Gaongo Maiyoko Pombe Yerusalem
15
Paulu iye Banabas tinepe go la Antiok ngo,
inbe di tooltool pattu tipa ke Yudia a tisi pang Antiok.
Motong la si tipatomonai di diedi kapala yo titara lodi medana pang Yesu,
ngan nen.
Tiyei ne,
“Ai,
kumata le bet katoo momo ke Mose tiap,
inbe tikoro tinimu tiap lapau nga,
ngan o ke bet Maro ikau ang a ipamulang ye so yo bet igarungang i,
in tiap.”
2 Ngan Paulu iye Banabas tilongo betanga yo di tooltool tina ngan tiwete nga,
le nga yeru katedi malmal pang di a tiye di tiparkookoo a tiparsu ye betanga tani.
Motong la di diedi kapala yo titara lodi medana pang Yesu nga,
ngan tipootoo Paulu iye Banabas bet tiwanga di a tiye di diedi kapala tilo pang Yerusalem a bet lo tiye di aposol ke Yesu,
inbe di kuto maimai ke bareme ke Yesu yo tinepe Yerusalem nga,
ngan tigaua inbe tikarata betanga tani in.
3 Motong la di tooltool tina yo tigaua ye bareme ke Yesu nga,
ngan tiwanga Paulu iye Banabas tiye di diedi tina a tilo nga,
ngan le tipa kataunu ke tana mai Ponisia le Samaria.
Inbe tiwetewete pang di tooltool ye yo Maro iportak di tooltool yo tipa ye rara kidi Yuda tiap nga,
ngan lodi koot nga.
Ngan nen le di diedi kapala yo titara lodi medana pang Yesu nga,
ngan tilongo bingi kidi le lodi ponana kaiye.
4 Motong la ye kene tani yo di tooltool tina ngan tipa le lo pombe Yerusalem nga,
ngan le di tooltool yo tigaua ye bareme ke Yesu nga,
ngan tiye di aposol ke Yesu,
inbe di kuto maimai kidi ngan lodi ponana ye di,
inbe tikap di lo tiye di tinepe.
Motong la Paulu iye Banabas tigasa pang di ye so tina le imot yo Maro iyei ye yeru bedi a pompombe nga.
5 Ngan tigasa nen,
motong la di Paresi kapala yo titara lodi medana pang Yesu nga,
ngan timadit lo tikodo,
inbe tiwete nen,
“Ai,
kumata le bet di tooltool yo tipa ye rara kidi Yuda tiap nga,
ngan bet se tigaua yidi tooltool yo tatara lodo medana pang Yesu nga,
ngan ole kakoro tinidi,
inbe kawete pang di a titoo wer ke Maro yo iwete pang Mose a iwodo nga,
ngan dook le imot.”
6 Motong la di aposol ke Yesu tina ngan tiye di kuto maimai ke di tooltool yo tigaua ye bareme ke Yesu nga,
ngan tigaua a bet tikarata betanga tani in.
7 Ngan tigaua ngan le tiwetewete kaiye,
motong la Pita imadit lo ikodo,
inbe iwete pang di nen,
“Ang di diek nga,
ngan lomu galanga nen,
mukot yege ni ngan au i la Maro ipootau bet ala la araia bingi dook mata pang di tooltool yo tipa ye rara kidi Yuda tiap nga,
a nen ngan bet tilongo betanga yo awete nga,
ngan titara lodi medana ye.
8 Ngan Maro in lon galanga ye di tooltool tina ngan lodi oo,
inbe ye in la ikaua Amunu Silene pang di dawa ben tina yo mugu ngan ikauu paidi nga.
Ngan ye dada yo iyeii nen i,
in ipitnaii paidi bet ye lon ponana ye di tooltool rara san,
ngan lapau.
9 Ngan dada yo Maro iyei paidi taye di nga,
ngan gaongo leu.
Bong titara lodi medana panga,
ngan la le igiri sennene kidi le lodi iken galangana dook mata ye matana nga.
10 Nga gelei,
a dookoot nga kakapge bet kasauraia so moonoo lo Yesu di galiunu guridi nga?
Ngan wer ke Maro nga,
ngan imoo san,
le mugu ye di sasa kiidi nga inbe le se yidi yo dookoot nga lapau,
ke bet tasolo so moonoo nen tiap.
E nga bet katouo Maro,
too?
11 Bong idi nga ole tatara lodo medana nen;
Tool Mai Yesu lono paidi a iyei dada dook mata paidi,
ngan la le Maro ikau idi a ipamulidi ye so dook tiap yo bet igarungidi in nga,
dawa ben tina yo ikap di tooltool rara san nga lapau a ipamulu di koot nga.”
12 Motong la di tooltool tina yo tinepe ye gaongo nga,
ngan tiwetewete tiap,
bong sila tipalongo a titar talngadi pang Banabas iye Paulu.
