15
Lëë Jesús so lo Pilat
(Mt. 27:1-2, 11-14 ; Lc. 23:1-5 ; Jn.18 :28-38 )
1 Tsiñee lëë lyu byaani lëë xaa nii xñabey lo pxosy,
ni xaa kol,
ni maestre ley ni kchësy xaa non ptyop.
Lëë xaa pxituu Jesús aan lëë xaa kuni xaa lo Pilat.
2 Lëë Pilat kwnabtiits lo Jesús chëb:
—¿Pe lii nak xrey meñ Israel?
—Lii në nii naaw —chëb Jesús.
3 Ndaly nii pkëëkiy xaa nii xñabey lo pxosy xaa.
4 Lëë Pilat bikche kwnabtiits lo xaa chëb:
—¿Penak nii xñeedyoo?
Buy gaanoo blaktre nii xkëëkiy kchë xaa gue lii.
5 Per ni tu pe kwneedy Jesús.
Tsi kon Pilat ngo,
ntseeb psee styoo xaa.
Lëë Jesús no skiib par kety xaa
(Mt. 27:15-31 ; Lc. 23:13-25 ; Jn.18 :38-19:16)
6 Mer lni xlaa Pilat tu xaa nii no skiib,
tu xaa nii kñab meñ kyedzy.
7 Lëëtyee leñ tse go lëë tu xaa nii lë Barrabás no skiib ksa stubla xaa ntseeb porñee kukyeety xaa meñ worñee ptilyni xaa xaa xñabey.
8 Lëë meñ kunab lo Pilat nii klaa xaa tu xaa nii no skiib sinak nii chuuñtsyey xaa cad iz.
9 Tsigo lëë Pilat kwëb chëb:
—¿Pe chakladzy to nii klaan xrey meñ Israel?
10 Porñee byeñ xaa nii por kyalmbidy kwnaasy xaa nii xñabey lo pxosy Jesús.
11 Per lëë xaa nii xñabey lo pxosy pkiily meñ parñee kñab meñ laa Barrabás.
12 Lëë Pilat kwnabtiits chëb:
—¿Xa kuñaa xaa nii xñee do xrey meñ Israel tsigo?
13 Tsigo kchësy meñ kwchuptsyë xñee:
—¡Pkëë xaa lo crusy!
14 Tsigo lëë Pilat chëb:
—¿Per pe cos nak xtol xaa?
Per lëë meñ bikche kwchuptsyë stub xñee:
—¡Pkëë xaa lo crusy!
15 Tsigo lëë Pilat,
como kokladzy xaa nyaan buen xaa lo meñ,
lëë xaa blaa Barrabás.
Aan loxsye kwnabey xaa ptee meñ cheñ Jesús,
lëë xaa kwloo xaa ña meñ nii jkëë xaa lo crusy.
16 Lëë bla soldad kuni Jesús chu yulyey aan siko lëë kchë soldad ptyop.
17 Lëë xaa pkakw Jesús tu ladx nixñë yë ni lëë xaa psoob tu coron kitsy kik xaa.
18 Loxsye ngo lëë xaa bislo kwchuptsyë xaa xñee xaa:
—¡Byinayk xrey meñ Israel!
19 Ni pxob soldad yag kik Jesús,
ni pchoo mxeñ soldad xaa,
ni psoxib xaa lo Jesús sinak nii xsoxib meñ lo tu xaa non.
20 Loxsye kwtsityni xaa Jesús,
lëë xaa kwlii ladx nixñë yë go lady xaa aan lëë xaa pkakw xaa mer xab xaa.
Tsigo lëë xaa sini xaa par jkëë xaa xaa lo crusy.
Lëë soldad xkëë Jesús lo crusy
(Mt. 27:32-44 ; Lc. 23:26-43 ; Jn.19 :17-27 )
21 Lëë tu xaa kyedzy Cirene nii lë Simoñ bikche tañ.
Alejandro ni Rufo nak xiñ xaa.
Aan tsiñee lëë xaa kwtedy kexka laañee nche meñ,
lëë soldad pkoy xoo xaa xicrusy Jesús.
22 Lëë xaa kuni Jesús tu laañee lë Gólgota.
(Lëë tiits ko nak sinak nii xñee ñe:
Laañee no tsit kik meñ kuty.)
23 Siko lëë xaa pteedy viñ nii nots tub clasy kizh nii lë mirra lo Jesús,
per kowdy Jesúso.
24 Loxsye ngo lëë xaa pkëë xaa lo crusy.
Ni lëë soldad kwloo xab Jesús rif parñee dyon pe cos kchal catu xaa.
