2 E rei a viri i vakaboru e huriki,

bara i kamumu vona ni gi topi na lohona a kedo dagi,

ni gi voro purua na utu,

nahea ge vakaboru e huriki a bakovi tavula nga.

3 ^*I mavonga,

mu matadoko!

“Ioe bara o masia e turamu ge rata a naro hale mai ioe,

o tahatea.

Ia ge pulo a vilona,

o lohopile a maki hale i rata virihi ioe vona.

4 Ia ge rata hale ioe balaka polorua na parava i taku,

pali ge hamule valai vomu balaka polorua,

ge taki tala,

o lohopile a naro hale vona.”

5 Muri e huriki a apostolo ri takia e Bakovi Dagi,

ri ta maea,

“O vakatora a niluhoi ne mia!”

6 ^*Pali e Bakovi Dagi i koli i ta maea,

“Mua bara mu tahoka a niluhoi kiroko i manga a vutuna mastad,

bara mu takia a kai iea ge malipu rike,

ge vano ge pesi na dari,

lakea bara i longototo.

7 “E rei tara ne mua i tahoka a vora i varo a maki na hania,

o a vora i matakari a sipsip,

pali na tahuna i hamule valai na ruma ge takia,

ge ta maea,

‘O valai malaviriri,

o made turagu tu gu kani.’

8 “I uka.

A hini bara o takia vona,

bara o ta maea,

‘O hilolo,

o gutu a maki ni kani nau,

o bole valai,

ga kani,

ga ninu taro iau.

Muri bara o kani o ninu ke.’

9 Na tahuna a vora i muri mai a ngavana bakovi dagi vona,

i uka ma ni gi kavurike.

10 Pali mua ranga,

na tahuna mu rata lobo a leho ni taki mua vona mu gu rata,

a ngaru mu gu ta maea kunana,

‘Mia a vora kunana.

I uka ma ni gi kavurike mia,

a vuhuna mi rata kunana a leho ni habi ne mia mi gi ratea.’ ”

11 E Isu i tabana ni laho sike o Ierusalem.

I laho polo na nagi ne Samaria e Galili.

12 Na tahuna i laho dili na tanga tara,

i matai a bakovi ala ravulu.

Re huriki a bakovi nga,

ri pesi basi,

a vuhuna i tuvu ne ria a patala.

13 ^*Ri gale dagi ri ta maea,

“Isu,

ioe a Bakovi Dagi.

O dodo mia!”

14 ^*Na tahuna i matai ria,

i ta maea,

“Mu vano mu vakasiri mua ne huriki a prister.”

Na tahuna ri laho lokovonga i malaharuri ne ria a patala.

15 A viri tara ne ria i masia i malaharuri vona patala,

lakea i hamule i gale dagi i kavurikea a Vure.

16 I tabuli puru tabukoi na vahane Isu,

i kavurikea.

Ra viri iea a bakovi o Samaria.

17 Lakea e Isu i nanea,

“A viri ala ravulu ri matapado.

Pali a vai a viri ala polova?

18 I navai ri koi ni hamule ri gi kavurikea a Vure?

Ra mosi iea kunana i hamule valai,

i kavurikea a Vure.”

19 Muri e Isu i takia a bakovi iea,

i ta maea,

“O pesi rike,

o vano.

I matapado a kulimu,

a vuhuna o luhoi tora iau.”

20 Muri e huriki a Pariseo ri nanea e Isu na harikianga na Vure,

garika ge valai.

Lakea e Isu i koli,

i ta maea,

“Na tahuna a harikianga na Vure ge valai,

i uka ma ge valai turana nivakasiri mu gu matai na matane mua.

21 I uka tara viri ge taki i bele pali koea o i bele pali lake,

a vuhuna a harikianga na Vure i bele pali ne mua.”

22 Muri i taki e huriki a murimuri vona i ta maea,

“Muri a parava bara i valai,

bara mu ngaru hateka ni masia a Tuna Bakovi ge hamule valai.

Bara mu ngaru ni matai popotea,

pali i uka ma mu gu masia.

23 ^*E huriki a bakovi bara ri taki mua,

ri ta maea,

‘Mu mata lakea,

i made lake,’

o ‘Mu mata valai,

i made koea.’

Naha ni vano.

Naha ni nunu muri mai ria.

24 Na tahuna a vila i maravila na hunu,

i vakapalala a hunu lobo,

mu masia.

I mavonga kunana na tahuna a Tuna Bakovi i hamule valai,

bara mu matakilalea.

25 Pali muga e huriki lobo mona bara ri tepua,

bara i bole a nimadihi i kupo.

26 “A parava na Tuna Bakovi ge manga kunana a parava ne Noa.

27 ^*Hosi,

na tahuna e Noa i hae a agarungu vona,

e huriki ri kani,

ri ninu,

ri vaparangi,

i vano i harena na tahuna e Noa i rike na agarungu.

I valai a marungu lolo i ratapile ria lobo.

28 ^*“I mavonga kunana hosi ne Lot.

E huriki ri kani,

ri ninu,

ri vakona,

ri vahabi a maki,

ri varo a maki,

ri hae a ruma.

29 Pali na tahuna e Lot i ha taroa e Sodoma,

i boru valai meli na hunu a kanono a bega i ratapile ria lobo.

30 “Bara i mavonga kunana na tahuna a Tuna Bakovi ge hamule valai.

31 ^*Na parava iea,

a viri tara i pesi na mapana ruma,

nahea ge hamule puru tabu ge dili na ruma ge bole a maki vona.

Ge ha kunana.

I mavonga kunana a viri i leho na hania,

nahea ge hamule lakea na ruma ge bole a maki vona.

32 ^*Mu luhoia e girihine Lot!

33 ^*A viri i ngaru ni korimule a kakaina bara i mate.

Pali a viri i habi a kakaina bara i mahuri vakaroro.

34 “A taki mua,

na rodo iea,

a viri ala rua ru mahita na kiri taku;

bara ni bole tara,

ni pe mule tara.

35 A ngatavine ala rua ru rata a maki ni kani.

Bara ni bole tara,

ni pe mule tara.

36 A bakovi ala rua ru leho na hania.

Bara ni bole tara,

ni pe mule tara.”

37 E huriki a murimuri vona ri longoa,

lakea ri nanea,

“Bakovi Dagi,

ra maka maki nga,

ge bele vai?”

E Isu i koli i ta maea,

“Na hini i tabuli vona a podana viri,

a maka pango­pango­kaba^a bara ri vapopo.”