4
1 Por ngo nii xchosody styoo noo,
por skizh xkyalnsaak Dios nii bneetsy xaa tsiiñ re loo noo.
2 Karty kuuñtsyeey noo tu cos nii chak tsilaan ni cos nii xkwii kyalto.
Xkëëtidy noo meñ ni karty kaa jkëëtañ noo lo xtiits Dios.
Tiitslisy xñee noo ni Dios sye sini kik noo tsiñee xtyon noo lëë do.
3 Deelñee ngan xtiits Dios nii xluuy noo,
lo meñsye nii karty telaa lo tol ngano.
4 Per xnilasty meñ go xtiits Dios porñee lëë xaatox nii xñabey lo kislyu re pkan kik meñ go parñee kniladzy meñ go xtiits ntson Crist,
por lëë Crist chak si chak Dios.
5 Tsiñee xñee noo,
xñeedy noo nii no kik noo,
sink xñee noo nii lëë Jesucrist nak xaa nii xñabey,
ni xñee noo nii cholsye xaa nii xkiiñ lo do nak noo,
porñee xkëstyoo Jesús noo.
6 Por misme Dios nii psaabini lo nguey psaabini leñ styoo noo,
parñee con bini go kchilo tyon noo xkyalntson Dios.
Lo Jesucrist chak nyoo kyalntson go.
7 Nak xcuerp noo sinak tu kis peñ aan leeñgo no nii pkaady Dios loo noo.
Lëë noo xluuy xkyalwnabey Dios,
per lëdy xcheñ noow.
8 Por ngo,
nikxe xtyeedy noo ndaly kyalnë,
per xyaabty noo,
ni nikxe mban xtyee noo,
per xsyakty noo nii sikootyee kyaan noo.
9 Ni nikxe xkyënal meñ noo,
xsyëdy noo nonsy noo,
ni nikxe xchon meñ lëë noo lyu,
xyaandy noo sikootyee.
10 Laañee xyootyee noo,
xtyelaa kety noo si kuty Jesús,
parñee kpañ noo si pañ Jesús.
11 Por mentre mbañ noo,
cualquier tse ntseeb kety noo porñee xsoob noo xtiits Jesús,
parñee kak nyoo nii no Jesús leñ styoo noo.
12 Singo mod lëë kyalkuty chuñ xtsiiñ leñ styoo noo,
lëë kyalmbañ gaa chuñ xtsiiñ leñ styoo do.
13 Leñ kitsy nii kë xtiits Dios gon xñee:
“Bniladzyaa,
por ngo kwnen.”
Singo lëë noo porñee bniladzy noo xtiits Dios,
ngo nii xñee noow.
14 Ndon noo nii lëë Dios beeñ kpañ Jesús,
ni ndon noo nii lëë xaa kuuñ kpañ lëë no ni lëë xaa tsikni lëë no laañee sob xaa.
15 Par lëë do kok kchë cos ko,
parñee siñee xtyaly meñ nii xkaa xkyalnsaak Dios,
singo gak ktyaly meñ nii ktee skizh lo Dios por xkyalnsaak xaa.
16 Por ngo gaa nii iip xchosody styoo noo.
Por nikxe nii chox xcueerp noo,
tse con tse lëë xkyalbinii noo xkub.
17 Por lëdy cos kchë kyalnë nii xtsyool noo,
que kchë kyalnsaak nii jkaa noo.
18 Xtyoondy noo cos nii nyoo,
sink cos nii nyoody xtyon noo.
Por xtsedy xtiiy cos nii nyoo,
per lëë cos nii nyoody iip nitylodyo.