Paulu Ipa Pang Tana Mai Masedonia Le Giris
20
Ye kene tani in di tooltool tina ngan oorootang a imot,
motong la Paulu iwanga pang Yesu di galiunu yo tinepe ye malala tani in nga,
ngan man tiye tigaua,
inbe ikap betanga pang di a ipamede lodi bet tikodo le timede ye dada yo dook mata nga.
Motong la iparau di a sila tinepe,
inbe ipa a idu pang Masedonia nga.
2 Ngan idu nga,
ngan le ipa ye malala tina le imot yo iken ye tana mai tani in nga,
inbe iwetewete kaiye betanga pang di tooltool yo titara lodi medana nga,
a nen ngan bet ipamede lodi bet tikodo le timede.
Ngan iyei nen,
inbe ipa le le la pombe ye tana mai Giris,a
3 ngan le la inepe nango ye taudu tol.
Motong la Paulu tani in lon kaua urata bet ikaua ookoo sa a imulu a idi pang Siria.
Bong ngan ilongo betanga ben di Yuda tiraua betanga bet ole tiraumate a imata.
Ngan nen le ipalele lono mulu,
inbe iwete bet ipa tana ke Masedonia a idi.
4 Ngan bet imulu ngan le di tooltool alunu la tiyei ene a tiye tipa nga.
Di tooltool tina ngan edi nen:
Sopata yo Pirus ke malala mai Beria,
in natunu;
inbe Aristakus iye Sekundus ke malala mai Tesalonaika;
inbe Gaius ke malala mai Debe;
inbe Timoti iye di tooltool ru ke tana mai Esia,
yo edi Tikikus ye Toropimus nga.
5 Ngan di tooltool tina nga,
ngan tipa a timugu le di tinamam la malala mai Toroas ngo.
6 E am ngan si amnepe nanga la Pilipai nga,
le lal ke kaningi porong yo taukan so yo bet iyeii a isung i,b
in imot,
motong la amyiri ye ookoo atu la Pilipai nga.
Inbe amkooi ye ke limi,
motong la amdi pombe pang ye di diemam tina ngan Toroas nga.
Motong la amye di amgaua,
inbe am le imot amnepe la Toroas ngo ye ke limi be ru nga.
Paulu Ipamaditi Yutikas La Toroas Nga
7-8 Amnepe Toroas le nga Sande rrai,
motong la amye di tooltool yo titara lodi medana pang Yesu nga,
ngan lo amgaua ye rumu sokalana atu yo iken ke ete i,
a bet amkana medana.
Inbe Paulu iwetewete pang di tooltool tina ye bingi dook mata ke Yesu,
yesoo mongmongini ki nga,
ngan ole igege di sila tinepe inbe ipa mulu.
Ngan nen le iyolo betanga le le lo bong kataunu.
Ngan rumu sokalana tani yo lo amgaua ye i,
in sul ki yo bet tilanga a ilangaraia rumu lono nga,
ngan alunu kaiye.
9 Inbe tamoto kase atu yo ene Yutikas i,
in lo iwur ye dada ke kaungu muru ke rumu tani in.
Inbe itar talngana pang Paulu tani yo isudungu betebetanga le taukan maryoongoo i.
Le nga Yutikas tani in matan ge a iken mata le iken kalli,
le tina imol ye rumu tani in lono yo iken ke ete yege ni,
in pang diki a ipa so le du pumbe tana,
le nga bet tidada a tidu bet du tikauu,
ngan imata oo.
10 Motong la Paulu itoo di lapau a idu tana,
motong la du iloko lo tamoto kase tani in pono a iwookoo.
Inbe iwete pang di tooltool tina ngan nen,
“Ken lomu sakarungu be.
Nga imagur.”
11 Paulu tani in iwete nen,
motong la imulu a ilo pang ye rumu sokalana tani lo iye di tooltool tina ngan tigaua a tikana medana,
inbe tikan so gaongo lapau.
Motong la Paulu imadit a isudungu betebetanga pang di mulu le le du muntu mai le ni galanga,
motong la igege di tooltool tina ngan sila tinepe,
inbe ipa mulu nga.
