3
Lëë Jesús kiid
1 Beetsy,
nrii schop kitsy nii xalaa lo do.
Leñ chop kitsy re kokladzyaa nii nsaabinin kik to.
2 Kol ksaladzy nii kwnee profet penaadle,
ni kol ksaladzy nii kwnabey Jesucrist nii pteelaa lëë no.
Lëë apostle bluuyo lo do.
3 Per precisy nii ksaladzy to nii tsiñee lëë tse mer tsitsib,
lëë xaa nii kidyni xtiits Dios kiid,
lëë xaa go kpañ si xkaatyee,
4 aan lëë xaa go këb:
“¿Koo gaa Crist na kiid?
Destye nii kuty pxosykoltoo no,
sinak kak cos nako destye nii kwche kislyu.”
5 Chaklasty xaa go kyeñ xaa nii destye tiemp no kpaa,
aan por xkyalwnabey Dios lëë kislyu pchukë lo nis,
lo nis kwyaaw.
6 Aan por xnisak kyotox nii byab lëë kislyu go kwnitylo.
7 Per lëë kpaa ni kislyu nii no natiemp byaanle par ki por lëë Dios kwnabey nii singo kako.
Lëë ki ksaayo tse nii lëë kyalxtisy kak,
tse nii lëë meñ mal nitylo.
8 Ni knitylasty to,
beetsy,
nii tu kpidz nak sinak tu mily iz lo Dios,
ni nak tu mily iz sinak tu kpidz lo xaa.
9 Lëdy nii xlyëë Dios par kuñ xaa cumplir xtiits xaa,
sinak nii xsyak grol meñ,
sink chap xaa paciensy,
por chaklasty xaa nii kyëtañ ni tu meñ,
sink chakladzy xaa nii ktikche meñ styoo lo xaa.
10 Per lëë Jesucrist kyood sinak tsiñee chiid tu ngbaan.
Tse go lëë tu bidox tso aan lëë kpaa nitylo,
kchë cos tsek con ki,
ni lëë kchë cos nii no lo kislyu tsek.
11 Ya ke nii lëë do nan xa nitylo kchë cos,
¿pe toodyxe no nii kpañ do sinak xñabey Dios,
ni kniladzy to xtiits xaa tyub styoo do?
12 Kol kyëmbës Dios ni kol ktee nii kyob kyood xaa.
Tse go lëë kpaa nitylo lo ki ni lëë kchë cos tsek lo bëly,
13 per lëë no këmbës kpaa kub ni kislyu kub nii kneetsy Dios.
Kchësy meñ kpañ lo kislyu go sinak xñabey Dios.
14 Por ngo,
beetsy,
lëë ka lëë do këmbës kyood xaa,
kol ktee nii kpañ do sinak xñabey Dios parñee tsody xtol do.
15 Kol ksaladzy nii chap Jesucrist paciensy lo no parñee tyeelaa no.
Singo pkëë betsy no Pable lo kitsy nii pxaal xaa lo do.
Lëë Dios psaabini kik xaa.
16 Kchësy leñ kitsy nii pxaal xaa pkëë xaa kchë cos re.
No cos nii ngan kyeeñ no,
aan xkëëtañ meñ nguey lo tiits ko,
sinakak xkëëtañ meñ lo xkitsy Dios,
per lëë meñ nii chuuñtsyeyo nitylo.
17 Por ngo,
beetsy,
kol kap cuent,
por nanle to kchë cos re parñee jkëëtidy meñ mal lëë do ni parñee kchosody styoo do.
18 Per kol kyuumbey nyë Dios ni Jesucrist aan kol jkëstyoo xaa leñ styoo do.
¡Tugak kol ktee skizh lo xaa!
Amén.