3
Nii kuuñtsyey meñ nii xniladzy xtiits Dios
1 Beeñ ksaladzy meñ nii no nii ksoob meñ xtiits xtisy ni xtiits kchë xaa nii xñabey,
ni tsoxko meñ kuñ meñ kyalbuen.
2 Kudzy nii kñeenëdy meñ xcombañer,
ni kudzy nii kak ndoladzy meñ lo kchë xcombañer meñ.
3 Por nikle lëë no klo nguey no,
psoobty no xtiits Dios.
Kwëtañ no ni beeñtsyeey no kchë clasy cos mal ni kokniladzy no ni ptiilyni no meñ ni ptilyni gaa meñ no.
4 Per kutsiñ tse nii lëë Dios pxaal xkyalnsaak ni xkyalwkëstyoo lo kchë meñ nii nche lo kislyu,
5 aan lëë xaa pteelaa lëë no porñee pkëstyoo xaa lëë no,
lëdy porñee beeñtsyeey no cos buen.
Lëë Dios beeñ jkub lëë no worñee kwchobnis no ni lëë xKyalbini Ntson xaa bneetsy kyalmbañ kub lo no.
6 Porñee bniladzy no xtiits Jesucrist lëë xaa bneetsy xKyalbini Ntson xaa lo no.
7 Por xkyalnsaak xaa lëë xaa pteelaa lëë no lo tol parñee jkaa no kyalmbañ nii nitylody nii kneetsy xaa.
8 Nli kchë nii xñen lool.
Por ngo chakladzyaa nii chop kyon vuelt kñeelo lo meñ nii xniladzy xtiits Dios tsiin tsoxko meñ kuñ meñ cos buen.
Kchë nrii nonguial kuñ meñ por xkiiño.
9 Per sëëbtyoo lo wtilytiits nii so xnëzty,
ksaldyoo kchë cuent nii xseety dyon xa kwtedy meñkoltoo,
ni sëëbtyoo lo xtily meñ nii xtilytiits dyon xa nak xley Moisés.
Por pa xkiiñdy kchë wtilytiits ko,
so xnëztyo.
10 Deelñee no tu xaa nii chuñ meñ nii xniladzy xtiits Dios chop tiiy,
kwëntseeb lo xaa tu vuelt o chop kaa vuelt,
aan deelñee ksaldy xaa lii,
psonëz xaa.
11 Por misme xtol xaa xluuy nii sinidre xtiits Dios kik xaa.
12 Lëën kxal Artemas o Tíquico kiid tedy lool tsiñee klyañche xaa ptee nii kiid tedyoo lon Nicópolis,
porque lëën kwlokyeñ nii siko teedyaa mëë nal.
13 Beeñ Apolos ni Zenas nii xseedy ley yudar axte laañee kteedyo tiits lool parñee ni tu pe kakty falt lo xaa nëz.
14 No nii kseedy kchë meñ nii xniladzy xtiits Dios kuñ yudar tsiñee no tu lyaadzy,
parñee kyeñ meñ nii no laa jkiiñ meñ.
15 Kchësy xaa nii nche lon nu xkëëptyux lii.
Pkëëptyux kchë xaa nii xniladzy xtiits Dios nii nche ske.
Lëë lëësy Dios dyon kakni lëë do.