¿Plo nde re yalbyo nde yalnkwan' kwent xij go'?

¿Cho nanakte lega xgab men nde re jwan' narax nzo len' lazo' men?

2 Ndyabla's go' keno go' jwan' nde nangenod go'y;

jwan' nasa nguj go' men.

Nde axta ndoyol go' ndyabla's go' jwan' ngeno tib men nde nxi tin lazo' go' tak nangenod go' jwan' nchola's go',

tak nanyabta go'y lo Dios.

3 Nya'b go'y lo Dios nde nandad Xa'y,

tak narax nya'b go'y,

ben'ta nya'b go'y sa ko' go' yalnale lazo' go' lo izyo re'.

4 Nak go' xaja ti men nkwin'no sal' na'.

¿Cho na'nyed go' le' yalke' lazo' re jwan' narax lo izyo re' nak nanke'd lazo' men Dios?

Choja men jwan' ke' lazon' re jwan' narax lo izyo re',

xa' ya nak men nanke'd lazon' Dios.

5 ¿O ndli go' xgab le' xki's Dios ben'ta nale nchaba:

“Le' Mbi Nayon jwan' mda' Xa' lo na' no toza na' ”?

6 Le' Dios ndlasto toz Xa' men kon yalwen chan' Xa',

jwan' nasa nchab xki's Xa':

“Dios nandryo'd lazo' Xa' re men nchak naro,

le' Xa' nda' yalwen lo re men nado'.”^a

7 Bxobyek go' Dios.

Nata'd go' di's tokan Maxu' go' nde le' Maxu' xyon' lo go.

8 Bike gax go' lo Dios sa bike gax Dios lo go'.

Re go' nzob xken na',

bla' go' jwan' narax nak go';

nde go' jwan' nchak rop xgab na',

ptombi go' lazo' go'.

9 Blo nabil lazo' go',

bli go' xgab lo jwan' narax mbli go' nde bin' go'.

Le' jwan' nxi go' yolala win',

nde le' yalnale chan' go' yolala xgab.

10 Gok go' men nado' lo Dios,

nde lilal Xa' go' tib men ntak.