22
Tawamhã hâiwa hawi romhuri'wa hã ma tô duré ĩma hâi'ré, â u'â dahâimana u'âsi zém nhomri'wa hã. Â i'â zarob'a uptabi simhi ne hã. 'Re ihâimana u'âsi mono duré Pone'ẽrebâ i'rare zama 're isãmra mono zém hawi te tipraba. 2 'Ri nho'õmo ãma 'ri nhi'riti nho'õmo wa'wa te tipraba. Duré wede â ipraba zada'ré si'uiwa na isãna'rata si'uiwa sisa'ridi hã te tame 're sa, i'rã da te 're huri mono wa, dahâimana u'âsi zém nhomri'wa hã. 12 na i'rãi mono bâ wahu nhidâpâ 're i'rãi mono hã, tô misi si a'amo sidâpâ. Duré isu hã dawamri mono bâ 're idahâimana za'ra mono, apâ ãma 're idazéptâ'â za'ra mono da hã. 3 'Ri nho'õmo 'remhã uburé marĩ, 'Re ihâimana u'âsi mono te te 're i'awẽ'õ pese mono hã 're hâimana waihu'u za'ra mono õ di za.Tawamhã 'Re ihâimana u'âsi mono duré Pone'ẽrebâ i'rare 're isãmra mono zé hã te za 'ri nho'õmo 're, 're hâimana. Te za duré tãma iromhuri'wa norĩ hã ãma 're wata za'ra. 4 I'ubu hã te za te te siwi 're 'madâ'â. Duré i'uihâi ãma za'ra hã 'Re ihâimana u'âsi mono nhisi na rob'ui'éré hã za. 5 Tamemhã mara õ di za. Duré rob'uiwẽzéb zô ni'wa simnhasi õ di za, duré bâtâ ro'o zô hã. E marĩ wa. Uburé Danhib'apito 'Re ihâimana u'âsi mono hã si'uihâ na za te te tãma 're rowa'a za'ra mono wa. Tawamhã isib'a'uwẽ norĩ hã te za pire na 're hâimana u'âsi za'ra, õne u'âsi.
Zezusi hã apâ za we imorĩzé
6 Tawamhã hâiwa hawi romhuri'wa hã ma tô ĩma tinha, ãne:
— Ã hã roti mono hã, tô sena uptabi duré danhipai u ipire i'umnhasi da hã. Uburé Danhib'apito 'Re ihâimana u'âsi mono, Tipẽ'ẽzani tizadawa 'mahârâ'wa norĩ ma, te te 're i'anhomri mono hã ma tô we satõ tite hâiwa hawi romhuri'wa hã tãma iromhuri'wa norĩ ma, te te aromhâi'ré da, marĩ za romhutu na i'ru zahi zarina iwairébé mono zéb da hã.
7 Tawamhã Zezusi hã te tinha, ãne:
— Ma'ãpé ĩwapari za'ra wa'aba! Wa za wei morĩ su apâ! Ã hã ibaihâ na rowasu'u romhutu'õ za 're iromhâimana za'ra mono zé, te te 're iwapari pese za'ra mono norĩ ma hã tãma 're rowẽ uptabi za'ra mono di za!
8 Wa hã Zuwã, uburé ã hã marĩ mono hã wa tô awapa. Duré wa tô ab'madâ. Tawamhã uburé te awapari parimhã, duré te ab'madâ'â mono parimhã, wa tô ĩhi'rãtitõ waptãrã hâiwa hawi romhuri'wa ã hã marĩ te te ĩma i'ahâi'ré papara, ãma ĩwata da aré. 9 Tane nherẽ, ma tô ĩma tinha, ãne:
— Tô'ã! Tane hã 'manharĩ tõ! E marĩ wa. Wa hã duré 'Re ihâimana u'âsi mono ma romhuri'wa asine hã, duré asisãnawã norĩ ne hã, duré isadawa 'mahârâ'wa norĩ ne hã, duré uburé ã hã ibaihâ na rowasu'u te te 're i'madâ'â pese za'ra mono norĩ ne hã. Tahawa, ma'ãpé 'Re ihâimana u'âsi mono ãma si aiwata!
10 Tawamhã hâiwa hawi romhuri'wa hã ma tô duré ĩma tinha, ãne:
— Ã hã ibaihâ na rowasu'u hã pi'uriwi hâimana da, simi'uri tõ. E marĩ wa. Iromhâimana za'ra mono zéb da hã, bâdâ iwa iwaptã'ã da hã romhuture wa oto. 11 Ni'wa hã wasété wamhã, tô marĩ iwasédé te te 're ab'manharĩ u'âsi mono. Duré ni'wa hã tihâiba te te wamnarĩ wamhã, tô tihâiba te te iwamnarĩ na 're hâimana u'âsi mono. Duré ni'wa iwẽ wamhã, marĩ iwẽ si te te tô 're ab'manharĩ u'âsi mono. Duré ni'wa hã 'Re ihâimana u'âsi mono ãma si 're morĩ wamhã, tô 'Re ihâimana u'âsi mono ma si 're imorĩ na 're hâimana u'âsi mono.
