5
Xa kyaabini lo no
1 Xiñ Dios nak to.
Xkëstyoo xaa lëë do.
Por ngo no nii kak to sinak xaa.
2 Kol jkëstyoo meñ sinak nii pkëstyoo Crist lëë no.
Axte xkyalmbañ xaa ptee xaa parñee kpily xtol no.
Byo nii beeñtsyey xaa styoo Dios por kwyokon xaa sinak chokon tu ma aan nizh xlyaa kox ko chëpo kpaa.
3 Lëë do nii ngab to lo Dios,
nody nii tsoni do stu mguiy o stu gaa kwnaa,
ni nody nii kuuñtsyey do ni stu clasy cos yox ni kyalmbixladzy nii chuuñtsyey meñ.
4 Kñeedy to tiits yox,
ni kñeedy to tiits nii pa xkiiñdy,
ni kñeedy to tiits peedy,
por pa xkiiñdyo,
sink masy kol kool lay lo Dios.
5 Por nanle to nii ni tu xaa nii choni stu mguiy o stu gaa kwnaa,
ni ni tu xaa nii chuuñtsyey cos yox,
ni ni tu xaa nii chak mbixladzy,
sëëbty laañee xñabey Crist ni xñabey Dios.
6 Klaady to nii jkëëti chol meñ nii xñee tiits nii pa xkiiñdy lëë do,
porque por kchë cos ko lëë Dios ksaksi meñ nii xsoobty xtiits xaa.
7 Ktsiil lsady to kchë meñ go.
8 Klo nguey do,
per lëë na nii lëë do ngab lo Dios,
lëë do byaabini.
Kol tso si no xaa nyaani,
9 por lëë kyalnyaani xnee tiits nii kuuñtsyey do cos buen,
ni mbëë kpañ do ni kñee do tiitsli.
10 Kol tsoxko kuuñtsyey do nii xyostyoo Dios.
11 Kuuñtsyeydy to kchë cos nii chuuñtsyey meñ nii nyaanidy,
sink kol ksaabini lo meñ go.
12 Por axte xteladzy ñe kñee ñe nii chuuñtsyey tsilaan kchë meñ go,
13 per tsiñee lëë kchë cos xchukë lo bini,
kchësyo chak nyoo.
14 Por ngo xñee meñ:
Bna,
lii nii nixyesyoo.
Kuxche,
pchoo lady meñ kuty,
tsiin ksaabini Crist lool.
15 Por ngo,
kol kap cuent.
Kpañdy to si xkaatyee,
sink nsaaksye kol kpañ.
16 Ngui kol kwe,
kxiñdy to tiemp,
porque nguidy nak tse.
17 Kuuñtsyeydy to nii xkaatyee,
sink kol ktee nii kyeñ do pe cos chakladzy Dios.
18 Kyëdy to kunip,
por xkëëtañ nip kik meñ.
Sink kol ktee tiits nii kñabey Kyalbini Ntson lëë do.
19 Tsiñee kutiits to ksa do xcombañer do,
kol kool salmos ni cant.
Tyub styoo do kol kuuñ ksak Dios.
20 Tugak kol ktee skizh lo Tat Tios por kchë nii xneetsy xaa lo no por Jesucrist.
Kol jkëstyoo tsiil do
21 Kol ksoob lsa xtiits xcombañer do,
kol ksal lëësy Jesucrist.
22 Kwnaa,
kol ksoob xtiits tsiil do si xsoob to xtiits Crist.
23 Por lëë xaapkiy xñabey lo kwnaa,
sinak xñabey Crist lo meñ nii xniladzy xtiits Dios.
Lëë Crist xteelaa kchë meñ go.
Lo xaa ngab meñ go.
24 Aan sinak nii xsal meñ nii ngab lo Dios Crist,
singo no nii ksal kwnaa tsiil.
25 Xaapkiy,
kol jkëstyoo tsiil do,
sinak nii pkëstyoo Crist meñ nii xniladzy xtiits Dios,
axte kuty xaa por kchë meñ go.
26 Kchë ngo beeñtsyey xaa parñee kuuñ nyë xaa kchë meñ go con xtiits xaa nii xteelaa ni con nis,
27 parñee tsiñee ktsiñ meñ go lo xaa,
tsody xtol meñ go.
Ni kakty meñ go sinak tu ladx nii pxuñ lady,
sink mbëë nyë meñ go ni ntson meñ go ktsiñ lo xaa.
28 Sinak nii xkëstyoo xaapkiy xcuerp,
singo no nii jkëstyoo xaa tsiil xaa.
Kchë xaapkiy nii xkëstyoo tsiil xkëstyoo xaa lëë xaa.
29 Por ni tu cho xtilynidy xcuerp,
sink chantsi xaaw ni xyaan xaaw sinak nii chantsi Crist kchë meñ nii xniladzy xtiits Dios,
30 por lo xaa ngab no.
31 “Por ngo no nii ksaan xaapkiy pxosy xaa ni xñaa xaa,
parñee kyak tusy xaa chop tsiil xaa,
aan kaktre xaa chop meñ,
sink tugak meñ kak xaa.”
32 Nli gaa ngan nak tiits re,
per Crist ni meñ nii xniladzy xtiits Dios xseetyo.
33 Per xñee gako nii jkëstyoo xaapkiy tsiil,
ni ksoob kwnaa xtiits tsiil.