11
Lëë Jesús xsyëëb leñ kyedzy Jerusalén
(Mt. 21:1-11 ; Lc. 19:28-40 ; Jn.12 :12-19 )
1 Tsiñee lëë xaa ptsiñ kex Jerusalén laañee nche kyedzy Betfagé ni kyedzy Betania laañee nyoo sob kiy nii lë Olivos,
lëë Jesús pxaal chop xpëëdscuel
2 chëb xaa lo xaa:
—Kol tsi kyedzy nii nche kexka ske aan tsiñee ktsiñ do,
lëë do kan tu burr nii këtuu.
Ni tu cho karty sob lady ma.
Kol klaa ma aan kol tëni ma.
3 Aan deelñee cho kñabtiits lo do penak xlaa do ma,
kol këb nii naa jkiiñ ma.
Na kakni gakaa ma.
4 Lëë xpëëdscuel xaa si,
aan tsiñee lëë xaa ptsiñ kyedzy ko,
lëë xaa kon nii lëë burr këtuu kex tu chu yu laañee xtye nëz aan lëë xaa blaa ma.
5 Aan lëë bla meñ nii nche siko chëb lo xaa:
—¿Pe cos chuñ do?
¿Penak nii xlaa do burr gue?
6 Tsigo lëë xaa chëb si chëb Jesús lo xaa.
Aan lëë meñ blaa biy xaa ma.
7 Tsi lëë xaa ptsiñni ma laañee so Jesús,
lëë xaa pxob xab xaa lady ma aan lëë Jesús kwsob lady ma.
8 Aan ndaly meñ ptañ xab lo nëz.
No gaa meñ pchug xikw yag aan kwleek meño lo nëz.
9 Tsigo lëë kchësy meñ nii nech ni meñ nii nal bislo kwchuptsyë xñee:
—¡Skizh Dios!
¡Xaatee buen xaa nii pxaal xaa lo no!
10 ¡Skizh Dios nii lëë xaa pxaal tu xaa nii kñabey lëë no sinak kwnabey rey David!
¡Kol ktee skizh lo Dios!
11 Singo kwsëëb Jesús leñ kyedzy Jerusalén ni leñ lidzy Dios.
Aan loxsye buy xaa kchësy cos nëz re nëz rek,
lëë xaa si Betania ksa xaa ksa tsiipchop xpëëdscuel xaa porñee lëë tse ptsyel.
Lëë Jesús xtsiibtee yag yegw nii këdy nex
(Mt. 21:18-19 )
12 Lëë byaani lyu lëë xaa bi Betania,
aan lëë Jesús kwlaañ.
13 Aan sitre so xaa kon xaa tub xan yag yegw nii singootyee no xikw.
Aan lëë xaa kukuy dyon pe kë yegw,
per këdyo.
Xaktyee xiplago singootyee xña porñee lëdy xtiemp yegw.
14 Tsigo lëë Jesús kwnee lo yag yegw,
chëb xaa:
—Ni tu cho kpikchedre kaw xnexoo.
Aan biñ xpëëdscuel xaa nii kwnee xaa.
Lëë Jesús xlëë lo meñ leñ lidzy Dios
(Mt. 21:12-17 ; Lc. 19:45-48 ; Jn.2 :13-22 )
15 Loxsye ngo lëë xaa ptsiñ leñ kyedzy Jerusalén.
Aan tsiñee lëë Jesús kwsëëb leñ lidzy Dios,
lëë xaa bislo kwlii xaa kchësy meñ nii nche kto ni nche si siko.
Ptische xaa xmezh meñ nii no ktsëë tumi lo xcombañer,
ni ptische xaa xyagxily meñ nii xto palom,
16 ni blaady xaa nsyëëb meñ nii noy pe cos leñ lidzy Dios.
17 Aan lëë xaa bislo beeñ kseedy xaa meñ xñee xaa:
—Leñ kitsy nii kë xtiits Dios gon xñee:
“Lidzyaa kak tu laañee kiidnee kchësy meñ lo Dios”,
per lëë do byuño lidzy ngbaan.
18 Lëë xaa nii xñabey lo pxosy ni maestre ley biñ nii kwnee Jesús.
Ngo nii lëë xaa bislo byub xaa mod par kuty xaa xaa.
Nli gaa nii ptsyeb xaa Jesús porñee kon xaa kchësy meñ psee biñ xiwseedy Jesús.
19 Per tsiñee lëë lyu pkyey lëë Jesús pchoo kyedzy ksa xpëëdscuel.
Lëë yag yegw xpidzy
(Mt. 21:20-22 )
20 Lëë byaani stu lyu silyga,
lëë xaa kwte kexka xan yag yegw aan kon xaa nii axte luw pidzy.
21 Tsigo lëë Pedre psaladzy nii chëb Jesús lo yag yegw ko aan lëë xaa chëb:
—Maestre,
buy gaanoo lëë yag yegw nii ptsiibteel pidzy.
22 Tsigo lëë Jesús kwëb chëb:
—Kol kniladzy Dios.
23 Por nli xñen deelñee cho këb lo kiy re:
“Bichee nu aan kukyab lo nistoo”,
aan xkandy kik xaa,
sink xniladzy tyub styoo xaa nii lëë nii xñee xaa kak,
tsigo sako.
24 Por ngo lëën xñe lo do nii kchësy nii kñab to lo Dios,
deelñee xniladzy to nii lëëw chaple to,
lëëw kap to.
25-26 Aan tsiñee lëë do noyutiitsni Dios,
kol knityladzy tol nii ngo xcombañer do lo do parñee ktsily pxosy to nii sob kpaa xtol do.
Xkyalwnabey Jesús
(Mt. 21:23-27 ; Lc. 20:1-8 )
27 Tsiñee lëë xaa ptsiñ Jerusalén stub,
lëë Jesús kwsëëb leñ lidzy Dios,
aan lëë xaa nii xñabey lo pxosy,
ni maestre ley,
ni bla xaa kol big lo xaa
28 aan lëë xaa kwnabtiits chëb xaa:
—¿Cho bneetsy tiitspey lool par kuuñtsyeyoo kchë nii chuuñtsyeyoo?
29 Tsigo lëë Jesús kwëb chëb:
—Wi gak gaan dyon kñabtiits tu cos lo do.
Deelñee snë dow na,
tsigo sniyaa cho xtiitspey chuuñtsyeyaa kchë cos re.
30 ¿Cho pxaal Juan dyon biid kchoobnis xaa?
¿Pe Dioso ote no chol meñ lo kislyu rew yak?
Kol nëw dyon.
31 Tsigo lëë xaa go bislo ptilytiits lsa xñee xaa:
—Deelñee tyeesy no nii Dios pxaal xaa,
kñë xaa lo no:
“¿Penak tsigo bnilasty to nii bluuy xaa?”
32 Lëë deelñee tyeesy no nii chol meñ lo kislyu re pxaal xaa,
no nii ktsyeb no meñ,
por kchësy meñ xniladzy nii nli xtiits Dios bluuy Juan.
33 Por ngo lëë xaa chëb lo Jesús:
—Ndondy noow.
Tsigo lëë Jesús kwëb chëb:
—Per ni naa ngo busy kniydy dyon cho xtiitspey chuuñtsyeyaa kchësy cos re.