15
Lëë Jesucrist pañ
1 Beetsy,
chakladzyaa nii ksaladzy to xtiits Dios nii bluyaa lo do.
Bniladzy to tiits ko ni tsiitsy so do low.
2 Por tiits ko lëë do telaa lo tol deelñee ksaandy tow,
per deelñee ksaan dow xlyë bniladzy tow.
3 Klo nii bluuy Dios lon bluyaa lo do.
Bluyaa nii leñ kitsy nii kë xtiits Dios xñee nii por xtol no kuty Crist,
ni leñ kitsyak ko xñee
4 nii lëë xaa pkyeetsy aan tse nii kwloxo tson kpidz lëë xaa pañ.
5 Ni bluyaa nii klo lo Pedre byaklo xaa,
tsigore byaklo xaa lo ksa tsiipchop apostle.
6 Loxsye ngo tugak tiemp byaklo xaa lo kaay kyoow meñ nii xniladzy xtiits Dios,
ni ndaly gaa meñ go bii mbañ,
no gaa meñ go kutyle.
7 Tsigore byaklo xaa lo Jacob,
ni lo kchë apostle.
8 Lultime lon byaklo xaa nii nakaa sinak tu mëëd xaly.
9 Por naa nak tu xaa nii xisy non lo apostle,
per ni chilody kcholën apostle,
por kwënlagaa meñ nii xniladzy xtiits Dios.
10 Per por xkyalnsaak Dios lëën nak apostle.
Ni byaan maaldy gaan lo xaa,
sink mastre ndip xkyën tsiiñ que kchë apostle,
nikxe nii lëdy naa kë tsiiñ,
sink Dioso.
Por Dios tugak nakni naa.
11 Por precisty dyon cho mastre chuñ tsiiñ,
xtiits Dios precisy ni lëë gaaw bniladzy to.
Spañ meñ nii chety
12 Deelñee xñee noo lo do nii lëë Crist pañ,
¿penak nii no do xñee nii nlidy xpañ meñ kuty?
13 Por deelñee xpañdy meñ kuty,
ni Crist tsigo pañdy.
14 Aan deelñee pañdy Crist,
pa nondy tiits nii xluuy noo,
ni pe nandy kchë nii xniladzy to.
15 Deelñee nyak nli kchë ngo,
wnee xuuy noo,
por lëë noo niiy lo do nii lëë Dios beeñ kpañ Crist.
Per deelñee nlidy nii xpañ meñ kuty,
nlidy nii pañ Crist.
16 Deelñee xpañdy meñ kuty,
ni Crist tsigo pañdy.
17 Aan deelñee pañdy Crist,
pe nandy kchë nii xniladzy to,
ni lo tol bii no do.
18 Deelñee singo nako,
kchë meñ kuty nii bniladzy xtiits Dios kwëtañ.
19 Deelñee xaktyee lo kislyu re xsaladzy no Crist,
tu xaa nii mastre mban nak no.
20 Per pañ Crist gon.
Klootyee xaa pañ lo kchë meñ kuty nii kpañ.
21 Por sinak nii por tugak xaa kwlañ kyalkuty lo kislyu,
singo gak por tugak xaa kwlañ nii lëë meñ kuty kpañ.
22 Por Adán kchësy meñ chety.
Lëë por Crist na,
kchësy meñ kuty kpañ.
23 Per catu meñ kpañ tsiñee kchal meño.
Klo Crist pañ.
Axte tsiñee kiid Crist stub,
lëë kchë meñ nii no xlad xaa kpañ.
24 Wor go lëë kislyu nitylo,
ni wor go lëë Crist knitylo kchë xaa xñabey aan lëë xaa jko kyalwnabey ña Tat Tios.
25 Por axte lox kweekli Dios kchë meñ nii xlëë lo Crist,
axte tsigolye lëë Crist kñabey.
26 Lultime nguialkuty knitylo xaa.
27 Lëë Dios kwloo kchësy cos ña Crist.
Per tsiñee xñee kitsy nii kë xtiits Dios nii kchë cos no ña Crist,
lëdy wi Dios gon,
por lëë Dios pko kchë cos ña Crist.
28 Aan tsiñee lëë kchë cos lox kyo ña Crist,
lëë Crist kyo ña Dios,
por lëë Dios pko kchësy cos ña xaa.
Aan singo mod lëë Dios kñabey kchë kchësy cos.
29 No meñ gon xchoobnis por meñ kuty.
¿Penak chuuñtsyey meñ ngo con xpañdy meñ kuty na?
Deelñee xpañdy meñ kuty,
¿penak tsigo nii xchobnis meñ por meñ kuty?
30 ¿Ni penak nii tugak ntseeb ktsyool noo tu kyalnë?
31 Nli gon,
beetsy,
nii ksatyee tse xtyelaa ketyaa,
ni nli nii xlen nii xniladzy to xtiits Crist.
