Xkitsy byon San Juan
1
Xkyalnsaak Gayo
1 Xaa koolaa.
Lëën xal kitsy re lo xamigwaa Gayo.
Xkëstyoon xaa tyub styoon.
2 Beetsy,
xñabaa lo Dios nii kakni xaa lii ni kneetsy xaa kyalndaan lool porñee mbañoo sinak xñabey xaa.
3 Tir blen tsiñee në bla betsy no nii biid tedy lon nii xchosodyoo lo xtiits Dios.
4 Ni tu cos chuuñ kledy naa sinak nii xlen tsiñee chonaa nii lëë kchë xiñaa mbañ sinak xñabey xtiits Dios.
5 Beetsy,
buen nii chuñoo betsy no yudar nikxe xaa sit xaa.
6 Lo kchë xaa nii xniladzy xtiits Dios bitiits xaa nii tir xkëstyool meñ.
Beeñ favor beeñ xaa yudar parñee kyal xaa xiviaj xaa sinak xñabey Dios.
7 Por lëë xaa bislo viaj re par kluuy xaa xtiits Jesús,
aan nëdy xaa kñaasy xaa nii xkady meñ nii xnilasty Dios.
8 Por ngo no nii kuuñ no xaa yudar parñee kluuy xaa tiitsli.
Diótrefes ni Demetrio
9 Lëën pxal tublë kitsy lo kchë meñ nii xniladzy xtiits Dios,
per chaklasty Diótrefes nii kñabey noo,
sink lëë xaa chakladzy kñabey xaa.
10 Per tsi lëën kyely,
lëën këntseeb lo xaa por kchë tiits kizh ni tiits xuuy nii nojkots xaa lëë noo.
Aan xyaldy xcuent xaa siko,
sink xteejty xaa laa kwës betsy no nii chiid,
ni xlaady xaa nii ktee meñ laa kwës xaa ni xkwii xaa meñ nii xtee laa xkwës betsy no lady meñ nii xniladzy xtiits Dios.
11 Beetsy,
kuñdyoo cos mal,
sink beeñ cos buen.
Xiñ Dios nak kchë xaa nii chuuñtsyey cos buen,
per lëë xaa nii chuuñtsyey cos mal karty kyuumbey xaa Dios.
12 Kchë meñ xñee nii buen Demetrio ni nli gaaw.
Wi noo no xfavor xaa ni nan gaal nii nli xtiits noo.
13 Ndaly nii no kniyaa lool,
per chaklastyaa kniyno lo kitsy re,
14 por xkokyeeñaa nii klyëëdy lëën kyely teedy lool,
aan yuubaa kñe lool.
15 Kakni Dioosoo dyon.
Xkëëptyux xamigw no nii no nu lii.
Beeñ favor pkëëptyux kchë xamigw no nii no ske.