A Agelo i Bele ne Kornelius
10
A bakovi tara i made na tanga dagi e Sisaria,
a rana e Kornelius.
Ia a ubu na nugumaheto ala 100 ne Rom.
E Kornelius a turane huriki a nugumaheto ni gale a tara na Itali.
2 E Kornelius turane huriki a kabu vona ri togoa a Vure.
I hatebalala,
i kori vakaroro e huriki a matasia,
i vasileki na Vure na parava vakaroro.
3 Na parava tara,
na kilala i tolu na malunga,
i masia na vurena a agelo na Vure i bele vona,
i galea,
“Kornelius!”
4 Lakea e Kornelius i mangenge hateka,
i matanono tamoroa,
i nanea,
“Bakovi Dagi,
i navai?”
A agelo i koli,
i ta maea,
“A Vure i longo a nivasileki vomu,
i matai a hini o kori e huriki a matasia,
i vivi vomu.
5 O rudu ranga bakovi ri gi lakea na tanga e Iopa,
ri gi tuli vilia a bakovi tara,
a rana e Simon,
ra ni gale e Petrus.
6 Ia a mosi ne Simon,
a mari ni rata a maki na kulina bulmakau.
A roho vona i pesi tabukoi na dari.”
7 Na tahuna a agelo i vano pali,
e Kornelius i gale a vora vona ala rua turana nugumaheto.
A nugumaheto iea,
i made tabukoi ne Kornelius vakaroro,
i matakaria.
I luhoi torea a Vure.
8 E Kornelius i taki tou vona a maki i bele vona.
Muri i rudu tou,
to lakea na tanga e Iopa.
E Petrus i Vurena
9 Na parava muri,
na kuru haro,
to ngalai lokovonga e Iopa.
Na tahuna iea,
e Petrus i rike na mapana ruma ge vasileki.
10 I vitolo,
i ngaru ni kani.
Na tahuna e huriki ri tarangai a maki ni kani vona,
i vurena.
11 I masia a hunu i mata ka,
i masia a maki tara i manga a lavalava dagi ni vakatavore puru.
A maki tara i nugutata a harena i va,
ni vakatavore puru na malala.
12 A lavalava iea i vonu vona a maka livoa,
a tabele bako,
a kadirovo.
13 Muri a lohona viri i ta maea,
“Petrus,
o pesi rike,
o rabalaki,
o kani a maki nga!”
14 *Pali e Petrus i koli,
i ta maea,
“Bakovi Dagi,
i uka liu!
Iau i uka ma kani kilala a maki muto.”a
15 *A lohona viri i ta tabu,
i ta maea,
“A ra maki a Vure i ratea i bele kabakaba,
naha ni takia ta i katoki.”
16 A maki iea i bele balaka tolu.
Muri ni lalu rike malaviriri na hunu.
17 E Petrus i loho viliha vona ra maki i masia na vurena,
i navai a pelegona.
Na tahuna i tabana ni luhoi viliha,
a bakovi ala tolu,
re Kornelius i rudu,
to mata visi pali a ruma e Simon,
to pesi na poridala.
18 To gale,
to nana,
“I tahoka tara mosi i made koea,
a rana e Simon Petrus?”
19 E Petrus i tabana ni luhoi kadoa a maki i masia na vurena,
lakea a Hanu Kiripiripi i takia,
“Simon,
a bakovi ala tolu to matakana ioe.
20 O pesi rike o puru mai tou.
Naha ni koi,
o vano turane tou,
a vuhuna iau kunana a rudu tou to valai.”
21 Muri e Petrus i puru i taki a bakovi nga,
“Iau kunana a bakovi moto matakanea.
I navai moto valai?”
22 Lakea to koli,
to ta maea,
“E Kornelius,
a ubu na tara na nugumaheto ala 100,
i rudu mateu mete valai.
Ia a bakovi malamala,
i togoa a Vure.
E huriki a Iuda lobo ri ngarua.
A agelo na Vure i takia ge taki ioe,
go lakea na ruma vona,
ge longo ranga ngava go taki.”
23 Muri e Petrus i taki tou to go dili na ruma,
i matakari tou vona a rodo iea.
Na parava muri i vano turane tou.
E huriki a murimuri ranga na tanga e Iopa,
ria ranga ri vano.
24 Na parava muri ri bele o Sisaria.
E Kornelius i pasimata ne ria,
i gale palupu pali e huriki a kabukabu,
e huriki a turana,
ri vapopo.
25 Na tahuna e Petrus i dili na ruma,
e Kornelius i turume puru,
i kavurikea.
