E Paulus i Lakea o Masedonia o Akaia
20
Na tahuna a rongova i lobo,
e Paulus i rudu a ngava lakea ne huriki a murimuri ri gi valai vona.
I vakatora ria na ngava,
muri i tarulu puru ria,
i vano i lakea na tabeke ne Masedonia.
2 I laho polo vona a robo iea,
i vakatora e huriki na ngava.
Muri i bele na tabeke ne Gris,
3 i made vonga na keva i tolu.
Muri,
na tahuna ta ge rike na aga,
ge lakea o Siria,
i longo e huriki a Iuda ranga ri gi rabalakia na dala,
lakea i puru na aga,
i laho polo tabu na robo e Masedonia,
i vano i bele o Siria.
4 E huriki a bakovi ri vano turana ra nga:
e Sopater,
e tune Pirus na tanga dagi e Berea;
e Aristakus rua e Sekundus na tanga dagi e Tesalonika;
e Gaius na tanga e Derbe;
e Tikikus rua e Tropimus na robo e Asia;
e Timoti.
5 Re huriki a bakovi nga ri muga,
ri dava mateu na tanga e Troas.
6 Pali mateu,
mete rata taro a habu na Bret i Uka Is.
Muri mete rike na aga vonga na tanga e Pilipai mete vano.
I lobo a parava i lima mete pakarau ria o Troas,
lakea mi made vonga na parava i polorua.
E Paulus i Vakamahuri e Iutikus
7 Na mugana parava na vik mi vapopo,
mi kani palupu a bret.
Muri e Paulus i vara e huriki.
I ta polopolo,
i harena na kuru rodo,
a vuhuna kuduvi bara i pe ria.
8 A ruma iea,
a ruma dagi.
A tabekena i tolu.
A tabekena tara i polotano,
a tabekena tara i polomeli.
A tabekena tara i polomeli liu.
Mia lobo mi vapopo na tabeke polomeli liu,
i kupo a maka lam ri para.
9 E Paulus i ta lokovonga liu,
lakea a riau tara,
a rana e Iutikus,
i marore.
I made langa langa na matatala,
lakea na tahuna i marore,
i boru tala,
i boru puru na malala.
Ri puru mai ia,
ri pulo lae ia,
pali ri masia i mate pali.
10 Pali e Paulus i puru lakea,
i pasike puru maia,
i nugua,
i ta maea,
“Naha ni luhoi lege,
i uka ma i mate.”
A riau iea i mahuri mule ngane,
11 muri e Paulus,
e huriki nga ri hamule sike tabu.
I kevea a bret,
ri kani.
Muri i ta tabu,
i harena na hini malaharere,
muri i vano.
12 A riau iea i mahuri,
ri tulia i lakea na tanga.
A niluhoi ne ria i kamumu hateka.
13 Mi rike na aga,
mi muga lakea o Asos,
mi gi davea vonga e Paulus,
a vuhuna i ngaru ni laho na dala.
E Paulus i taki ge rike na aga turane mia o Asos.
14 Na tahuna i pakarau mia vonga,
mi vakarikea na aga,
mi lakea o Mitilini.
15 Muri mi malaga vonga,
mi vore na parava i taku,
mi bele tabukoi na bodu e Kios.
Na parava muri tabu mi bele o Samos.
Na parava muri tabu mi bele o Miletus.
16 I uka ma mi dili o Epesus,
a vuhuna e Paulus i uka ma i ngaru ni made o Asia.
I ngaru ni bele malaviriri o Ierusalem muga na parava na Pentekos.
E Paulus i Tarulu e Huriki a Epesus
17 *Na tahuna mi bele o Miletus,
e Paulus i talo rike a ngava ne huriki a gare na tara ne Kristo o Epesus ri gi valai,
ri gi masia.
18 *Na tahuna ri bele,
i taki ria,
i ta maea,
“Mu lohoka vona a vilogu na tahuna a made turane mua,
i vakatubu na tahuna a bele karaba na tabeke ne Asia.
19 E huriki a Iuda ri ngaru ni rata hale iau.
Ri rata iau a dodo,
a tangi balaka kupo.
Pali i uka ma a vakadagia a ragu.
A leho kunana ne Bakovi Dagi.
20 Mu lohoka vona i uka ma a mangenge.
A vara pagapaga kunana mua,
i uka ma ruhuloloa tara ngava ge tuhori mua.
A vara mua na matane huriki lobo,
a vara mua na ruma takutaku ne mua.
21 A taki tora e huriki a Iuda,
e huriki a Grik,
ri gi pulo a vilone ria,
ri gi ramaia a Vure,
ri gi luhoi torea a Bakovi Dagi ne hita,
e Isu Kristo.
22 “Pali ngane a Hanu Kiripiripi i taki tora iau ga lakea o Ierusalem.
I uka ma a lohoka vona a ra maki ge bele nau vonga.
23 *A lohoka kunana na tanga lobo a lakea vona a Hanu Kiripiripi i taki iau vona ga bole a nimadihi,
ga dili na bavi.
24 *Iau i uka ma a luhoia a nimadegu ga maki dagi.
A ngaru kunana ga vakalobo kamumu taroa a leho e Isu a Bakovi Dagi i habia nau ga ratea:
Ga vakalongo ne huriki a Velenga Kamumu na naro kamumu na Vure.
25 A laho turane mua,
a vara mua na harikianga na Vure.
Pali ngane i uka ma mu gu matai tabu iau.
26 Ngane a taki muholi mua na parava mona:
e rei tara ne mua ge velu,
iau a uka ngava vona,
27 a vuhuna a taki lobo mua vona pali a ngava lobo a Vure i ngaru mu gu lohoka vona.
28 *Mu matakari kamumu mua turane huriki a kabukabu.
A Hanu Kiripiripi i habi ria na limane mua,
ge mua a matakari ne ria.
Mu leho manga a matakari na tara na Vure,
a Vure i konamule ria pali na darane Tuna.
29 *Iau a lohoka vona,
muri ne iau ga vano,
e huriki a bakovi hale bara ri valai ne mua,
ri tami mua,
bara ri toni ni ratapile a niluhoi ne mua,
i manga a kaugara i ratapile a kabuna sipsip.
30 I ranga ne mua bara ri pesi rike,
bara ri pulo a nita muholi,
ri tovo e huriki na ngava taminga.
Ri ngaru e huriki a murimuri ri gi ramai ria kunana.
31 *I mavonga,
mu mata doko!
Naha ni longo kaburungi vona a maki a rata.
A vara mua na pida i tolu.
A vara mua na haro,
na rodo.
Na tahuna a tovo mua i masiri pasi na matagu a luha.
32 “Ngane a habi mua na limana Vure.
A ngaru mu gu luhoi vakaroro a ngava na naro kamumu na Vure.
A naro kamumu iea bara i vakatora mua,
i habi mua a maki lobo a Vure i ta muholi vona ge habi ne huriki a tara vona.
33 *Na tahuna iau a made turane mua,
i uka ma a ngutu vona a silva ne mua,
a gol,
a varakia ne mua.
34 *Mu lohoka vona iau a leho,
a matakari mule iau turane huriki ri laho turagu.
35 A vakasiri mua na narogu,
si gi leho,
si gi kori e huriki a matasia.
Si gi luhoi vakaroro a nitane Isu a Bakovi Dagi,
i ta maea,
‘A nivivi na viri i habi a maki,
i rangi a nivivi na viri i bole a maki.’ ”