Inbe yeru tiwetewete pang di ye urata maimai le mos matana matana yo Maro ikap gurana pang di a yeru tiyei kataunu ye di tooltool yo tipa ye rara kidi Yuda tiap nga,
ngan a iyei ben tarkilanga pang di nga.
13 Ngan Banabas iye Paulu tiwetewete a imot,
motong la Yemis imadit a iwete nen,
“Ang di diek nga,
katar talngamu a kalongo betanga kiau.
14 Ngan Simon in iwete paidi nen nga,
ngan bet iwete nini Maro yo isi kulkulunu yege ngan si ikap di tooltool yo tipa ye rara kidi Yuda tiap nga,
ngan kapala,
a bet nen ngan man tiyei dawa ben di tooltool ki ye taunu nga.
15 Ngan betanga ki tina nga,
ngan gaongo leu ben kidi Maro koonoo yo tiwodo nga.
Ngan tiwodo nen,
16 ‘Di rara ke Dawiti yo bet tikoli a tiyei di tooltool kuto maimai a bet matadi kala di tooltool kidi Isrel le imot nga,
ngan di ngan ben rumu yo iduku a imasareke le dook tiap koot i.
Bong pang dama ni nga,
ngan ole amulu a asi bet si are kolo rumu tani mulu.
Ngan renge le so ki kapala yo dook tiap nga,
ngan ole akapkol paunu mulu,
a bet nen ngan si are rumu tani ye mulu le lo ikodo.
17 Ngan ole ayei nen,
a bet nen ngan di tooltool kapala le imot ole tiserau Tool Mai,
inbe di tooltool yo tipa ye rara kidi Yuda tiap bong apootoo di bet tiyei di tooltool kiau nga,
ngan ole tiserau lapau.
18 Ngan mukot yege ni nga,
ngan Tool Mai iwete betanga nen bet ole so yo nen ngan pombe.’a ”
19 Motong la Yemis tani in iwete mulu nen,
“Au i lok yo bet aweta in nen;
di tooltool yo tipa ye rara kidi Yuda tiap inbe tiportak lodi a timan pang ye Maro koot nga,
ngan ke bet tatar gogo urata moonoo yo nen ngan lo podi tiap.
20 Bong bet tiap nga,
ngan tawodo rau pang di a taso talngadi dook ye wer yo bet titoo,
ngan nen.
Tayei ne,
‘Ken kakan kaningi yo di tooltool tiparoro pang di maro yo kai padodo,
ngan be.
Inbe ken kakapsap ye dada kidi kerenge be.
Inbe ken kakan asara yo tikis guridi a timmata le rara ipot lodi nga,
ngan lapau be.’
21 “Ngan ole tayei nen,
yesoo mukot yege ni a ise nga,
ngan di tooltool tipa bet tikinkat betanga yo ke Mose nga,
ngan ye malala maimai tina le imot ke di tooltool yo tipa ye rara kidi Yuda tiap nga,
inbe kanakana ngan lal kidi Yuda ke sungunu bet pombe nga,
ngan di tooltool tina ngan tilo rumu kidi Yuda ke gaongo ngan lono lo tikinkat betanga tina ngan pang di lapau.”
Di Kuto Maimai Tiyawara Rau Pang Di Tooltool Rara San Yo Titara Lodi Medana Pang Yesu Nga
22 Yemis iwete nen a imot,
motong la di aposol ke Yesu tina ngan tiye di kuto maimai ke bareme,
inbe di tooltool le imot yo tigaua ye bareme ke Yesu nga,
ngan tikarata betanga bet ole tipootoo di tooltool kidi ru a bet tiwanga di a tiye Paulu ye Banabas tidu pang Antiok.
Ngan le tipootoo di,
ngan atu in Yuta yo tiwete ene san ye Basabas i,
inbe tool san in Silas.
Di ngan tiyei kuto maimai pang di diedi kapala tina yo titara lodi medana pang Yesu nga,
le nga tiye di tinepe.
23 Motong la di aposol ke Yesu tiyawara rau atu ye di a tikauu a tidu.
Ngan rau tani in iwete nen,
Am aposol ke Yesu,
inbe di kuto maimai ke bareme,
am nga di diemu kapala yo amtara lomam medana pang Yesu lapau nga.
Ngan la amwodo rau naii a bet amyawari pang,
ang di diemam yo kapa ye rara kidi Yuda tiap,
bong katara lomu medana pang Yesu koot a kanepe ye malala mai Antiok,
inbe tana mai Siria le Silisia nga.
Am nga amyawara lo ponana kiam pang.
24 Ngan am nga amlongo betanga nen,
bet di tooltool kiam kapala yo tipa ke ni a tisila nga,
ngan sila tigarungang ye betanga kidi yo tipatomonai ang ye nga,
le lomu madoko ye betanga kidi.
Bong di tooltool tina ngan amwete toko kadi betanga sa bet mala tiweta pang tiap.
