Gbɔng gwɔ̀m hwā a vêy rekyɛn
10
Gbɔng gwɔ̀m hwā wo sevwêl Sheba a wok reza de Sɔlɔmɔn a vɔk yaga Dagwi Darwey.
Yaga ano a vêy rekyɛn e Yɛrusalɛm,
yaga na a vey mara tɔ́k mɛ na nerangsal nemo de na sé gbang.
2 A vɔk ɛ bemât kyɔk mɛ pyak,
a to vɔk ɛ bemaryat de ba hashe a yɛ pyɛ́ tanga něy nesang nerat,
na dyam shinang pyak sizɔng,
tanga dyéngere ryat sizɔng.
Jeng de a man na Sɔlɔmɔn,
a rangal hɛ mwa nerangsal de a kana vɔk e yey mɛ.
3 Ko Sɔlɔmɔn a toyo a yɛ na neha e ra nerangsal o mwa;
vit a pyɛ de ya sè a yɛ gbang.
4 Gbɔng gwɔ̀m hwā wo Sheba a wok yerê netsitsɛ̂ng Sɔlɔmɔn,
a bɛrɛng yerê lɔk de ba lɔk lɔ gwɔ̀m o,
5 na yerê pyɛ̂ re de ba tik a yɛ.
A to bɛrɛng bemât badu mɛ na yerê sangal mɛn e tebut,
na bemât fwôm de ba nɔngɔs pyɛ̂ re na pyɛ̂ sɔ mɛ tanga yerê berugû fwom de ba tɛ̀sɛ,
tanga yerê nenɔrɔ de Sɔlɔmɔn a nása e Gbɔng Duk Re Fongol.
Pyɛ́ mo mwa ya tɛ̀ ɛ,
a bidɛ pyɛ de a rɔda ha,
sɛ̌ a langat hɛ zɔng.
6 A yang Sɔlɔmɔn,
“Pyɛ de ma wok e sevwel hom e ra hwo na netsitsɛng mō ya sé tsak o!
7 Ko ma tɔk sey tsak o na yɛ wɛt,
sɛ̌ jeng de ma vey di yɛ na bayis hom.
Ko sɛ̌ ma kana ka wok rebit pyɛ́ mo wɛt.
Netsitsɛng tanga nedanerey mō na dal pyɛ de ba kana ha a me.
8 Vê wɛng a beha mōa tanga bemât badu mō!
Yɛn a sé na hwo kayɛ jeng,
ko be wokos yerê neha netsitsɛng mō.
9 Bē somo Dagwi Darwey,
Dagwi mō!
Yaga yey mɛ ya pɛngɛ na hwo,
ko a tɛ̀ o,
hwo sè gbɔng gwɔ̀m BeIsrayɛl.
Tɛ̂ yey mɛ e ra BeIsrayɛl ha sé sana yɛnɛ;
yaga ano,
a tɛ̀ o,
hwo sè gbɔng gwɔ̀m mɛn.
A kasa hwo,
na hwo yɛt a kawɛ mwat shɔt e tē.”
10-13 A nɔ̂ng Gbɔng Gwɔ̀m Sɔlɔmɔn nɔrɔ̂ pyɛ́ detidetu de a vey mɛ.
A nɔng ɛ dyam shinang de ya dal kilo gu banaas (4,000),
na pyɛ́ tanga něy nesang nerat,
tanga dyéngere ryat sizɔng.
Pyɛ́ tanga něy nesang nerat o ya sé pyak sedesi,
ya dal yemo de ba ga sang vey mɛ e Yɛrusalɛm.
Gbɔng Gwɔ̀m Sɔlɔmɔn a nɔ̂ng gbɔng gwɔ̀m hwā wo Sheba mo kayɛ pyɛ de a simo.
A wuna ɛ yerê nenɔrɔ de ba ga tɔ́k ɛn be nɔngɔs shɛrɛk.
Bama mo yɛ tanga bemat mɛ ba toyo vɔk e Sheba e sevwel mɛ.
Bedwa-nshi vê Hiram vemo de ba kana vey na dyam shinang yi e Ofir,
ba vey na cɔ́gɔt almuk pyak sedesi tanga dyéngere ryat.
Cɔ́gɔt á yane de Sɔlɔmɔn a tsep,
a tɔrɔ mɛ Gbɔng Duk Re Fongol tanga lɔ gbɔng gwɔ̀m.
A to yong mɛ yōm detidetu de be ra mɛ lwɛlɛ e duk rê fongol.
Ba ga sang di nepyak yerê cɔ́gɔt yemo wɛt pere vey e yunung e Yɛrusalɛm.
