17
Lëë Jesús chutiitsni Moisés ni Elías
(Mr. 9:2-13 ; Lc. 9:28-36 )
1 Tse nii kwloxo xoop kpidz,
lëë Jesús kwey tu kiy nii per nli busy klaa,
aan xaktyee Pedre,
ni Jacob,
ni betsy Jacob nii lë Juan kuni xaa.
2 Siko xña lo xaa lëë Jesús ptsyëëlo.
Bibëly lo Jesús sinak xpibëly lo ngbidz ni byak nguitsy xab xaa sinak nguitsy bini.
3 Ni lëë xaa kon nii lëë Moisés ni lëë profet Elías ncheyutiits ksa Jesús.
4 Tsigo lëë Pedre chëb lo Jesús:
—¡Xaatee mbëë nche no nu!
Pe chakladzyoo nii ksan tson yu yagxiidy,
tuwo par lii,
stuwo par Moisés,
stuwo par profet Elías.
5 Lëë Pedre bii nonee,
tsiñee lëë tu xkey nii xpibëly ptyaagw laañee nche xaa aan lëë xaa kwnity lo xkey go ni lëë xaa biñ nii lo xkey go pchootsiy tu xaa nii chëb:
—Lëë xiñaa nrii.
Naa kwle xaa ni xkëstyoon xaa.
Kol jkëëtyag xtiits xaa.
6 Tsiñee lëë xpëëdscuel Jesús biñ ngo,
lëë xaa byab ndooslo lo lyu porñee ptsyeb xaa.
7 Per lëë Jesús big kwtap xitsy xaa chëb:
—Kol tsische.
Ktsyebty to.
8 Aan tsiñee lëë xaa blis lo xaa,
ni tu cho kontre xaa,
xaktyee Jesús so siko.
9 Tsi lëë xaa siksëëb chex kiy go,
lëë Jesús chëb lo xpëëdscuel:
—Ni tu cho lo kutiisty to nii kon do.
Kol kwës axte tse nii kpañ mguiy nii pxaal Dios.
10 Tsigo lëë xpëëdscuel Jesús kwnabtiits:
—¿Penak nii xñee maestre ley nii klo profet Elías kiid?
11 Lëë Jesús chëb:
—Nli nii klo Elías kiid kweekli kchë cos.
12 Per lëë Elías biidle,
aan byuumbeydy meñ xaa,
sink lëë meñ psaksi xaa sinak nii ksaksi meñ mguiy nii pxaal Dios.
13 Tsigore lëë xpëëdscuel Jesús byeñ nii lëë Juan Bautist biid xlugar profet Elías.
Lëë Jesús chuuñ kyak tu xaa wiñ
(Mr. 9:14-29 ; Lc. 9:37-43 )
14 Tsiñee lëë xaa ptsiñ laañee nche meñ,
lëë tu xaa psoxib lo Jesús aan lëë xaa chëb:
15 —Pkëstyoo xiñganaa,
por chetyë xaa aan tir xsaksi kyalkits re xaa.
No wor xchono xaa lo ki o lo nis kaa.
16 Lëë xaa byelynin lo xpëëdscueeloo,
per pchilody xpëëdscueeloo nyuñ kyak xaa.
17 Lëë Jesús chëb:
—¡Natsypee nguiedzy styoo do ni xnilasty to Dios!
¿Axte pa wor këb ñe nii lëën ksaladzy lëë do?
¿Pa slal tiemp no nii kxekwaa lo do?
Kol tëni xaa wiñ go nu dyon.
18 Lëë Jesús kwëntseeb lo kyalbini mal go aan lëëw kwlii xaa leñ styoo xaa wiñ go aan wor go kazh lëë xaa byak.
19 Loxsye byaan Jesús nonsy,
lëë xpëëdscuel xaa chëb:
—¿Penak nii pchiloody noo ngwii noo kyalbini mal go?
20-21 Tsigo lëë Jesús chëb:
—Porñee bnilasty to nii lëë Dios kuuñ kyak xaa wiñ go.
Nli xñen nii nikxe palalsye xniladzy to Dios schilo këb to lo kiy re:
“Bichee nu,
kusob stu lugar”,
aan lëë kiy kpichee.
Por kchë nii no styoo meñ nii xniladzy Dios chak cumplir.
Lëë Jesús xñee nii lëë xaa kety
(Mr. 9:30-32 ; Lc. 9:43-45 )
22 Nëz Galilea kënsë Jesús tsiñee lëë xaa chëb lo xpëëdscuel xaa:
—Lëë mguiy nii pxaal Dios jkaa ña meñ.
23 Aan lëë meñ kuty xaa,
per tse nii loxo tson kpidz,
lëë xaa kpañ.
Mban ptee styoo xpëëdscuel xaa biñ nii chëb xaa.
Xaa nii xtop tumi
24 Tsiñee lëë Jesús ptsiñ leñ kyedzy Capernaum ksa xpëëdscuel,
lëë xaa nii xtop tumi nii xkiiñ leñ yu nii lë lidzy Dios kunabtiits lo Pedre chëb:
—¿Pe xsoob xmaestroo tumi nii xtop noo?
25 —Xsoob xaaw —chëb Pedre.
Tsiñee lëë Pedre byo leñ yu,
klo Jesús kwnee chëb:
—¿Pe nëël dyon,
Simoñ?
¿Cho lo xtop rey tumi:
pe lo xaa xkyedzy xaaw,
ote lo xaa sito yak?
26 Tsigo lëë Pedre chëb:
—Lo xaa sito.
Chëb kaa Jesús:
—Nody tsigo busy nii ksoob xaa xkyedzy tumi.
27 Per parñee kody no falt lo meñ,
kwey chu nistoo aan kwlii tu mël.
Leñ chuw ma no tumi.
Skaa tumi go tsitixoo nii nsëbaa ni nii nsëëboo lo xaa nii xtop tumi.