25 Ngan amlongo betanga nen pombe,
ngan la le am le imot amgaua lomam bet ampootoo di tooltool pattu,
inbe amwanga di tiye Banabas ye Paulu a tiye di tisila pang yang.
Ngan Banabas iye Paulu tina ngan di tooltool kiam ru yo lomam pang di mai san nga.
26 Inbe yeru taukadi tattadaingi,
bong yeru tirai tinidi bet tiwetewete pang di tooltool ye Tool Mai kiidi yo Yesu Kirisi i.
27 Ngan nanga,
amwanga Yuta iye Silas bet yeru tisila pang yang lapau,
a bet nen ngan sila yeru di tapdi tiwete pang ye koodi ye so yo amwodo ilo ye rau nga.
28 Ngan Maro Amunu Silene inepe yam,
inbe amye amgaua lomam le amwete pang nen.
Am nga o ke bet amtar gogo moonoo sa mulu lo pomu tiap,
bong kapas le katoo wer yo amwodo ngan leu.
29 Le nga ken kakan kaningi yo di tooltool tiparoro pang di maro yo kai padodo,
ngan be.
Inbe ken kakan asara yo rara iken ye nga,
too asara kapala yo di tooltool tikis guridi a bet timmata nga,
ngan be.
Inbe ken kakapsap ye dada ke di kerenge be.
Ngan kumata bet kakap tutang dook le kayei dada tina ngan tiap nga,
ngan ole dook mata san.
Le betanga kiam nanga leu.
Kanepe ye lo ponana dook mata.
30 Motong la di tooltool tina ngan tiwanga di pai a tidu pang Antiok.
Ngan tidu pombe,
motong la tikiu di tooltool yo tigaua ye bareme ke Yesu nga,
ngan man tiye di tigaua,
inbe tikaua rau tani in pang di.
31 Le nga kene yo di tooltool tina ngan tikaua rau tani in a tikinkati ye in nga,
ngan le lodi ponana kaiye ye betanga dook mata yo tiwodo a tipamede di ye nga.
32 Ngan Yuta iye Silas tina ngan di tapdi ngan di Maro koonoo lapau.
Ngan nen le yeru tiwete betanga dook mata alunu kaiye pang di diedi kapala yo titara lodi medana pang Yesu nga,
ngan bet tipamede di ye.
33-34 Ngan Yuta iye Silas tina ngan yeru tinepe kaiye nango la Antiok ngo,
motong la di diedi tina ngan tipamede di yeru ye betanga dook mata,
a bet nen ngan Maro ikaua lo silene pang di,
inbe titar di yeru a timulu a tilo pang ye di tooltool yo tiwanga di a tisi nga.b
35 Bong Paulu iye Banabas ngan sila yeru tinepe nango la Antiok ngo,
inbe tiye di tooltool alunu la tipatomonai di tooltool ye betanga ke Maro,
inbe tiwetewete pang di ye bingi dook mata ke Tool Mai nga.
Parsuanga Iken Kataunu Ye Paulu Iye Banabas
36 Paulu iye Banabas tina tinepe Antiok le ke alunu iman a ila,
motong la Paulu iwete pang Banabas nen,
“Ai,
nga ole aru tamulu a la matad so di diedi kapala yo tinepe ye malala maimai tina yo mugu ngan la aru tapa ye,
inbe tawetewete bingi dook mata ke Tool Mai pang di nga.
Tamulu a bet nen ngan takamata di too,
ngo tinepe dook,
too tiap.”
37 Paulu iwete nen,
le nga Banabas lono bet ikaua Yowan yo ene san Maka i,
a bet tiye tila lapau.
38 Bong ngan Paulu lono dook mata bet tikaua Maka a tiye tila tiap,
le nga iyei ne,
“Tool in mugu ngan taye tapa ye urata nga,
ngan le ikoo yidi nango la tana mai Pampilia ngo,
le lono bet itoo idi a la taye tayei urata tiap.
Le ke bet dookoot nga aru takauu a taye tapa mulu tiap.”
39 Ngan Paulu iwete nen,
le nga iye Banabas tiparsu ye betebetanga.
Le nga yeru tipa gaongo mulu tiap,
bong tiparpoto le Banabas ikaua Maka a yeru tiyiri ye ookoo atu a tidu pang ye motmot Saipras.
40 Inbe Paulu tani in ikaua Silas.
Le ye kene yo bet yeru tipa ye in nga,
ngan di diedi kapala yo titara lodi medana pang Yesu nga,
ngan tipatarau bet Tool Mai lono pang di a iyei dada dook mata pang di yeru.
41 Motong la yeru tipa a tila ye malala yo iken ye tana mai ru Siria le Silisia nga,
inbe Paulu la ipamede di tooltool yo tigaua ye bareme ke Yesu a tinepe ye ni tina ngan.