12 Inbe di tooltool tina ngan tikaua tamoto kase tani yo imagur mulu i,
in a tila pang ni kidi.
Ngan le di tooltool tina ngan lodi ponana belebele.
Paulu Igege Toroas Inbe Idi Pang Malala Mai Miletus
13 Amye Paulu amkarata betanga bet amyiri ye ookoo atu,
inbe amkooi ye a ammugu pang malala mai Asos le di amnamu nango.
Inbe ye in ole ipa tana le ilong,
ngan la bet amye amkooi ye ookoo nga.
14 Ye kene tani in Paulu ipa le long pombe pang yam Asos,
motong la ampayira lapau,
inbe amye amkooi a amla pang ye motmot yo ene Mitilini i.
15 Amla amnepe Mitilini,
motong la mongmongini ki nga,
ngan amkooi mulu le la pombe potai pang ye motmot Kios.
Ngan le ke tani in iman a ila,
motong la ye ke san mulu ngan amkooi le di amsolo ye motmot Samos nga.
Le nga ke tani in iman a ila,
motong la ye ke san mulu in nga,
ngan amkooi le di pombe ye malala mai Miletus nga.
16 Ngan Paulu tani in lon kaua urata bet ikooi le ikapusu Epeses,
yesoo lono bet di inepe kaiye mata ye tana mai Esia tiap.
Ngan ye in ipagaigai bet idi a ilo tarrai pang Yerusalem,
a nen ngan bet igoro lal maiyoko kidi Yuda ke kaningi so matana yo tiwete ene ye Pentekos i,
in bet pombe nga,
ngan ole ikamata nango la Yerusalem ngo.
Paulu Iwanga Pang Di Kuto Maimai Ke Epeses
17 Ngan Paulu idi pombe Miletus,
motong la iwanga pang di kuto maimai kidi tooltool yo tigaua ye bareme ke Yesu a tinepe Epeses nga,
ngan bet timan pang ye bet man tiye tiwetewete ngan.
18 Ngan tina nen nga,
le di kuto maimai tina ngan timan pombe,
motong la iwete pang di nen,
“Ai,
kulkulunu yege,
ye kene yo apola pombe ye tana mai Esia ye in le se dookoot nga,
ngan ang tapmu ngan lomu galanga ye dada kiau yo ayei pang ye ke tina le imot yo ayang tanepe ye,
ngan oo.
19 Le ang nga lomu galanga nen,
ye ke alunu san la di Yuda tina tiraua betanga a bet tigarungau ye nga.
Ngan ye dada kidi yo tiyeii nen i,
in le tikaua lo madoko inbe touanga mai pau le atang kaiye san.
Bong ngan au tauk i atarau le adu lopo ni,
inbe ayei urata tani ke Tool Mai i.
20 Inbe ang ngan lomu galanga lapau nen,
au i awetewete pang ye betanga ke Maro nga,
ngan atarkoo betanga dook mata moolmool yo bet alonang ye ngan sa,
nga tiap.
Bong apatomonai ang mallangana ye ni ke gaongo,
inbe ye rumu tina yo kiang atu atu nga,
ngan lapau.
21 Kanakana ngan awetewete betanga medana pang di Yuda le di Girik bet tiportak lodi pang Maro ye dada dook tiap kidi yo tiyei nga,
inbe di le imot bet titara lodi medana pang Tool Mai kiidi yo Yesu i.
22 “Le kalongo.
Maro Amunu Silene ila lok,
inbe ye taunu ipasongosongau bet dookoot nga adi a alo pang Yerusalem.
Ngan au i lok galanga ye soo so yo bet alo Yerusalem ngan pombe pang yau,
in tiap.
23 Bong au i lok galanga nen,
ye malala maimai tina le imot yo apa pang ye nga,
ngan Maro Amunu Silene iwete pau nen,
bet rumu dook tiap kidi talnga dikidiki yo bet di tooltool titarau a alo lono nga,
inbe urata moonoo masngana yo bet di tooltool tiyei pau nga,
ngan alunu san la inamau a ikenen ngo.
24 Bong ngan au i ke bet akamata nepongo kiau ben so dook mata pau,
ngan tiap.