25 Las nueve nak sily nii pkëë xaa Jesús lo crusy.
26 Pkëë xaa blalan tiits kik xicrusy Jesús laañee xñee penak kë xaa lo crusy,
xñeew sinrii:
“Xrey meñ Israel.”
27 Wi chop ngbaan kwë ksa xaa lo crusy,
tu xaa nëzli,
stu xaa nëzpeg.
28 Pkab Jesús lady meñ mal sinak nii këpeew leñ kitsy nii kë xtiits Dios.
29 Kchësy meñ nii xtyedy laañee kë Jesús lo crusy xkotsyetsy ni xtsiiy kik xñee:
—¿Pe chanlo na?,
lii nii xchonoo lidzy Dios aan tsonak kpidz lëëw tse xsoblil stub.
30 Pteelaa lii ni byety lo crusy.
31 Singo gak kwtsityni xaa nii xñabey lo pxosy xaa ni maestre ley xñee xaa:
—Pteelaa xaa stu meñ,
per chilody kteelaa xaa lëë xaa.
32 No nii kyety xaly Crist ke lo crusy nina kazh parñee kniladzy no nii nli lëë xaa nak xrey meñ Israel.
Aan axte wi chop ngbaan nii kwë kwi xaa lo crusy kwlootsyetsy xaa.
Xkyalkuty Jesús
(Mt. 27:45-56 ; Lc. 23:44-49 ; Jn.19 :28-30 )
33 Tsiñee lëë xwe ngbidz kol lëë kislyu pkyey aan lëëw byaani axte las tres wor wtse.
34 Aan misme wor go lëë Jesús kwchuptsyë xñee xaa:
—Eloi,
Eloi,
¿lema sabactani?
(Tiits ko nak sinak nii xñee ñe:
Tat Tios,
Tat Tios,
¿penak nii psaanoo naa?)
35 Lëë bla xaa nii nche siko biñ nii kwnee Jesús aan lëë xaa chëb:
—Kol kon gaa,
profet Elías xkwetsy xaa.
36 Tsigo lëë tu xaa nii so siko lëënlëdy kujkadz tublë sponj lo viñ la.
Lëëw psoob xaa lo tublë punt yag aan lëëw ptsig xaa lo Jesús parñee nyi Jesúso,
xñee xaa:
—Kol ksaan xaa dyon pe siid klity Elías xaa lo crusy.
37 Per lëë Jesús kwchuptsyë nguiedzy aan lëë xaa kuty.
38 Ni lëë ladx nii kë leñ lidzy Dios pchos nsoli.
39 Tsiñee lëë xaa nii xñabey lo kchë soldad nii nche siko kon xa kuty Jesús,
lëë xaa chëb:
—Nli nii Xiñ Dios nak mguiy re.
40 Wi bla kwnaa nche sit xuy.
Lady kchë kwnaa go no María Magdalena,
ni Salomé,
ni Mariy.
Xiñ Mariy nak Jacob xaa nii nak xaa nyab ni José.
41 Lëë ksa kwnaa re beeñ xyudar Jesús worñee kwyo xaa nëz Galilea.
Ni ndaly re kchë kwnaa nii ptsiñ Jerusalén ksa Jesús nche siko.
Lëë Jesús xkyeetsy
(Mt. 27:57-61 ; Lc. 23:50-56 ; Jn.19 :38-42 )
42 Tsiñee lëë tse go ptsye lëë meñ no wxixkwaa par tse nii xiladzy meñ lo tsiiñ.
43 Lëë José xaa kyedzy Arimatea kwloo valor lo aan lëë xaa kunab xcuerp Jesús lo Pilat.
Wi xaa nak tu xaa non Israel,
ni wi gaa xaa këmbës nii lëë Dios kñabey.
44 Ntseeb psee Pilat biñ xaa nii lëë Jesús tse lox kuty.
Lëë xaa kwtsyetsy xaa nii xñabey lo soldad parñee kñabtiits xaa dyon pe nliw.
45 Tsiñee lëë xaa nii xñabey lo soldad chëb nii nliw,
lëë Pilat ptee tiitspey tsiklity José xcuerp Jesús lo crusy.
46 Tsigo lëë José kusi tublë ladx rusy,
lëë xaa blity xcuerp Jesús lo crusy aan lëëw pchal xaa ladx ko.
Loxsye ngo lëë xaa kujkeetsy Jesús leñ tu paa nii ndeeñ lo kyo.
Ptse gaa xaa chu paa con tu kyo.
47 Aan lëë María Magdalena ni Mariy xñaa José kon pa pkyeetsy Jesús.