Badu e ra besam beras BeIbrani
21
Badu ma vemo de hwà rɔda nɔ̂ng BeIsrayɛl:
2 Ka sede hwà sey sam WoIbrani,
a rɔda ra sesam neshey netyiimin,
ko e shey hê taama bê hàla hɛ washak,
vit à tala.
3-4 Ka sede a kana ra weneng gyam a tɛ́ ɛ sam,
ko hwā mɛ a rɔda kyè tanga yɛ.
Ka sede a kana vey hwɔrɔs,
ko dalɔ mɛ a de ra a yɛ weneng,
hwā mo a tɔs a yɛ nèy bewen kɛ behwong,
hwā mo tanga nèy o ba sé vê dalɔ mɛ,
ko yɛ ê kyè nju mɛ.
5 Ko ka sede sam o a nusu wɛshɛrɛk,
na a ye,
“Ma tɛ̀ yey na dalɔ hom,
na hwā hom tanga nèy hom,
me simo na me sè washak wɛt”,
6 ko dalɔ mɛ a rɔda wɔ na yɛ e kwɔ̂n re a Dagwi fongol.
E hwomo,
a rɔda tɛ̀ ɛ,
a tumal bagat na rwi duk kɛ jwâ rwi duk,
ko dalɔ mɛ a rɔda boro fwong mɛ na kwet.
Ano kwong,
a rɔda nàra sam dalɔ mɛ vɔk e neyɛnɛ neshey mɛ e jey.
Badu e ra besam beha BeIbrani
7 Ka sede mwat a row hwóng mɛ sede sam,
ba rɔda hàla hɛ washak e shey hê taama sede sam rwas wɛt.
8 Ka sede dalɔ de a sey ɛ á kana simo,
na a tɛ́ ɛ hwā mɛ,
ko a de jut a yɛ e yey wɛt,
a tik belɔ mɛ be to sey ɛ.
Vit à hɛ nà gwong,
na a row ɛ na kwɛnɛt,
yaga a ga ra a yɛ naka wɛt.
9 Ka sede a simo,
na a tɛ́ ɛ hwâ sɔ mɛ,
ko tik na a ra a yɛ tyɛng sede hwóng mɛ.
10 Ko ka sede yɛ pyɛ mɛ a ra weneng na yɛ,
ko e bama mo a vo hwā mo hwak,
a kwon ro sam o na pyɛ̂ re kɛ berugu wɛt,
a to tik dyɛngɛs na yɛ arɔng wɛt.
11 Ka a sila a yɛ pyɛ́ tyat yemo wɛt,
ko yɛ a tik ɛ washak,
vit a sey ɛ̀ dyām.
Badu e ra pyɛ́ vyes de yê tɛ̀, be mɔrɔ mwat
12 Kawɛ de a rusu mwat,
na a mɔrɔ hɛ,
ko bē mɔrɔ hɛ arɔng.
13 Ka sede a ra na negaren wɛt,
pyɛ mo ya vey e ra gawey zɔng,
ko tik na yɛ a tele wɔ̀ dal e kwɔn de Dagwi Darwey a rɔda kasa a yin.
14 Ko ka sede mwat a yong ɛ,
na a mɔrɔ mumwɛ na negaren,
bē jut ɛ,
bē mɔrɔ hɛ arɔng,
mwa ano de a ga kana tele vɔk e kwɔ̂n de be re a Dagwi ɛ fongol,
na a kaba gàgbang rangâs yas o.
15 Mwat winde a rusu dá mɛ kɛ neng mɛ,
bē mɔrɔ hɛ.
16 Mwat de a shigi mwat,
kɛ a ga kana row ɛ,
kɛ a ka sé rɔɔ vɔk ɛ jeng de ba vo ɛ,
bē mɔrɔ hɛ.
17 Mwat de a mok a da mɛ kɛ neng mɛ gawey,
bē mɔrɔ hɛ.