Nedanerey Gbɔng Gwɔ̀m Sɔlɔmɔn
14 Kahɛ shey Gbɔng Gwɔ̀m Sɔlɔmɔn a sɛsɛm dyam shinang de ya dal kilo gu kuru baba (20,000).
15 A to gwɛ̌ sɛsɛm ɛ dyām de ba talsa hɛ de a tɛ̀sɛ a bemât nejik,
na bemât tom vwɔ,
na yemo de a tɛ̀sɛ a begbɔng begwɔ̀m BeArap,
tanga begwɔmna bak vwêl Israyɛl.
16 Sɔlɔmɔn a tɛ̀ be turu begbɔng beruga naga beba,
ba turu kawɛ mo na dyam shinang de nedirik o na wul kilo betaama.
17 A to tɛ̀ be turu beruga mo behak besɛl o naga betat,
ba turu kawɛ mo na dyam shinang de nedirik o na wul bagat kilo beba.
A wɔ tik mwa beruga vane mo e Gwofwam Rehwôt Lɛbanɔn.
18 Ba yong a yɛ gwofwa negwɔm mɛ gwogbɔng o.
Ba tɔrɔ gwɛ na yìn gbin,
ko ba dak gwɛ na celes dyam shinang.
19 Gwofwa negwɔm gwa vɔk nekwɔn turus ɛ netyiimin.
Ko bak bama mo wa sé kurung vɔk e rak o.
Ba tɛ̀ kwɔ̂n tikis vɔ tas e kahɛ hagat,
ko ba yong ɛ begukum beba,
ba tɛ̀ gwining e kahɛ hagat o.
20 Ba to yong begukum kuru na vɛ beba,
na be tumal,
gwining e ra kwɔn tút e kahɛ hagat,
yaga ano ba sé betyiimin e kahɛ hagat o.
Ba ga sang yong a gbɔng gwɔ̀m hwak gwofwa negwɔm yerê gwane wɛt.
21 Ba yong neshǐ sɔ̂ lɔ Sɔlɔmɔn na dyam shinang,
ba to yong pyɛ̂ fwom yê Gwofwam Rehwôt Lɛbanɔn na celes dyam shinang.
Ba ka ra fwom na dyam pyɛng wɛt,
yaga e jeng Gbɔng Gwɔ̀m Sɔlɔmɔn,
dyam pyɛng yá sè pyɛ cak wɛt.
22 A vɔk begbɔng bedwa-nshi de ba kyese wɔ hashe a yɛ pyɛ́ detidetu tanga vê Hiram.
Ba vɛ̀sɛ a yɛ na dyam shinang,
na dyam pyɛng,
na yìn gbin tanga bekát na bebogom e kahihɛ shey tat.
23 Gbɔng Gwɔ̀m Sɔlɔmɔn á sè gbɔng darwey,
á to vɔk netsitsɛng,
a dal mɛ kawɛ gbɔng gwɔ̀m e jey mwa.
24 Ko bemat yi e jey mwa ba vɛ̀sɛ wokos netsitsɛng de Dagwi a nɔng ɛ.
25 Kawɛ mwat de a vey,
a vɔk a yɛ nɔrɔ̂ pyɛ́ sede dyam shinang na dyam pyɛng,
na berugu,
na pyɛ̂ como,
na pyɛ̂ nesang hyɔɔlɔl,
na bedwa,
tanga bedwa-madung.
Ba re nuyel na ra ano kahɛ shey.
26 Sɔlɔmɔn á vɔk bekyɛkyɛ̂ como gu rining na naga benaas (1,400) tanga bedwâ suga gu kuru na vɛ baba (12,000).
A tik behak e Yɛrusalɛm,
ko a tik bwang o e bapomo bahak de ba yong ɛ.
27 E jeng negwɔm mɛ dyam pyɛng yá sè shɛrɛk e Yɛrusalɛm sede beta,
ko cɔ́gɔt sida ya sè pyak sede cɔ́gɔt bwagam e bak vwêl berahwol.
28-29 Bejik gbɔng gwɔ̀m bá yeles na bedwa na bekyɛkyɛ̂ como e bavwêl Misra tanga Kuwɛ.
Ba tala e kawɛ dwa shɛkɛl dyam pyɛng naga betyiimin (600) ko e kawɛ kyɛkyɛ shɛkɛl dyam pyɛng naga na kuru batungun (150).
Bejik o ba rɛsɛl a begwɔ̀m BeHiti na BeSurya bedwa tanga bekyɛkyɛ̂ como arɔng.