛl.
18 Yɛn a to yong bagyɛng bepiris na ve BeLevi yaga tom mɛn ve rê fongol detidetu e Yɛrusalɛm,
tyɛng na pyɛ́ de ba jɛk e ji Bwok-basâ Mose.
Nzem Gyilsît Nelɔ BeIsrayɛl
19 Bemat vemo de ba ga toyo yi e de sesam ba ra Nzem Gyilsit Nelɔ BeIsrayɛl e tuk hê kuru na hɛ naas hê pwɛ̂l mɛsɛng e shey het.
20 Mwa bepiris na BeLevi ba ga kana fung bato mɛn,
ko ba tɛ́ ɛn haalal.
BeLevi ba yɛt bebot vyêl nɔrɔ vɔk na Dagwi ye nzem o,
ba yɛt yê bemat mwa de ba ga kana toyo yi e de sesam,
na yê bepiris tanga myɛn arɔng.
21 Mwa BeIsrayɛl de ba ga toyo yi e sesam ba re banamâ vyēl o tanga mwa bemat vemo de ba ga hala sâp cī yê bemat de ba sé sangal e ji vwel o,
yɛn vemo de ba ga hwo re a Dagwi Darwey,
Dagwi wo BeIsrayɛl fongol.
22 Yɛn a ra Nzem Kpam-tuk Sana Géy-sing na yey pyɛng pɔlɔ taama.
Yɛn a vɔk yey pyɛng vit a yere mo,
yaga Dagwi Darwey a ga sege barê yêy Da Vwel wo Asirya vey na yɛn.
Yi ano,
a sɛlɛ hɛn e de lɔ̂k Gbɔng Duk Re Fongol wo Dagwî BeIsrayɛl.