32 Deelñee styoosyaa kwlañ nii ptilynin ma tox leñ kyedzy Efeso,
pe nandyo.
Deelñee xpañdy meñ kuty,
nli xtiits xaa nii xñee:
“Kol tso tyaaw no ni kol tso tyow no.
Byeñxke kxe widzy lëë no kety.”
33 Kyëtidy to,
por nli tiits nii së sinrii:
“Lëë xaa mal xkëëtañ xaa buen.”
34 Kol jko xkyalcheñ do,
kuñdy to tol,
por no do gon xyuumbeydy Dios.
Lëën xñe nrii parñee kteladzy to.
35 Neñdy no do nladzy:
“¿Xa lë nii kpañ meñ kuty ni pe sak meñ kuty nii kpañ si chak no?”
36 Nguey do,
por tsiñee xñaa tu medzy,
klo chety medzy ko parñee klyañ tu yag.
37 Lëdy yag nii klyañ gon cholyu,
sink xaktyee xmedzyo cholyu,
nikxe xobxtily,
nikxe gaa stub clasy pniw.
38 Aan lëë Dios gon xsaa pni go sinak nii xlyañ styoo xaa,
ni catu pni go xroob lal nii xñabey Dios.
39 Xaal xaal gon nak cuerp.
Xaa nak xcuerp bñech,
xaa gaa nak xcuerp ma,
ni xaa nak xcuerp mguiñ,
ni xaa nak xcuerp mël.
40 Ni xaa gaa nyaa cuerp nii no kpaa,
ni xaa nyaa cuerp nii no lo kislyu.
Ntson cuerp,
per xaa nyaa xkyalntson cuerp nii no kpaa,
ni xaa nyaa xkyalntson cuerp nii no lo kislyu.
41 Ni stu nak xbini ngbidz lo xbini mëë,
ni xaa nak xbini mëly ni misme gaa lady mëly no ndaly clasy bini.
42 Singo gak tsiñee xpañ meñ kuty.
Xkyeetsy cuerp nii xnitylo,
aan xpañ tu cuerp nii nitylody.
43 Xkyeetsy tu cos nii yox,
aan xpañ tu cos ngui.
Xkyeetsy tu cos mban,
aan xpañ tu cos ndaan.
44 Xkyeetsy tu cuerp nii pchoo lo kislyu,
aan xpañ tu cuerp nii sëëd kpaa.
Deelñee no cuerp nii pchoo lo kislyu,
no gak cuerp nii sëëd kpaa.
45 Leñ kitsy nii kë xtiits Dios gon xñee nii klootyee Adán kok tu xaa mbañ,
per lëë Adán nii biid lultime nak kyalbini nii xnee kyalmbañ.
46 Per lëdy klo kyalbini gon biid,
sink klo cuerp kwyo.
Lultime kwlañche kyalbini.
47 Meñ lo kislyu nak klootyee mguiy nii kwyaa con yu,
per meñ kpaa nak mguiy nii biid despuesy.
48 Chak meñ lo kislyu si kok xaa nii kwyaa con yu.
Lëë meñ nii ngab kaa kpaa chak si chak xaa nii pchoo kpaa.
49 Deelñee pcho no mguiy nii kwyaa con yu,
scho no mguiy nii sëëd kpaa.
50 Kol kono gaa,
beetsy.
Chilody gon tso cuerp nii nyaa con tsit ni pëël laañee xñabey Dios,
por chilody tso cos nii xnitylo laañee no cos nii xnitylody.
51 Per lëën kniy tu cos nii nolan lo do.
Lëdy kchë no kety,
per kchë no ktsyëëlo.
52 Kolpsye,
sinak tsiñee xtiib lo no,
tsiñee lëë lultime trompet kpetsy,
lëë kchësy meñ kuty kpañ parñee kpikchedre kety meñ kuty.
Aan lëë no ktsyëëlo.
53 Por lëë xcuerp no nii xnitylo kyak tu cuerp nii nitylody.
Lëëw kyak tu cuerp nii kejty.
54 Aan tsiñee lëë xcuerp no lox kyak tu cuerp nii nitylody,
lëë xtiits Dios kak cumplir nii xñee:
“Lëë kyalkuty kwnitylo por lëë gan kok.”
55 Kyalkuty,
¿ko xkyalndaanoo na par ksaksil lëë noo?
56 Lëë tol xtee tiits parñee ksaksi kyalkuty lëë no,
ni lëë xley Moisés xtee kyalwnabey lo tol.
57 Per skizh Dios,
por lëë xaa xnee tiits nii kuuñ no gan,
porñee xniladzy no xtiits Jesucrist.
58 Por ngo,
beetsy,
tugak kol kuñ xtsiiñ Dios.
Ksaandy to ni kchooxsody to lo xtiits Dios,
por nan do lëdy singosy xniladzy to xtiits Jesucrist.