Paulu Iyiri Ye Ookoo A Idi Bet Ilo Pang Yerusalem
21
Di kuto maimai tina ngan tikaua Paulu du titaru lo ookoo pono,
motong la amgege di sila tinepe inbe amkooi nga,
ngan le amkooi gorro motmot yo Kos in a amla.
Le nga amkooi ye ke tani in le le bong a du muntu ye ke san,
ngan amdi pombe ye motmot Rodes.
Motong la amgege motmot Rodes,
inbe amkooi mulu le di pombe ye malala mai Patara nga.
2 Amdi pombe,
ngan amtauaraia ookoo atu yo bet ikooi a idi pang Ponisia i.
Motong la amyiri ye ookoo tani in a amkooi a amdi nga.
3 Ngan amkooi a amdi ngan le amkamata motmot yo Saipras i,
in iken pang ke aromam ngas.
Inbe amkapusu a amkooi so a amdi pang tana mai Siria,
ngan le di amsolo ye malala mai Taia.
Ngan di amsolo nango a bet tipadu burum yo bet di tipadu ye malala mai tani in nga.
4 Ngan amsolo a amdi tana ngan ampusye Yesu di galiunu pattu,
motong la amye di amnepe ye ke limi be ru nango.
Inbe Maro Amunu Silene ila Yesu di galiunu tina ngan lodi a ipasongosongo di bet tilele Paulu a ken ilo pang Yerusalem be.
5 Bong ngan amnepe le nga lal yo titaru pang ookoo bet ole ikooi ye i,
motong la amgege malala mai tani in,
inbe ampa mulu a bet amdu pang ookoo pono.
Ngan le Yesu di galiunu tina ngan tiye di rimadi le di natudi tikau am a amye di ampa ye dada ke malala mai tani in a amdu pang diki.
Le nga amdu tiek,
motong la amye di amgun turumam inbe ampatarau nga.
6 Ampatarau a imot,
le nga lodi pam a tiparau am,
inbe am lapau lomam pang di a amparau di.
Motong la amyiri lo ookoo tani in pono,
inbe di ngan timulu a tidi pang rumu kidi nga.
7 Motong la amkooi mulu a amgege Taia,
ngan le la amsolo ye malala mai Tolemes.
Ngan amla nango,
ngan ampusye di diemam kapala yo titara lodi medana pang Yesu nga,
motong la amwete lo ponana kiam pang di,
inbe amye di amnepe ye ke atu.
8 Le nga mongmongini ki,
motong la amgege Tolemes,
inbe amkooi mulu le la pombe ye malala mai Sisaria.
Motong la amlo amnepe ye rumu ke Pilip.
Ye in tool ke raingi bingi dook mata pang di tooltool.
Ngan di tooltool limi be ru tina yo tipootoo di bet tilon di aposol ke Yesu nga,
ngan atu kidi la ye i.
9 Inbe Pilip tani in di natunu garup nene pai ngan ke bet tikaua Maro koonoo inbe tiwetewete betanga ki pang di tooltool.
10 Le nga amye di amnepe le ke kapala iman a ila,
motong la Maro koonoo atu yo ene Agabus i,
in ipa ke Yudia a isi pang Sisaria nga.
11 Ngan Maro koonoo tani in isi le si pombe pang yam,
motong la ikaua bittoongoo ye Paulu galini,
inbe ye taunu ipau kene le bene ye,
motong la iyei ne,
“Maro Amunu Silene iwete nen,
‘Dada yo dookoot ayeii i,
in di Yuda yo tinepe Yerusalem ngo,
ole tiyeii pang bittoongoo i taunu,
le ole tipau kene le bene,
lo ngan bet titaru la di tooltool yo tipa ye rara kidi Yuda tiap nga,
ngan bedi.’ ”
12 Ngan yeiso bet Maro koonoo tani in iwete nen a amlongo,
motong la amye di tooltool ke malala mai tani in amwete tootoo pang Paulu a amlele bet ken ilo pang Yerusalem be.
13 Bong ngan Paulu tani in iraua betanga kiam nen,
“Ai,
nga gelei a katangtang a bet kayei au a nen ngan lok madoko nga?
Au tauk i araia lok bet alo a lo titarau lo rumu dook tiap kidi talnga dikidiki lono leu tiap,
bong bet tiraumatau le amata ye Tool Mai Yesu ene nga,
ngan dook mata lapau.”
14 Paulu tani in iwete nen,
le amkamata ben lon mede bet ole ilo pang Yerusalem.
Ngan nen le ke bet amwetekala a ampalele mulu tiap.
Bong amman le amyei ne,
“Tool Mai ye taunu itoo lono ye soo so yo bet iyeii i.”
15 Le nga amnepe a ke kapala iman a ila,
motong la amkarata so kiam a amlo pang Yerusalem.
16 Ngan Yesu di galiunu yo ke Sisaria nga,
ngan kapala tiyei emam a amye di amlo.
Le nga tikau am a aye di amlo le lo titaram ye rumu ke Nason a amye amnepe.
