2-4 A sé gbing-gbing,

gbik o a tala pyɛ de a shigi mo.

Ka sede a vɔk pyɛ tala mo wɛt,

bē row ɛ,

na be tala mɛ.

Ka sede ba sɛ̀ yas o na yɛ,

ko ya rɔngɔl cen,

kɛ a sé rɔndɔng,

kɛ vyel,

kɛ madung ayi,

a tala yɛ zang ba.

Sede nabwalak ba sɛ̀ gbik a sé simo yel,

na a shigi e ji lɔ,

ba dak ɛ,

ba mɔrɔ,

ko nemi mɛ nê sǎ e ra mwat hwak wɛt.

Ko ka sede ba mɔrɔ gbik o e jeng de gwi gwa ga kana nusu,

ko nemi mɛ nê raa womo de a mɔrɔ hɛ.

5 Ka mwat a sé gyeng yas mɛ e hey,

ko a hàla yɛ,

ya re pyɛ́ e hwiri kɛ bwî anap mwat hwak,

bē tɛ̀ dâ yas o a tala dâ hwiri kɛ bwî anap o yi e pyɛ́ mo myɛ yê hwiri kɛ bwî anap mɛ.

6 Ka sede mwat a dak kya e hwiri mɛ,

ko kya mo ha hywit ɛ,

ha hwo re rɔgɔ,

yi e hwomo he shara hɛ vɔk e pyɛ̂ hwirî mwat hwak de ba ga bang ye kwonot o,

kɛ pyɛ́ de ba rɔngɔl nà yɛt,

ko mwat de a dak kya mo,

a tala pyɛ́ de kya ha re mo.

7 Ka sede mwat a nɔ̂ng mwat hwak dyām kɛ pyɛ́ cak,

na a tik a yɛ,

ko ba shigi yɛ̄ e lɔ mo,

ka ba sɛ̀ gbik o,

ko gbik o a tala pyɛ́ mo zang ba.

8 Ko ka ba sɛ̀ gbik o wɛt,

bē wɔ́ na dalɔ mo e kwɔ̂n re a Dagwi fongol,

na yɛ a sira hɛ,

wɔgɔ,

vwɔ mɛ gwa sé e ji shigî pyɛ́ mo wɛt.

9 Kayɛ jeng de cuna ya yel e tê bemat behak e ra pyɛ cak,

kɛ a sé rɔndɔng,

kɛ madung,

kɛ vyel,

kɛ gworugu,

kɛ kayɛ pyɛ de ya vuru hɛ,

ko bē wɔ́ na yɛn e kwɔ̂n re a Dagwi fongol.

Wane de Dagwi a dura a vɔk renɛn,

ko bē tɛ̀ ɛ,

a tala mumwɛ zang ba.

10 Ka sede mwat a nɔ̂ng mwat hwak madung,

kɛ rɔndɔng,

kɛ vyel,

kɛ kayɛ yerê yas,

na a bang a yɛ,

ko ya ku,

kɛ ya mǎ yɛ,

kɛ ba wɔ̂ kyɛrɛ hɛ,

ko vit a mwât nuha,

11 mwât bang o a wɔ e kwɔ̂n re a Dagwi fongol,

na a sira hɛ,

vwɔ mɛ gwa sé e ji pyɛ̂ mwat o wɛt.

A sé gbing-gbing na dâ pyɛ́ mo a simo na sira mo,

ko yɛ dâ bang o a tala pyɛ wɛt.

12 Ko ka ba shigi yas o yi na yɛ,

a tala da mo.

13 Ko ka sede a sé e ngyāma de ya hama yɛ,

dâ bang o a wɔ̀ dura a da mo yɛ,

yaga nuha.

Ba rɔda tala pyɛ de ngyāma ya mɔrɔ wɛt.

14 Ka sede mwat a hwɔp yas cak ye mwat hwak,

ko yas o ya sɛ̀ ram,

kɛ ya ku ayi,

ko da mo a sé e kwɔn o wɛt,

mwât hwɔp o a tala yas o.

15 Ko ka sede da mo a sé e kwɔn o,

mwât hwɔp o a tala pyɛ wɛt.

Ko ka sede mwat a tala dyām,

na a ra fwom na yas,

ko yas o ya sɛ̀ ram kɛ ya ku,

dyām de a tala mo yê sè e tô yas o.

16 Ka sede mwat a mɛlɛm hwong de be hwono hɛ wɛt,

ko a dyɛng na yɛ,

a tala yas mɛ,

na a tɛ́ ɛ hwā mɛ.

17 Ko ka sede da mo a kyɛ́ ɛ nà nɔng ɛ hwóng mɛ,

ko mwat o a tala dyām tyɛng na pyɛ de be nɔngɔs yaga hwong.

18 Hwo tik hwâ ragas vyoshon a nàra kwen wɛt.

19 Mwa mwat de a dyɛng na ngyama,

bē mɔrɔ hɛ.

20 Kawɛ mwat de a nára nɔrɔ̂ yas vɔk na dagwi hwak de a sé Dagwi Darwey wɛt,

bē wey na yɛ.

21 Yin tak a mwat duk,

kɛ yin midra hɛ wɛt,

yaga yin á kana sè bemat beduk e sevwêl Misra arɔng.

22 Yin mɔt kuma kɛ hyɛn wɛt.

23 Ka sede yin a ra ano,

ko yɛn a vey na sekun mɛn na me,

me,

Dagwi Darwey,

mê sey kun mɛn.

24 Ko shom hom yê hwo e ra yin,

mê tɛ̀ be wey na yin e como,

ko beha min bê tɛ́ ɛn bekuma,

nèy min arɔng nê tɛ́ ɛn nehyɛn.

25 Ka sede hwà hwɔp a hwak e ji bemat hom dyām,

womo de a sé pwɛng,

hwo ra sede bemât hwɔpɔ̂ ndi wɛt,

hwo sey ndi yi na yɛ wɛt.

26 Ka sede hwà sey ɛ gworugû mwat hwak e tô pyɛ de hwà row a yɛ,

ko hwo toyo a yɛ na gwɛ gyam gwi gwo gaba.

27 Yaga gworugu mo gwɛ a pyɛ banga mɛ gwining zɔng.

Ka vit a gwɛ,

ko ê bang ɛ na sɛ́ nabwalak ɛ?

Yaga ano,

ka a vey na sekun mɛ na me,

ko mê sey kun mɛ,

yaga ma sé wo toshô reyɔm.

28 Yin ha há ves e ra Dagwi,

kɛ yin mok gawey e ra mwât nuyel min hwak wɛt.

29 Yin ro na pyɔlɔ̂ pyɛ̂ hiri min yê yéneng,

na yê nshî anap tanga yê něy na me wɛt.^a

Nɔng me hin nèy negel min bewen o arɔng.

30 Ano arɔng,

nɔng me hin nèy berɔndɔng na ne vyēl min ne tɔ̂ mɛsɛng o.

Nèy o,

bemus na begam,

ne sangal na benêng nɛ pɔlɔ taama,

ko e tuk hê rwit yin nára a me nɛ.

31 Yin a sé bemat hom de ba ga tik vɛ detu yaga me.

Yaga ano,

yin re namâ yas de ngyāma ya mɔrɔ wɛt,

ko yin bomo a bevu hɛ.