26 *Pali e Petrus i tuli pesia,
i ta maea,
“O pesi rike.
Iau tara a bakovi tavula kunana.”
27 E Petrus i ta turana e Kornelius na tahuna ru laho dili,
lakea i matai e huriki ala kupo ri vapopo.
28 Lakea i taki ria,
“Mu lohoka vona a vinara ne mia e huriki a Iuda.
I uka ma mi gi laho turane huriki i uka ma ria a Iuda,
o mi gi gosi ria.
Pali a Vure i taki pali iau nahea ga galea tara viri ge a bakovi tavula,
o ge muto.
29 I mavonga,
na tahuna mu gale iau,
i uka ma a takia tara ngava.
A valai kunana.
Pali ngane ga nana mua,
i navai mu talo rike a ngava nau?”
30 E Kornelius i koli,
i ta maea,
“A maki tara i bele nau rira.
Ngane a parava i va i polo pali.
A vasileki na tahuna maea,
na kilala i tolu na malunga.
I bele vakaturutu nau tara bakovi,
i pesi na ngalagu,
a varakia vona i kea hateka.
31 I taki iau,
i ta maea,
‘Kornelius,
a Vure i longo pali a nivasileki vomu,
i matai a hini o kori e huriki a matasia vona.
32 I mavonga,
o talo rike a ngava ne Simon,
a rana tara e Petrus,
ge valai.
Ngane ia a mosi ne Simon o Iopa,
a mari ni rata a maki na kulina bulmakau,
i made tabukoi na dari.’
33 I mavonga a talo rike malaviriri a ngava vomu,
go valai.
I kamumu hateka o valai pali.
Ngane mi made koea na matana Vure,
mi gi longo a ngava e Bakovi Dagi i taki vomu go taki polo ne mia.”
E Petrus i Puka Tala a Ngava ne Kornelius
34 *Muri e Petrus i ta rike,
i ta maea,
“Iau ngane a matakilaka vona,
a Vure i rata a naro i palupulupu ne huriki a kabu lobo:
e huriki a Iuda,
e huriki i uka ma ria a Iuda.
35 Na tanga lobo,
e rei a viri i togoa a Vure,
i rata a naro kamumu,
a Vure bara i ngarua.
36 Mu lohoka vona a ngava a Vure i taki mia e huriki a Israel vona,
i vakalongo a Velenga Kamumu ne huriki bara ri made na nivalemu turana Vure na tahuna ri luhoi torea e Isu Kristo,
a Bakovi Dagi ne huriki lobo.
37 *Mu lohoka vona a maka maki i bele na tabeke ne Iudea,
i vakatubu o Galili muri ne Ioanes i taki e huriki ge vahilolo ria.
38 *Mu lohoka vona,
a Vure i vulakia e Isu o Nasaret,
i habi vona a Hanu Kiripiripi,
a nitora.
E Isu i laho na tabeke lobo,
a Vure i made turana,
i rata a naro kamumu,
i korimule e huriki a bakovi i ratapile ria a hanitu.
39 “Mi matai a maki lobo i rata na robo ne huriki a Iuda,
a maki i rata o Ierusalem.
Muri ri paditatea na kai tavalavala,
i mate.
40 Pali na parava i tolu muri ne Isu i mate,
a Vure i vakamahuri mulea na matenga,
i rudua i bele ne huriki.
41 *Pali i uka ma i bele ne huriki lobo.
I bele kunana ne mia e huriki a Vure i vulaki mia mi gi matai,
mi gi vakalongo e huriki.
Re mia e huriki mi kani,
mi ninu turana na tahuna i mahuri mule.
42 *I vakuku mia mi gi vara e huriki,
mi gi vakalongo kamumu ria maea,
‘A Vure i vulakia e Isu ge pelekado e huriki ri mahuri,
e huriki ri mate pali.’
43 *E huriki a propet ri vakalongo muga vona pali.
Ri vakalongo ne e rei a viri i luhoi tora ia,
a Vure bara i puga a naro hale vona na rane Isu.”
A Hanu Kiripiripi i Dili ne Huriki
44 *Na tahuna e Petrus i tabana ni ta,
a Hanu Kiripiripi i dili malaviriri ne huriki vonga ri longo a ngavana.
45 E huriki a murimuri ri valai turane Petrus,
e huriki ni pala pali a kuline ria,
ri turutu vona a Vure i habi a Hanu Kiripiripi ne huriki a kabu i uka ma ria a Iuda.
46 *Ri lohoka vona a Vure i habi a Hanu Kiripiripi ne ria,
a vuhuna ri longo ria ri ta na nita tebi,
ri kavurikea a Vure.