Badu e ra mâ mwat
18 Ka sede bemat beba ba sé ra yol,
ko gwining a toro mumwɛ na fwà,
kɛ a gunung vwɔ a rusu hɛ mɛ,
ko mwat o a ku wɛt,
a nàra e dyɛngɛ,
19 e bama mo a to sogo,
a hwo kyè e tē yɛndɛng na gwele mɛ,
yɛ mwat de a rusu hɛ mo ba rɔda hàla hɛ washak,
ko a tala pyɛ yaga jeng de a ga lashe a yɛ,
ko a to tala yaga pege mɛ sɛ̌ a tɛ̀ tyang.
20 Ka sede mwat a dak sam mɛ,
rwas o kɛ hwā mo,
na gwele,
a pere ku,
ko bē tabak hɛ.
21 Ko ka sede sam o a wul pɔlɔ hining kɛ ba gbak,
ba rɔda ra a dalɔ mo shɔt wɛt,
yaga sam o a sé pyɛ nedanelɔ mɛ.
22 Ka sede bemat ba sé ra yol,
ko hwak a mǎ hwā de a vɔk jim,
ko jim o ya pere nusu hɛ,
ko yɛ hwā mo a mǎ hɛ wɛt,
bē tɛ̀ mwat wane de a mǎ hwā mo,
a tala pyɛ de rwâs hwā mo a tɛ̀,
ka sede ya sé tyɛng na pyɛ de shɔt ya ye.
23 Ko ka sede hwā mo a to sɛ̀ ram hak detu,
shɔt o yê kwey e begwong vemo ngan:
neken e tô neken,
24 yis e tô yis,
hwin e tô hwin,
vwɔ e tô vwɔ,
bwol e tô bwol,
25 râm kya e tô râm kya,
rām e tô rām,
zére e tô zére.
26 Ka sede mwat a rusu yîs sam mɛ,
rwas o kɛ hwā mo ayi,
ko yis o ha pere lashe hɛ,
a rɔda hàla hɛ washak,
yaga yis de a ga bidɛ.
27 Ka sede a pat hwîn sam mɛ,
rwas o kɛ hwā mo,
a rɔda hàla hɛ washak,
yaga hwin de a ga bidɛ.
28 Ka sede mus wa luga rwas kɛ hwā,
wa mɔrɔ,
bē tów wɛ na beta,
sɛ̌ wa ku,
ko be re banamâ wɛ wɛt,
ko dâ rɔndɔng o,
ba rɔda tabak hɛ wɛt.
29 Ko ka sede ba kana tɔk mus o na yol,
ko da mo a ra a ka gyeng wɛ wɛt,
mwa ano de ba ga ha na yɛ,
mus o wa vɛ̌ luga rwas kɛ hwā,
wa mɔrɔ,
ko bē tów wɛ na beta sɛ̌ wa ku,
ko da mo,
bē mɔrɔ hɛ arɔng.
30 Ko ka ba tɛ̀ a yɛ pyɛ de ê viri hɛ mɛ,
a tala mwa pyɛ de ba yɛrɛ a yɛ,
yaga na a viri mɛ neken mɛ.
31 Ano arɔng,
ka sede mus o wa luga hwêy wen kɛ hwông mwat hwak,
wa mɔrɔ,
ko bē ra a da mo tyɛng na redu remo.
32 Ko ka sede mus o wa luga sam,
rwas o kɛ hwā mo,
wa mɔrɔ,
da mo a tala dâ sam o dyām shɛkɛla kuru batat,
bē tów mus o na beta sɛ̌ wa ku.
Lashê yas mwat hwak
33 Ka sede mwat a tik revɔng pyot,
kɛ a cing rɛ,
a tik rɛ nà bang,
ko rɔndɔng kɛ madung wa gaba e ji mo,
wa ku,
34 dâ revɔng o a tala dâ yas o dyām,
ko yɛ a vɔk revin o.