Ngan Nason tani in tool ke Saipras,
inbe kulkulunu yege bet bingi dook mata pombe pang ye di nga,
ngan iportaka lono a iyei ben Yesu galiunu atu lapau.
Paulu Ilo Pombe Yerusalem
17 Ye kene yo ampa le lo pombe Yerusalem ye in nga,
ngan di diemam kapala yo titara lodi medana pang Yesu nga,
ngan lodi ponana yam le tikau am.
18 Le nga lo amnepe a mongmongini ki,
motong la amye Paulu amla bet la ikamata Yemis.
Ngan le di kuto maimai ke bareme ke Yesu nga,
ngan di le imot timan pompombe ye kene tani in lapau.
19 Ngan man tigaua,
motong la Paulu iwete lo ponana ki pang di,
inbe iwete nin so tina le imot yo Maro iyei a pompombe ye urata ki yo iyei kataunu ye di tooltool yo tipa ye rara kidi Yuda tiap nga.
20 Ngan yeiso bet di kuto maimai tina ngan tilongo yo Paulu igasa nen nga,
ngan le tiyitmaka Maro ene.
Inbe tiwete pang Paulu nen,
“Toomam,
kumata di tooltool ke Yuda nga,
ngan kinkatingi kidi alunu le alunu san la titara lodi medana lapau pang Yesu koot nga.
Inbe di tooltool tina ngan di le imot tikodo le timede bet titoo wer ke Maro.
21 Bong ngan di tooltool kapala man tigasong pang di nen.
Tiyei ne,
‘Paulu ni la ipatomonai di Yuda yo la tinepe kataunu ye di tooltool yo tipa ye rara kidi Yuda tiap nga,
ngan bet tiwala muridi pang wer yo Maro ikap pang Mose nga.
Inbe iwete pang di bet ken tikoro di natudi tamoto ngan tinidi be,
inbe ken titoo momo kapala yo kiidi Yuda nga,
ngan lapau be.’
22 Le o tilongo betanga yo kuman koot,
ngan oo,
le nga ole tayei balai?
23 Ngan nanga,
ole kuyei soo so yo amwete pong ye bet kuyei nga.
Ngan am nga di tooltool kiam pai yo amye di amnepe ni nga,
ngan titoo momo kidi Yuda le tipamede betanga medana atu pang Maro.
24 Le nga ole kop di tooltool pai tina nga,
inbe kuye di katoo dada kiidi Yuda yo bet kakaratang le tinimu galanga dook mata ye Maro matana nga.
Ngan nen le so tina yo bet tikap a tiyei paroranga ye pang Maro nga,
ngan kulon di a kuyimi pang di,
lo ngan bet tikot kutodi raunu kooti.
Kumata le bet kuyei nen nga,
ngan la bet di tooltool le imot nga,
ngan ole lodi galanga ben betanga yo tisopo koodi ye pong nga,
ngan moolmool tiap,
ngan o betanga doko.
Inbe ole lodi galanga lapau nen,
ong taum i nga kutoo wer ke Maro ngan dook mata.
25 Ngan di tooltool yo rara kidi Yuda tiap bong titara lodi medana pang Yesu nga,
ngan amwodo rau a amyawari pang di ye betanga yo mugu ngan tawetewete ye,
ngan oo.
Ngan amwete pang di bet ken tikan kaningi yo di tooltool tiparoro pang di maro yo kai padodo,
ngan be.
Inbe ken tikan asara yo rara iken ye nga,
too asara kapala yo di tooltool tikis guridi a bet timmata nga,
ngan be.
Inbe ken tikapsap ye dada ke di kerenge be.”
26 Ngan tiwete pang Paulu nen,
le nga tinepe a mongmongini ki,
motong la Paulu ikap di tooltool pai tina yo tipamede betanga pang Maro nga,
ngan a iye di tilo koongoo lono ke bareme mai ke sungunu,
lo iye di titoo dada yo bet tikarata di le tinidi galanga dook mata ye Maro matana i.
Motong la Paulu tani in lo iwete pang di tooltool maimai ke paroranga so pang Maro nga,
ngan ye lal yo bet tiyei urata ke karatanga tinidi in le lo imot ye i,
inbe ye so kidi atu atu yo bet tikap pang di lo tiyei paroranga pang Maro ye nga.
Di Yuda Tiparama Paulu Bareme Mai Ke Sungunu Lono
27 Ngan ke limi be ru tina yo tikarata tinidi ye nga,
ngan potai bet imot,
le nga Paulu imulu a ilo pang koongoo lono ke bareme mai ke sungunu,
inbe di Yuda kapala yo tipa ke tana Esia a timan nga,
ngan tikamata.
Motong la tisokkara di tooltool malala mai tina ngan lodi le tikap malmal pang Paulu,
le nga tila la tikauu a tiparama,
28 inbe koodi le mai nen,
“Ai,
di tooltool ke Isrel nga,
kaman man kalonam!