Yesoo,
au i lok mede bet atoo dada yo apa ye koot i,
a nen ayei poraia urata yo Tool Mai Yesu ikauu pau i,
in le imot ngan.
Ngan urata tani i,
in ke bet awetewete pang di tooltool ye bingi dook mata ke Maro yo bet lono pang di a iyei dada dook mata pang di nga.
25 “Mugu ngan ayang tanepe,
inbe awetewete pang ye dada yo Maro bet matan kala di tooltool ki ye i.
Bong dookoot nga lok galanga nen,
pang dama ni nga,
ngan ang tina nga le imot ngan sa o ke bet ikamata matak mulu tiap.
26 Ngan nen le dookoot nga bet awete betanga galangana pang nen.
Kumata le bet ang tina ngan atu bet ilene nga,
ngan in au busunu kiau tiap,
27 yesoo au i awetewete pang nga,
ngan atarkoo betanga sa yang ye dada le imot yo Maro lono bet katoo,
ngan tiap.
28 Le bet nen nga,
ngan ken ang tapmu kakauwai yang dook leu,
inbe kakauwai ye di tooltool le imot yo tigaua ye bareme ke Maro nga.
Di ngan di tooltool tina yo ye taunu iyimi di ye rara ke Natunu nga,
ngan nen le tiyei ben di sipsip ki.
Ngan nen le Maro Amunu Silene ipootang bet kayei kuto maimai pang di,
le matamu kala di sipsip ke Maro tina ngan dook.
29 Ngan au i lok galanga nen,
ye kene yo bet agegang ye in nga,
ngan ole di gaunu gok dook tiap la bet timan a man tinepe kataunu yang,
a nen ngan man tigarung di sipsip tina nga.
30 Inbe ang tapmu lapau,
di tooltool kiang kapala ole timadit a tikap llungunu yang,
inbe tipalele betanga yo moolmool i,
a bet nen ngan di tooltool yo ke Maro nga,
ngan titara lodi medana ye betanga kidi a la titoo di ben di galiudi.
31 Le ken kakauwai yang dook leu!
Inbe lomu tut ye rai kerana tol yo ayang tanepe ye nga,
ngan ye ke le bong tina yo kanakana nga,
ngan au i matak surun du yang,
ngan nen le amaryoo ye kaungu noonoongoo pang ang atu atu,
ngan tiap.
32 “Ngan nen le dookoot nga,
atarang la Maro bene,
inbe lok bet lomu tut betanga ke Maro ye dada dook mata yo bet iyei pang nga.
Ngan betanga ke Maro tina ngan la bet ipamedang,
inbe ikap so dook mata yo Maro lono bet ikap pang di tooltool ki le imot yo ipootoo di panga ye taunu nga.
33 Ye kene yo ayang tanepe ye in nga,
ngan au i matak gorengana ye pat gol le silba,
too mala le so ke tool siap.
34 Ang tapmu nga lomu galanga yau ben ye au tauk bek ngan ayei urata ye so yo bet ilonau ye nepongo kiau nga,
inbe ayei urata ye so yo bet alon di tooltool yo aye di amnepe,
ngan lapau.
35 Inbe ye so tina le imot yo ayei nga,
ngan bet apitnaia dada pang nen;
kumata le bet idi nga tayei urata le gurada nga,
ngan la bet talon di tooltool yo ke bet di tapdi tilon di tiap nga.
Ngan nen le ole lod tut betanga ke Tool Mai Yesu yo ye taunu iwete nga.
Ngan Yesu tani in iwete nen,
‘Lo ponana ke tool yo ikap so pang ene i,
in ole illoso lo ponana ke tool yo ikap so i.’ ”
36 Paulu iwete pang di nen a imot,
motong la iye di kuto maimai tina ngan tigun turudi,
inbe ipatarau.
37 Ipatarau a imot,
motong la di le imot titang,
inbe tiwookoo Paulu a tisomo pangana.
38 Ngan di le imot lodi madoko dook tiap,
yesoo bong Paulu iwete pang di bet o ke bet tikamata matana mulu tiap.
Motong la tikaua Paulu a du titaru ookoo pono nga.