16
1 ’Lëën chutiits kazh kchë cos re lo do parñee ksaandy to xtitsaa.
2 Lëë meñ kwii lëë do ktoo ni sitsiñ tse nii këb meñ tu favor chuñ meñ lo Dios tsiñee chuty meñ do.
3 Kchë nrii kuuñtsyey meñ porñee karty kyuumbey meñ naa ni karty kyuumbey meñ Tat Tios.
4 Lëën xñe kazh nrii lo do parñee ksaladzy to nii lëëw niylaa tsiñee lëë tse go tsitsib.
Nii chuuñtsyey Kyalbini Ntson
’Niydyaa nrii lo do worñee kal bniladzy to xtitsaa,
por naa tugak kokni lëë do.
5 Per lëë na nii lëën kya lo xaa nii pxaal naa,
ni tu do xñabtiisty dyon pa kan.
6 Lëël mban chak to porñee niyaa kchë cos re lo do.
7 Nli xñen nii buen kyan.
Por deelñee kyadyaa,
kiijty xaa nii chuñ yudar.
Per deelñee kyan,
naa kxal xaa go lo do.
8 Tsiñee lëë xaa kiid,
lëë xaa kluuy lo meñ nii no xtol meñ,
ni lëë xaa kluuy nii no tu nëz tubli,
ni lëë xaa kluuy nii no xkyalxtisy Dios.
9 Lëë xaa kluuy nii no xtol meñ,
porñee xnilasty meñ xtitsaa.
10 Ni lëë xaa kluuy nëz tubli,
por lëën kya lo Tat Tios,
aan kantre to naa.
11 Ni lëë xaa kluuy nii chuñ Dios kyalxtisy.
Por ngo lëë xaatox nii xñabey lo kislyu re pkaal.
12 ’Ndalyre nii no kniyaa lo do,
per chilody kyeñ dow nina.
13 Per tsiñee lëë xaa nii nak Kyalbini Ntson kiid,
lëë xaa kluuy nonsyke tiitsli lo do,
por kñeedy xaa nii klyañ styoo xaa,
sink lëë xaa kñee kchë nii kon xaa,
ni lëë xaa kluuy cos nii nare kak.
14 Lëë xaa kuuñ ksak naa,
por lëë xaa kiidni xtitsaa lo do.
15 Kchë nii chap Tat Tios nak xcheñaa.
Por ngo nii niyaa nii lëë Kyalbini Ntson kiidni xtitsaa lo do.
Lëë kyalnë kyak kyalwle
16 ’Xtsedre kan do naa,
per kak xtsedyak lëë do kan naa stub.
17 Tsigo lëë bla xpëëdscuel xaa bislo xñabtiits lsa lo xcombañer xñee:
—¿Penak nii xñee xaa nii xtsedre tyon no xaa,
aan kak xtsedyak lëë xaa tyon no stub?
¿Ni penak nii xñee xaa nii lëë xaa kyey lo Tat Tios?
18 ¿Penak nii xñee xaa “xtsedre”?
Xyeñdy no xa nak tiits ko.
19 Lëë Jesús byeñ nii lëë xpëëdscuel xaa chakladzy kñabtiits lo xaa.
Por ngo lëë xaa chëb:
—Lëën niy lo do nii xtsedre kan do naa,
aan kak xtsedyak lëë do kan naa stub.
¿Pe nrii nonabtiits lsa do lo xcombañer do?
20 Nli xñen nii lëë do koon ni lëë do kteenë tsiñee lëë kchë meñ nii nche lo kislyu kle.
Per nikxe kteenë do,
lëë xkyalnë do kyak kyalwle.
21 Tsiñee lëë tu kwnaa kaly xiñ,
mban chak me porñee lëë xwor yoob kol.
Per tsi lëë mëëd lox chaly,
ni xsalastre me yoob nii kwë me lo kyalwle nii lëë xiñ me kwlañche lo kislyu.
22 Singo gak lëë do xteenë do nina.
Per tsi lëën kyely kan lëë do stub,
lëë styoo do kyo nguiool,
aan ni tu cho chilody kwii kyalwle go leñ styoo do.
23 ’Tsi lëë tse go tsitsiñ,
ni tu pe kñabtiistre to lon.
Nli xñen nii kchë nii kñab to lo Tat Tios porñee xniladzy to xtitsaa,
lëëw kneetsy xaa.
24 Axte nina ni tu pe karty kñab to porñee xniladzy to xtitsaa.
Kol nab nii chakladzy to,
parñee tsi lëëw kneetsy Dios,
mastre kle do.
Lëë Jesús xñabey lo kislyu
25 ’Nonsyke con cuent kwnen kchë nrii lo do.
Per sitsiñ tse nii ksodraa cuent par kuuñ ksedyaa to,
sink nëz nii xa nak Tat Tios kñen lo do.
26 Tse go yuub to kñab nii kakladzy to lo Tat Tios porñee xniladzy to xtitsaa.
Xkiiñdy nii naapee kñe lo Tat Tios.
27 Por xkëstyoo Tat Tios lëë do,
porñee xkëstyoo do naa,
ni porñee bniladzy to nii lëë Tat Tios pxaal naa.
28 Lo Tat Tios pchon byelyaa lo kislyu.
Per lëë na lëën kpi lo kislyu par kyan lo Tat Tios stub.
29 Tsigo lëë xpëëdscuel xaa chëb:
—Na si nagon,
xyeeñ noo nii xñeel,
aan xsodroo cuent par kñeel.
30 Na si nagon,
xtyon noo nii xaa chak nakoo.
Xkiiñdy nii cho kñabtiits lool.
Por ngo xniladzy noo nii lëë Dios pxaal lii.
31 Tsigo lëë Jesús chëb:
—Xniladzy to nina,
32 per sitsiñ wor ni lëëw kutsiñle gaa nina nii lëë do kchoots klyaal,
aan lëë do ksaan naa nonsyaa.
Per sodyaa nonsyaa,
lëë Tat Tios nakni naa.
33 Lëën bitiits kchë nrii lo do parñee pe tsinidy kik to,
por naa nakni lëë do.
Mban tedy to lo kislyu re,
per ktsyebty to,
por naa xñabey lo kislyu.