4 Lakea e Petrus i tuveve polo ne ria a maki lobo i bele vona,

i ta maea,

5 ^*“Na parava tara a vasileki na tanga dagi e Iopa,

lakea a vurena.

A masia tara maki i manga a lavalava bolabola ni nugu na tabekena i va,

ni vakatavore na hunu,

i puru valai na hini a made vona.

6 A matanonoa,

a matai pololilo a maka maki a vinara i taki i uka ma si gi kani:

a maka maki mahuri na robo,

a maki ni matakari,

a maka mata,

a maka kadirovo.

7 Muri a longoa a lohona viri i taki iau,

i ta maea,

‘Petrus,

o pesi rike,

o rabalaki,

o kani.’

8 “Lakea a koli,

a ta maea,

‘Bakovi Dagi,

i uka liu!

Iau,

i uka ma i dili ma na ngavagu tara maki katoki.’

9 “Lakea a lohona viri i ta valai tabu na hunu,

i ta maea,

‘A ra maki a Vure i ratea i kabakaba,

naha ni takia ta i muto.’

10 A maki iea i bele balaka tolu.

Muri ni lalu rike tabu na hunu a lavalava bolabola.

11 “I uka ma i tabaka a bakovi ala tolu to bele.

A bakovi nga,

ni rudu o Sisaria to go matai iau.

12 A Hanu Kiripiripi i taki iau nahea ga loho vagorigori,

ga vano kunana turane tou.

A murimuri ala polotara nga,

ria ranga ri vano turagu,

mi dili na ruma na bakovi iea.

13 I vakalongo mia vona a agelo na Vure i bele vona na ruma,

i takia,

‘O rudu ranga viri ri gi lakea o Iopa,

ri gi matakanea e Simon,

a rana tara e Petrus,

ri gi takia ge valai.

14 ^*Bara i takia vomu tara ngava ge korimule ioe turana kabu vomu.’

15 ^*“Na tahuna a vakatubu ni ta,

a Hanu Kiripiripi i dili ne ria.

I manga a hini i dili ne hita muga.

16 ^*Muri a longovisia a ngavane Bakovi Dagi i takia,

‘E Ioanes i vahilolo e huriki na naru,

pali iau bara vahilolo mua na Hanu Kiripiripi.’

17 Hosi si luhoi torea e Isu Kristo a Bakovi Dagi,

lakea a Vure i habi a Hanu Kiripiripi ne hita.

Pali ria ngane ri luhoi torea e Isu,

a Vure i habia a Hanu Kiripiripi ne ria.

Pali iau e rei iau,

ga hatekakaria a Vure nahea ge habi a Hanu Kiripiripi ne ria?”

18 ^*Na tahuna ri longoa a nitana,

ri uka ngava,

lakea ri kavurikea a Vure,

ri ta maea,

“Ngane si lohoka vona e huriki a bakovi i uka ma ria a Iuda,

ria ranga a Vure i ngaru ria ri gi pulo a vilone ria,

ri gi bole a nimahuri vakaroro.”

19 ^*Na tahuna e Stepan ni rabalaki,

ni rata hale e huriki ri luhoi torea e Isu.

Lakea ri ha viliha,

ri lakea o Ponesia,

o Saiprus,

o Antiok.

Na tahuna ri made na tanga nga ri vakalongo a Velenga Kamumu ne huriki a Iuda kunana.

20 Pali e huriki a bakovi ranga,

a bakovi o Saiprus,

a bakovi o Sirene,

ri luve o Antiok,

ri vakatubu ni vakalongo a Velenga Kamumu ne Isu Kristo ne huriki na tanga iea,

i uka ma ria a Iuda.

21 A nitora ne Bakovi Dagi i tabuli ne ria,

lakea e huriki ala kupo ri luhoi torea e Bakovi Dagi,

ri pulo a vilone ria.

22 ^*A velengane ria i bele ne huriki a tara ne Kristo o Ierusalem,

lakea ri rudua e Barnabas i lakea o Antiok.

23 Na tahuna i bele,

i vivi,

a vuhuna i matai a Vure i rata kamumu ria.

I vara ria ri gi habi a hatene ria ni ramai e Bakovi Dagi,

ri gi pesi tora.

24 I rata mavonga a vuhuna ia a bakovi kamumu,

i luhoi tora hatekea a Vure,

a Hanu Kiripiripi i leho tora turana.

I kori e huriki ala kupo vonga ri dili na tara ne Bakovi Dagi.

25 ^*Muri e Barnabas i lakea o Tarsus ge matakanea e Saulus.

26 Na tahuna i matavisia i turea,

ru lakea o Antiok.

Ru made vonga na pida i taku,

ru tovo e huriki ala kupo.

I vonga o Antiok e huriki a murimuri ni gale visi ria a Kristian.

27 Na tahuna iea,

a propet ranga ri pe e Ierusalem,

ri puru valai o Antiok.

28 ^*A turane ria tara,

a rana e Agabus,

i dili vona a Hanu Kiripiripi,

i pesi rike,

i ta propet vona a pago dagi ta ge bele na tabeke lobo e Rom i matakari.

A pago iea i bele na tahuna a hariki e Klaudius i matakari o Rom.

29 E huriki a murimuri ri longoa a ngava ne Agabus,

lakea ri varodo a ngava ri gi ru palupu a moni,

na ningaru ne ria takutaku,

ri gi vakaru a kinori lakea ne huriki a kabu o Iudea.

30 ^*Ri rata mavonga,

lakea ri rudu e Barnabas e Saulus ru bole a moni,

ru vano ru habi ne huriki a bakovi dagi na lotu o Iudea.