Sukan ni kandija Abraham ma ja ni jiñaꞌa Suꞌsi ma, sukan jín kondikin tna o jin saꞌa o
4
¿Te naxe jin kaꞌan o ja kuu tnaꞌa o tee ni yo nani Abraham ma?
¿Nawa ni niꞌi maa de ja kuu maa de?
2 Nute kuechi ja ni yo saꞌa de ma te jin kuñaꞌa i ja in tee saꞌa ja vaꞌa kúu de chi savixi de maa de.
Kovaa nuu Suꞌsi ma masu kuu jin savixi o maa o.
3 Vaa ¿nawa káꞌan tutu ndee tnuꞌu Suꞌsi ma?
Káꞌan i ja:
“Abraham ma chi ni kukanu ini de Suꞌsi ma,
te ni ndakaꞌan ni ndakachi ya ja in tee saꞌa ja vaꞌa ja ndaa kúu de.”
4 Vaꞌa‑ni,
vaa ñayii satniñu ma chi masu kuu kaꞌan o ja ja skutaꞌvi ñaꞌa jitoꞌo i ma kúu ja ni chuyaꞌvi de i ma chi ja ni satniñu i ma kúu.
5 Kovaa Suꞌsi ma kúu iya saꞌa ja onde ñayii ka saꞌa ja uꞌvi ma te ka ndiso kuechi i ma chi kuu jin ko kuu i ñayii jin ko saꞌa ja vaꞌa ja ndaa.
Nuna jin kukanu ini i Suꞌsi ma,
te kaꞌan Suꞌsi ma ja kuechi ja ni ka kukanu ini i ya ma,
te ñayii vaꞌa ni ka nduu i.
6 Suni sukan káꞌan David ma ja vaꞌa xeen kúu ñayii ja visi ñatuu na ja vaꞌa ni yo saꞌa i ma kovaa ni kukanu ini i Suꞌsi ma,
te ni kuatundiꞌya ñaꞌa ya,
te ni nduu i in ñayii saꞌa ja vaꞌa ja ndaa.
Vaa saꞌa káꞌan David ma:
7 ¡Naka vii naka vaꞌa ka kuu ñayii ja ni sakanu ini Iya Tátnuni ma kuechi i ma
te ni ka naa ndaka ja uꞌvi ni ka yo saꞌa i ma!
8 ¡Naka vii naka vaꞌa kúu ñayii ja ñatuu ndánduku Iya Tátnuni ma kuenda ndaka ja uꞌvi ni yo saꞌa i ma!,
kúu de káꞌan de.
9 Te tnuꞌu mani ja ni kaꞌan David ma,
¿nawa ka jani ini ni?
¿Ja jin kuu maa in‑ni ñayii judío ma kúu,
xi suni ni kaꞌan de ja jin kuu ñayii masu ñayii judío ka kuu i ma?
Ja jin kuu ndaka o kúu,
vaa káꞌan sa ja Abraham ma chi ni kukanu ini de Suꞌsi ma,
te ni ndakaꞌan ni ndakachi ya ja in tee saꞌa ja vaꞌa ja ndaa kúu de.
10 ¿Te naxe ni iyo de nuu ni káꞌan Suꞌsi ma sukan?
¿In tee yitnuni sukan ka yitnuni tee judío ma kúu de nuu ni kaꞌan Suꞌsi ma sukan,
xi in tee ñatuu kitnuni‑ka kúu de?
Masu in tee yitnuni kúu de.
Ñaꞌa chi in tee ñatuu kitnuni‑ka kúu de nuu ni kaꞌan Suꞌsi ma sukan.
11 Kovaa jâ ni kukanu ini de Suꞌsi ma visi ñatuu kitnuni‑ka de ma,
sani te ni jakitnuni de,
sukan‑vaꞌa ko kuu i in seña ja kaxtnuꞌu i ja jâ ni kukanu ini de Suꞌsi ma te ni kandija de ja káꞌan Suꞌsi ma te jâ ni nduu de in tee saꞌa ja vaꞌa ja ndaa.
Te chukan kúu ja iyo de ja ko kuu de yuva ndaka ñayii ka kukanu ini Suꞌsi ma visi ñatuu ka yitnuni tee ma,
vaa káꞌan Suꞌsi ma ja jâ ni ka nduu i ñayii ka saꞌa ja vaꞌa ja ndaa sukan játna ini maa ya ma.
12 Te suni Abraham ma,
kúu de yuva ndaka ñayii judío ja ka yitnuni i ma.
Kovaa masu yuva ndaka ñayii judío ma kúu yuva o Abraham ma,
nú masu ja kúu de yuva nanimaa ñayii judío ka saꞌa sukan ni yo saꞌa maa de ma.
Na ko kaꞌan o ja kúu de yuva ndaka ñayii ka kukanu ini Suꞌsi ma‑ni,
sukan ni yo kukanu ini maa de Suꞌsi ma nuu ñatuu kitnuni‑ka de ma.
13 Te ni skuiso Suꞌsi ma nuu Abraham ma ja maa de jiꞌin saꞌya tata de ma,
jin kutaꞌvi de jiꞌin i ni‑kaꞌnu ñuu ñayivi a.
