BWOK-BASA GWO
NEBA
GWO
NEHA-RAANE
Sɔlɔmɔn a ra won netsitsɛng
1
Gbɔng Gwɔ̀m Sɔlɔmɔn Davit a tɛ̀ segwɔm mɛ se tumal gak,
Dagwi Darwey,
Dagwi mɛ á sè na yɛ,
ko a tɛ̀ ɛ a vɔk reto na nerey sizɔng.
2 Sɔlɔmɔn a yila mwa BeIsrayɛl,
bemât nuyel gu gu,
na vê naga naga,
na bemât shɔt,
tanga mwa bemât nuyel BeIsrayɛl yɛn bedanelɔ.
3 Ko Sɔlɔmɔn na mwa regyɛng bemat o tanga yɛ,
ba wɔ́ e kwɔ̂n garang de há sè e Gibɛyɔn,
yaga bûk Dagwi de Mose mwât fwôm Dagwi á kana yong e hey gwa sè e hwomo.
4 Davit a ga kana vey na Kundung Wuna-na-Sirâ Dagwi yi e Kiriyat-Yɛyarim vey e kwɔn de a ga kana yong yaga gwɛ,
yaga a ga kana yong a gwɛ buk e Yɛrusalɛm.
5 Ano arɔng kwɔ̂n nárâ nɔrɔ̂ yas hê dyam pama de Bɛzalɛl Uri Hur a kana yong,
ha sé e hwomo e nuyêl bûk Dagwi Darwey.
Ko Sɔlɔmɔn na regyɛng bemat o mwa ba re a Dagwi Darwey fongol e hwomo.
6 Sɔlɔmɔn a tút vɔk e kwɔn nára nɔrɔ̂ yas hê dyam pama e nuyêl Dagwi Darwey e bûk Dagwi ko a nára nɔrɔ̂ yas de be rangas burang e ra kwɔn o.
7 E turuk hane Dagwi a dura tó mɛ na Sɔlɔmɔn a yang ɛ,
“Rangal pyɛ de hwó simo me nɔng o.”
8 Sɔlɔmɔn a toyo a yɛ,
a ye,
“Hwà ga dura a da hom gbɔng gwɔ̀m tɛ̂ yey mo,
ko hwà tɛ̀ me re negwɔm o e to mɛ,
9 À Dagwi Darwey,
Dagwi,
vonu de hwà ra a Davit da hom ha ga sila,
sede remo de hwà ga tɛ̀ me gbɔng gwɔ̀m e ra bemat de ba sé pyak sizɔng sede fongôl jey.
10 Ano nɔng me netsitsɛng na tɔ́k na me ra fwôm mwât nuyêl bemat vemo,
yaga yi e rɛ̌ de mwat ê tɔk kyè na nepyak bemat yerê bemo vemo ɛ?”
11 Dagwi a yang Sɔlɔmɔn,
a remo de pyɛ ma yemo de hwó simo,
ko hwà rangal nedanerey,
na yas,
na gbɔng reza,
na nekên vê repugu mo wɛt,
kɛ pɔlɔ lis,
ko hwà rangal netsitsɛng na tɔ́k na hwo re negwɔm e ra bemat hom de ma tɛ̀ hwo sè gbɔng gwɔ̀m mɛn.
12 Yaga ano,
mê nɔng o netsitsɛng,
na tɔ́k.
Mê to nɔng o nedanerey,
na yas,
na gbɔng reza yerê remo de gbɔng gwɔ̀m hwak a ga sang vɔk,
kɛ hwak ê sang vɔk e bama mo wɛt.
13 Ano Sɔlɔmɔn a hala kwɔ̂n rê fongol e Gibɛyɔn,
yi e bûk Dagwi,
vey e Yɛrusalɛm ko a re negwɔm e ra BeIsrayɛl.
Sɔlɔmɔn a tula bedwa na bekyɛkyɛ̂ bedwa
14-17 Sɔlɔmɔn á vɔk bekyɛkyɛ̂ como gu na naga benaas (1,400) tanga bedwâ suga gu kuru na vɛ baba (12,000).
A tik behak e Yɛrusalɛm,
ko a tik bwang o e bapomo bahak de ba yong ɛ.
E jeng negwɔm mɛ dyam pyɛng yá sè shɛrɛk e Yɛrusalɛm sede beta,
ko cɔ́gɔt sida ya sè pyak sede cɔ́gɔt bwagam e bak vwêl berahwol.
Bejik gbɔng gwɔ̀m bá yeles na bedwa na bekyɛkyɛ̂ como e bavwêl Misra tanga Kuwɛ.
Ba tala e kawɛ dwa shɛkɛl dyam pyɛng naga betyiimin (600) ko e kawɛ kyɛkyɛ shɛkɛl dyam pyɛng naga na kuru batungun (150).
Bejik o ba rɛsɛl a begwɔ̀m BeHiti na BeSurya bedwa tanga bekyɛkyɛ̂ como arɔng.