12 Tawamhã Zezusi hã te duré tinha, ãne:
— Ma'ãpé, ĩwapari za'ra wa'aba! Wa za wei morĩ su! We ĩmorĩ wamhã, dapawa'â hã wa za we tidu, dahâiba mono bâ te dama anhomri da, uburé marĩ iwẽ hã niwamhã duré uburé marĩ iwasédé, da te 're i'manharĩ za'ra mono zéb zarina. 13 Wa hã Romna'rada duré Rob'rãsudu.
14 Ni'wam norĩ ma 're rowẽ uptabi za'ra mono di za, ti'uza hâirã da, te te 're ihâ upsõ za'ra mono norĩ ma hã. Tahawa te za ta norĩ hã rowairébé haré na te te 're huri, rowede 'rã dahâimana u'âsi zém nhomri'wai 'rã hã. 'Ri nho'õmo u te za duré rowairébé haré na 're sisisi, 'ridawa isa'ẽtẽ na. 15 Tane nherẽ, ni'wam norĩ 'ri nho'õmo nhiti te za rowi 're hâimana za'ra, marĩ iwasété uptabi na 're ihâimana wasété za'ra mono norĩ hã, duré abzé tede'wa norĩ hã, duré hâimana nhiséb ãna dasina dahâimana na 're ihâimana za'ra mono norĩ hã, duré dapãrĩ'wa norĩ hã, duré romhâiba na 're iwata za'ra mono norĩ hã, duré 're isadawa nhipese za'ra mono norĩ timreme na, niwamhã marĩ te te 're i'manharĩ wasété za'ra mono na zama.
16 Tawamhã Zezusi hã te duré tinha, ãne:
— Wa hã Zezusi, ĩte hâiwa hawi romhuri'wa hã wa ãma atẽme satõrĩ za'ra wa'wa, asiré 're i'ai'rã'õtõ wa'aba mono norĩ ma, ã hã rowasu'u te te aima wasu'u za'ra wa'aba da. Wa hã Davihi nhihudu. Wa hã duré ĩrã uptabi, wasi wawẽ awẽ u te te 're irob'uiwẽ mono ne.
17 'Re ihâimana u'âsi mono Pẽ'ẽzani duré Pone'ẽrebâi mro da ihâimana me, te 're hârâ u'âsi zahuré, ãne:
— We ãwa aimorĩ!
Tawamhã ni'wa ãne hã te te wapari wamhã, te za duré ta hã 're hârâ, ãne:
— We ãwa aimorĩ!
Duré ni'wa 'rubu wamhã, wei morĩ! Duré ni'wa hã â u'â dahâimana u'âsi zém nhomri'wa, wa'âbâ ãna te te hâ'rẽne da, te te sima wẽ wamhã, te te sima a'âri!
Zuwã hã te te irob'ui'éré 'rãsutuzé
18 Wa hã Zuwã, romreme pire na wa za oto ãma aipo're pu'u za'ra wa'wa, ã hã ibaihâ na romhâ ré za iromhâimana za'ra zé te ãma i'aipo're pu'u za'ra wa'aba zém na: Ni'wa sihawi siwa'ru marĩ na ãma sipai wamhã, 'Re ihâimana u'âsi mono hã te za tinhimihâzé rob'manharĩ pipa na hã ãma tãma sisiwi, ã hã ibaihâ na iwasu'u ihâimana za'ra na hã. 19 Duré ã hã ibaihâ na za iromhâimana mono zém na romhâi'rézé ihâimana hã, ni'wa te te 'maiwazere wamhã, 'Re ihâimana u'âsi mono hã te za tiwi azani, ã hã ibaihâ na marĩ iwẽ te te dama 're i'apisutu mono zé hã, duré rowede 'rã dahâimana u'âsi zém nhomri'wai 'rã te te 're i'masi mono zé hã, duré 'Ri nho'u iwazé pese ãma za 're ihâimana mono zéb zama.
20 Tawamhã ã hã ibaihâ na rob'ui'éré na ihâimana za'ra, te te ĩma i'awaihu hã te ãne tinha:
— Tô sena tô. Wa za wei morĩ su!
Tane tô! Wanhib'apito Zezusi, we apâ aimorĩ su'u!
21 Wanhib'apito Zezusi te te 're iwa'azawi pese mono zé hã, ai'ãma 're ihâimana u'âsi za'ra wa'aba mono da si, iwẽ hã.