6
1 Xaa wiñ,
kol ksoob xtiits pxosy to,
por nonguial nii singo kuuñtsyey xaa wiñ nii ngab lo Crist.
2-3 Lo tu mandamient gon xñee:
“Psoob xtiits pxoosyoo ni xtiits xñaal parñee nle tsol ni xtse kpañoo lo kislyu re.”
Lëë primer mandamient re xñee nii lëë no jkaa tu kyalnsaak deelñee kuuñtsyeey no nii xñabey Dios.
4 Singo gak lëë do,
xaa kol,
ngui kol nee lo xiñ do.
Kuuñ klëëdy to xaa.
Kol kuuñ kseedy xaa sinak xñabey Crist.
Xaa nii xchee mos
5 Singo gak lëë do nii xkyë do xtsiiñ meñ,
kol ksoob xtiits xpixwan do lo kislyu re.
Kol ksal xaa ni kol ktsyeb xaa.
Kol kuñ cuent nii lo Crist kë do tsiiñ.
6 Tugak kol kyë tsiiñ,
lëjty xaktyee tsiñee so xpixwan do parñee kan xaa lëë do,
sink tyub styoo do kol kyë tsiiñ,
por lo Crist ngab to ni ngo gaa xyo styoo Dios.
7 Nguiool kol ko styoo do tsiñee xkyë do tsiiñ.
Kol kuñ cuent nii lo Dios kë do tsiiñ,
kuñdy to cuent nii lo meño.
8 Por nanle to nii kchësy no deelñee chootyee nak no,
lëë Dios kizh lëë no según cos buen nii beeñtsyeey no.
9 Singo gak lëë do nii xchee do mos,
ngui kol kak lo xmos to,
ktsebty to xaa.
Kol ksaladzy gaanoo nii lo Dios nii sob kpaa ngab no kchësy no aan lëdy wi xaa xkwe meñ.
Nak meñ nii xniladzy xtiits Dios sinak soldad
10 Lëë na,
beetsy,
kol kyak tusy ksa do Crist.
Kchooxsody to lo xkyalwnabey xaa.
11 Nak kchë tiits nii xluuy Dios lo do sinak tu ladx kiib nii chakw soldad.
Kol kakwo parñee kxekw to lo kchë xkyalwkëti xaatox.
12 Porque lëdy contre chol meñ lo kislyu re xtiily no,
sink contre kyalbini mal nii no leñ kpaaw.
Lëë kyalbini mal go xñabey lo kislyu nguey re.
13 Por ngo,
tsiitsy kol so lo xtiits Dios,
por nako sinak tu ladx kiib nii chakw soldad,
parñee kxekw to lo kyalnë ni kyabty to lo tol.
14 Tsiitsy kol so,
por lëë tiitsli ni lëë kyalxtisy kakni lëë do.
15 List kol kwe parñee tsikluuy do xtiits Dios nii xteelaa lo meñ.
16 Lëë xkyalwniladzy to ksuuy kchë flech nii kchoon xaatox chex to.
17 Lëë kyalwtelaa kak sinak tu cachuch kiib nii sob kik to.
Lëë gaa xtiits Dios kak sinak tu spad nii xnee Kyalbini Ntson señ do.
18 Tugak kol nee lo Dios,
kol knab nii kakni Kyalbini Ntson do.
List kol kwë,
kchosody styoo do ni kol nab por kchë meñ nii ngab lo Dios.
19 Kol nab lo Dios por naa parñee ktsyol pe kñen ni ktsyeebtyaa tsiñee kñen xtiits xaa nii xteelaa lo meñ.
20 Lëë Dios pxaal naa kanin xtiits xaa lo meñ.
Lëë na lëën no skiib.
Kol nab nii ktsyeebtyaa kluyaa xtiits xaa.
21 Lëë betsy no Tíquico nii tugak kë xtsiiñ Dios kñë lo do dyon xa non ni pe cos noyuuñtsyeyaa.
22 Por ngo lëë xaa xalaa lo do,
parñee kñë xaa xa no noo tsiin kchoobladzy xaa styoo do.
23 Lëë lëësy Tat Tios dyon ni lëë lëësy Jesucrist knee tiits nii mbëë kpañ do,
jkëstyoo lsa do xcombañer do ni kniladzy to xtiits xaa.
24 Ni lëë lëësy Dios kakni lëë do kchësy to siñee xkëstyoo Jesucrist tyub styoo do.