Kitsy nii pkëë Santiagw
1
Lëë Santiagw xaal kitsy re lo meñ nii ncheno tañ
1 Naa nak Santiagw,
xaa nii chuñ xtsiiñ Dios ni xtsiiñ Jesucrist.
Lëën xkëëptyux ksa tsiipchop xtiiy Israel nii ncheno tañ tyub lo kislyu.
Kyalnyaani nii xnee Dios
2 Beetsy,
no nii kle do tsiñee lëë do no tedy tu lo kyalnë.
3 Por nanle to nii tsiñee xtyedy to tu kyalnë porñee xniladzy to Dios,
xkiiño.
Por singo mod lëë do xseedy xa kxekw to kyalnë.
4 Per kol ktee nii jkiiñ kchë kyalnë go lo do,
parñee kak to tu xaa nyaani,
tsiin nii ni tu pe kakty falt lo do.
5 Deelñee chak falt kyalnyaani lo do,
kol nabo lo Dios por xkady Dioso,
lëëw xteedy xaa kchë lo meñ nii xñabo.
6 Per no nii kñab tow tyub styoo do,
jkandy kik to,
por nak meñ nii xkan kik sinak nistoo nii choy me nëz re nëz rek.
7 Pe kteejty Dios lo meñ nii nak singo,
8 por natse no tu cos kik meñ go,
lëë kxe gaa na stuwo,
chilody tsoli kik clasy meñ go.
9 No nii ktaan tu xaa mban deelñee klisklaa Dios xaa.
10 Singo gak rikw no nii ktaan xaa deelñee ksyablyu Dios xaa.
Por nak rikw sinak xkyoo kizh,
xtiiydyo.
11 Tsiñee lëë ngbidz xlyañ,
lëë kizh xpidzy aan lëë xkyoow xlyaal.
Aan sikootyee lëë kchë xkyalntsono xyal.
Singo gak rikw nikxe kyënap xaa kchë nii chap xaa,
lëëw nitylo.
Dichos meñ nii xtyedy kyalnë
12 Dichos xaa nii xekw kyalnë,
por tsi lëë xaa lox te lo kyalnë,
lëë xaa jkaa kyalmbañ nii ktee Dios lo meñ nii xkëstyoo Dios.
13 Tsiñee kakladzy to kuñ do tu cos mal,
këbty to tsaaplaa Dios xchëëp lëë do par kuñ do cos mal go.
Porque nlejty Dios parñee kuñ xaa cos mal,
ni xkiildy xaa meñ par kuñ meñ cos mal.
14 Sink misme xtol meñ xchëp meñ parñee kuñ meñ cos mal.
15 Kchë cos mal nii xsya leñ styoo meñ xyaklo tol,
aan tsiñee lëë tol xroob lëë kyalkuty sëëd.
16 Kyëtidy to,
beetsy,
17 por kchë cos buen nii chaap no,
kpaa sëëdo.
Dios nii psaa kchë mëly nii no leñ kpaa pxaalo.
Ktsyëëdy Dios.
Nakty xaa sinak malë nii xtyedy lo kislyu.
18 Lëë xaa bnee kyalmbañ lo no,
worñee bniladzy no xtiitsli xaa.
Por styoo xaa kwlañ nii lëë no kak xaa nii mastre non lo kchë nii psaa xaa.
Kol kuuñtsyey nii xñabey Dios
19 Kol ksaladzy gon,
beetsy,
nii ligier kak to,
par jkëëtyag to,
per no nii kwës to par kñee do ni par klëë do.
20 Por chuuñtsyeydy meñ nii xlëë nii xyo styoo Dios.
21 Kol ksaan kchë cos yox ni kchë tol nii no leñ styoo do aan kol ksal xtiits Dios nii no leñ styoo do,
parñee kteelaa tiits ko lëë do.
22 Per kol kuuñtsyey nii xñabey xtiits Dios,
lëjty xaktyee jkëëtyag tow,
por deelñee kuuñtsyeydy tow misme lëë do no kyëti xaly.
23 Nak xaa nii xaktyee xkëëtyag xtiits Dios,
aan chuuñtsyeydyo,
sinak meñ nii xuy lo lo kyowan.
24 Xuy xaa lo xaa lo kyowan,
per xaktyee stee xaa vuelt lëë xaa xnityladzy dyon xa chak lo xaa.
25 Per lëë xaa nii xnitylasty nii xkëëtyag,
sink xsoob xaa xtiits Dios nii xteelaa meñ lo tol,
lëë Dios kuuñlay kchë xtsiiñ xaa.
26 Deel no tu xaa nii xsyak nii xsoob xaa xtiits Dios,
per xyoogwty chuw xaa,
misme lëë xaa xkyëti xaly aan nlidy nii xsoob xaa xtiits Dios.
27 Deelñee nli nii xniladzy to xtiits Tat Tios no nii kuñ do yudar psyëb ni kwnaa viud nii no kyalnë,
ni no nii ksaan do tol nii chuuñtsyey chol meñ nii nche lo kislyu.