18
Lëë kyedzy nii lë Babilonia byab
1 Loxsye ngo lëë stu angly nii xñabey byety kpaa,
aan tyub lo kislyu psaabini xaa porñee tir xpibëly xaa.
2 Nguiedzy kwnee xaa,
chëb xaa:
—Lëë Babilonia kwnitylo,
lëë Babilonia kwnitylo,
aan lëëw byak lidzy kyalbini mal ni lëëw byak laañee xko mguiñ ntseeb xipchoos.
3 Kchë kyedzy nii nche lo kislyu pkaay xtol kyedzy ko,
ni kchësy kaa rey nii xñabey lo kislyu beeñtsyey tol nii beeñtsyey kyedzy ko.
Lëë kchë gaa xaa nii xto cos byak rikw porñee pxiñ kyedzy ko tumi.
4 Lëën biñ nii lëë stu xaa kwnee leñ kpaa chëb:
—Kchësy to siñee nak to meñ tu kyedzyaa,
kol kchoo ske parñee jkaaydy to xtol kyedzy ke ni parñee ktsyooldy to kyalnë nii ktsyoolo.
5 Lëë xtol kyedzy ke lox ptyaly aan lëëw byakxoob axte leñ kpaa,
ni tu tol nii beeñtsyey kyedzy ke karty knityladzy Dios.
6 Kol ksaksi kyedzy ke sinak nii psaksiw meñ,
ni kol ktikche kchë nii beeñtsyeyo.
Mastre fuert kol kxixkwaa nii jki do kyedzy ke que nii pkiw meñ.
7 Mban kol ktee kyedzy ke ni kol ksaksiw,
por tir kok nyaaw ni tir pxiño tumi,
aan chëbo leñ styoow:
“Nakaa sinak tu kwnaa xñabey.
Lëdy viuudaa.
Ni tu pe kaktyaa.”
8 Por ngo,
tu kpidzak lëë kyedzy ke ktsyool kchëlo kyalnë ni tedy kpiñ,
ni kety ni tsek lo ki.
Por tir ntseeb Dios nii ksaksi kyedzy ke.
9 Kchë rey nii xñabey lo kislyu nii wi beeñtsyey tol nii beeñtsyey kyedzy ke ni pxiñ tumi ksa kyedzy ke koon ni kteenë tsiñee kan xaa nii lëëw noyek.
10 Sit kwe xaa parñee tejty xaa castigw,
aan lëë xaa këb:
—¡Brooboo,
Babilonia!
Ngoloo ni kwnabeyoo,
per ketyle kwnitylool.
11 Wi kchë xaa nii xto cos ni xkyë dilgensy koon ni kteenë por kyedzy ko,
porñee tsodre cho si
12 plat,
or,
kyo nii tir ngui,
kyo nii lë perle,
ladx non,
ladx sed,
ladx morad ni nixñë,
yag nii xlyaa nex,
ni cos nii nyaa con lay elefant,
yag ngui,
brons,
kiib,
kyo nii lë marmol,
13 canel,
kizh nii xlyaa nex,
yaal,
kizh nii lë mirra,
ngwaan xlyaa nex,
viñ,
aceit,
riñ lan,
xobxtily,
ma nii choy yow,
mëkwxiily,
cabay,
carret ni xaa ni xtyo par kyë tsiiñ.
14 Kchësy meñ këb lo kyedzy ko:
—¡Chaptroo kchë cos nii tir xyo styool,
kpikchedre kapoo kchë cos non nii kopoo!
15 Kchë xaa nii xto cos lo kyedzy ko ni byak rikw kwe sit,
koon ni kteenë parñee tejty xaa castigw,
16 aan kchë xaa go këb:
—¡Brob kyedzy ngol go!
Koko sinak tu kwnaa nii nakw tu ladx non ni kë or ni kyo ngui lady,
17 ¡aan tub worak lëë kchë nii kopo kwnitylo!
Kchësy xaa nii chuuñ ksëë barkw ni xkyë tsiiñ lo nistoo kwche sit,
18 aan tsiñee kon xaa nii lëë kyedzy ko noyek,
nguiedzy chëb xaa:
—¿Pe no stu kyedzy nii ngol si ngol kyedzy re na dyon?
19 Aan lëë xaa biiñ ni lëë xaa pchoob yu kik xaa porñee tir pteenë xaa,
ni nguiedzy chëb xaa:
—¡Brob kyedzy ngol go!
Con kchë nii kopo byak rikw kchë xaa nii chap barkw,
¡aan tub worak lëëw kwnitylo!
20 ’Kol kle kchësy to siñee no do kpaa,
porñee lëë kyedzy ko kwnitylo ni kol kle kchë do siñee ngab to lo Dios ni nak to apostle ni xluuy do xtiits Dios,
por lëë Dios beeñ xkyalxtisy to.
21 Loxsye ngo lëë tu angly nii xñabey blis tu kyo nii nyaa si nyaa tu kyomoliñ,
aan lëëw pchon xaa lo nistoo,
chëb xaa:
—Siñee byabak kyo re kyab kyedzy Babilonia aan kpikchedre kan meño.
22 Kpikchedre kool meñ arp,
ni flaut ni trompet,
ni tsodre meñ nii kyë tsiiñ ni meñ nii kuuñ tsiiñ moliñ leñ kyedzy ko.
23 Kyëdre bini ni kaktre kyalwtsiilña leñ kyedzy ko,
ni lëëw na kyedzy ko byuñ rikw kchë xaa nii pto cos ni kwëti kchë meñ lo kislyu por xkyalbruj kyedzy ko.
24 Lëë Dios bnitylo kyedzy ko porñee por xtolo kuty profet ni meñ nii ngab lo Dios ni meñ nii no tyub lo kislyu.