Kovaa masu kuechi ja ni saꞌa de ndaka ja ni kaxtnuꞌu Moisés ma kúu ja ni skuiso Suꞌsi ma sukan ma.
Nú masu ja kuechi ja ni kukanu ini de Suꞌsi ma kúu,
te ni nduu de tee saꞌa ja vaꞌa ja ndaa.
14 Vaa nute ñayii ka saꞌa ndaka ja ni kaxtnuꞌu Moisés ma,
jin ko kuu i ñayii jin kutaꞌvi ni‑kaꞌnu ñuu ñayivi a chi ñatuu jiniñuꞌu ja jin kukanu ini o maa Suꞌsi ma,
te masu nde jiniñuꞌu tnuꞌu ni skuiso Suꞌsi ma nuu Abraham ma.
15 Vaa tnuꞌu ni kaxtnuꞌu Moisés ma,
saꞌa i ja ndákiti ini Suꞌsi ma nuu o a,
nú ñatuu kándija o te ñatuu saꞌa o sukan káꞌan ma.
Kovaa nú ñatuu kuni‑ka o tnuꞌu ni kaꞌan ni kachi Moisés ma chi masu saꞌa o ja ndakiti ini Suꞌsi ma nuu o nawa ni saꞌa maa o ma,
vaa ñatuu kuni‑ka o ma.
16 Chukan kúu ja ka jini o ja kuechi ja ka kukanu ini o Suꞌsi ma,
te jin ndaniꞌi o ja ni skuiso ya ma ja skutaꞌvi ñaꞌa ya ma.
Te ja ndaa ndija ja jin ndutaꞌvi saꞌya tata Abraham ma sukan ni skuiso Suꞌsi ma.
Kovaa masu maa in‑ni ñayii ka saꞌa sukan ni kaxtnuꞌu Moisés ma,
jin ndutaꞌvi sukan ni skuiso Suꞌsi ma,
chi suni ñayii ka kukanu ini Suꞌsi ma te ka kuu i sukan ni yo kuu Abraham ma,
jin ndaniꞌi taꞌvi tna i.
Vaa yuva ndaka o kúu de.
17 Suni sukan káꞌan tutu ndee tnuꞌu Suꞌsi ma,
ja ni jiñaꞌa ya nuu Abraham ma:
“Jâ ni sunkani ñaꞌa sa ja ko kuu ni yuva kuaꞌa ñuu.”
Sukan ni jiñaꞌa Suꞌsi ma,
vaa ni kukanu ini de ya ja kuu ndaxteku ya ñayii ni ka jiꞌi ma te kuu kaꞌan ya ja ndaka ja ñatuu ka ndeꞌya o a ñuu ñayivi a,
kuenda tnuꞌu ja jâ ka iyo i kúu.
18 Te Abraham ma chi ni kukanu ini de Suꞌsi ma,
visi ñatuu kuni‑ka de naxe ko kuu ja saꞌa ya ja ni skuiso ya nuu de ma,
vaa suu de ko kuu yuva ñayii ndaka ñuu ma.
Vaa saꞌa ni jiñaꞌa Suꞌsi ma:
“Sukan kuaꞌa tiuxini ka iyo andivi ma,
sukan kuaꞌa saꞌya tata ni ko kuu”,
kúu ya jiñaꞌa ya.
19 Te visi jâ ni kuu nijaꞌnu de te ñatuu‑ka na tnuꞌu ndee tnuꞌu ndatnu yikikuñu de ma vaa jâ yiꞌi de cientu kuiya,
te Sara ma chi in ñaꞌa masu kuu koo saꞌya kúu ña,
kovaa ñatuu ni sanuu de chi ni kukanu ini de Suꞌsi ma.
20 Te ñatuu ni jani uu ni jani uni ini de chi ni kandija de sukan ni skuiso Suꞌsi ma,
te ûni ni kukanu ini‑ka de ya,
te ni ndachiñuꞌu de ya.
21 Vaa ni kandija de ja ni kaꞌan Suꞌsi iya kúu saꞌa ndaka ma,
te ni kukanu ini de ya ja saꞌa ya ndaka sukan ni skuiso ya ma.
22 Chukan kúu ja:
“Ni ndakaꞌan ni ndakachi Suꞌsi ma ja in tee saꞌa ja vaꞌa ja ndaa kúu de.”
23 Te masu ja kuu maa in‑ni de kúu ja ndee tnuꞌu ni kaꞌan Suꞌsi ma.
24 Suni ja jin kuu tna o kúu ja káꞌan tnuꞌu Suꞌsi ma,
nú ka kukanu ini o Suꞌsi iya ni saꞌa ja ni ndateku Jesucristo ma neꞌun ñayii ni ka jiꞌi ma.
25 Te Jesucristo ma chi ni jiꞌi ya kuechi ja uꞌvi ni ka yo saꞌa o ma,
te ni ndateku ya,
sukan‑vaꞌa yoꞌo,
te jin kukanu ini o ya,
te jin ko kuu o ñayii ka saꞌa ja vaꞌa ja ndaa sukan játna ini Suꞌsi ma.