I tool tani yo ipa bet ipatomonai di tooltool ke ni mai i le imot a irautoo di tooltool kiidi ipa ye wer ke Maro inbe bareme mai ke sungunu lapau i,
in naii.
Ngan iyei dada nen leu tiap,
bong ikap di Girik yo tipa ye rara kidi Yuda tiap nga,
ngan tise koongoo lono ke bareme mai ke sungunu i a se tiyeie ni mison i,
le giri leu ye Maro matana.”
29 (Di tooltool tina ngan tiwete betanga nen,
yesoo mugu ngan tikamata tool ke Epeses yo Toropimus i,
in iye Paulu tinepe ye malala mai tani in.
Ngan la le tiyeisa o ye la Paulu tani in ikauu lapau a ise koongoo lono ke bareme mai ke sungunu i.)
30 Di Yuda tina ngan koodi nen,
le nga di tooltool le imot yo tinepe ye malala mai tani nga,
ngan tilongo le titakrai.
Le nga tidada ke ni mai i le imot a timan man tigaua inbe tiparama Paulu,
motong la tiyolle a idu ke diki ye koongoo ke bareme mai ke sungunu tani in.
Inbe palbe leu be titiukalakala dada tina yo ke koongoo nga.
Di Tooltool Ke Patokongo Ke Rom Tikaua Paulu
31 Di tooltool tina ngan tiparama Paulu tani a bet tiraumate.
Le nga bingi idada le la tool kuto mai yo matan kala di tooltool ke patokongo ke Rom i,
in ilongo betanga ben di tooltool le imot yo tinepe Yerusalem nga,
ngan tikap malmal a tipamaditi patokongo mai.
32 Motong la kuto mai tani in imadit tina le ikap di tooltool turana bulbulini ke patokongo,
tiye di tooltool ke patokongo pattu a tigege rumu kidi,
inbe tidada a tidu pang ye ni yo di tooltool malala mai tina ngan tinepe ye i.
Yeiso bet di Yuda tina ngan tikamata tool kuto mai tani in iye di tooltool ki ke patokongo tina yo tidu nga,
ngan le tiwulai bedi ye Paulu le nga tirauu mulu tiap.
33 Motong la tool kuto mai tani in iman man iparama Paulu,
inbe iwete pang di tooltool ki ke patokongo tina bet tipaua Paulu ye ooroo medana ru.
Motong la itor di Yuda tina ngan nen,
“Tool i sei?
Inbe nga iyeie soo so?”
34 Motong la di tooltool malala mai tina ngan kapala koodi ye betanga atu,
inbe di kapala ngan koodi ye betanga san.
Ngan tipadingi ni mata nen nga,
le nga tool kuto mai ke patokongo tani in lon galanga dook ye betanga nangai yo moolmool,
in tiap.
Motong la iwete pang di tooltool ki ke patokongo tina bet tikaua Paulu a tilo pang ye rumu yo tinepe ye i.
35 Bong ye kene tani in tipawewe Paulu a tiye tila potai pang ye dete ke rumu tani in nga,
ngan di tooltool ke patokongo tina ngan tikamata ben di tooltool yo tiyei malmal nga,
ngan tikapge bet tiyololo Paulu a tiraumate nga.
Motong la di tooltool ke patokongo tina ngan tiyitmaka Paulu le lo titaure ye poopoodi a bet tilo pang rumu.
36 Bong di tooltool malala mai tina yo titoo di nga,
ngan koodi le mai nen,
“Karaumate le imata!
Karaumate le imata!”
Paulu Iwetewete Pang Di Tooltool Malala Mai Tina
37 Ye kene tani in di tooltool ke patokongo tina ngan tikaua Paulu a bet ilo pang rumu kidi,
motong la Paulu iwete pang tool kuto mai kidi in ye di Girik koodi nen,
“Ai,
ke bet awete betanga atu i pong mugu ngan,
too?”
Ngan tool kuto mai tani in iyei ne,
“Ona,
ong i kuwete di Girik koodi,
too?
38 Ayeisa ong i tool ke Isip atu yo mugu ngan ipamaditi patokongo atu,
motong la ikap di tooltool 4,000 yo tiraumata di tooltool ye pul ke patokongo nga,
ngan a iye di tila ye ni soorookoonoo i.”
39 Motong la Paulu iraua betanga ki nen,
“Au i tool ke Yuda,
inbe au ke malala mai Tasas yo iken ye tana ke Silisia i.
Ngan malala mai kiau ni,
ene mai le imugu pang di malala yo kapala nga,
inbe au i ek iken ye rau ke malala tani in lapau.
Le lok bet kumalum pau a awetewete pang di tooltool nga kasin ngan.”
40 Paulu itoro tool kuto mai tani in nen,
ngan imalum panga.
Motong la Paulu tani in lo ikodo dete pono,
inbe iyei tomonai ye bene a ilele di tooltool malala mai tina bet tiwetewete be a tipalongo.
Le nga di le imot sila tinepe moonoombe a tipalongo,
inbe Paulu tani in iwetewete pang di ye di Ibru koodi.
Ngan le iwete nen,