— Ãhã na hã, 'Re ihâimana u'âsi mono 're isãmra mono zé hã a'uwẽ siré oto! Isiré te za 're sãmra u'âsi za'ra oto. Tawamhã isib'a'uwẽ na te za tãma 're hâimana za'ra. 'Re ihâimana u'âsi mono hã te za isiré 're hâimana za'ra. Õ hã te za tô ite za'ra 'Re ihâimana u'âsi mono na tãma 're hâimana za'ra. 4 Te za itõmo u hã uburé tãma u'õ za'ra. Tawamhã dadâ'â õ di za oto. Duré robzei'õ hã hâimana õ di za oto, duré dawawa hã duré dahâzé zama. E marĩ wa. Marĩ i'ratare hã oto si'utõrĩ pese za'ra wa za.

5 Tawamhã Apito simasisizém na isãmra hã ma tô tinha, ãne:

— Ãhã na hã wa za oto ahâ té, uburé marĩ hã.

Ma tô duré ĩma ti'ru, ãne:

— Ma'ãpé ãne na ãma rob'ui'éré. E marĩ wa. Ã hã romreme hã tô sena uptabi, duré danhipai u ipire, da te 're i'umnhasi za'ra mono da hã.

6 Tawamhã te duré ĩma tinha, ãne:

— Tâibâ oto. Uburé marĩ hã wa tô ãma a'uwaimra. Wa hã Romna'rada duré Rob'rãsudu. Ni'wa hã 'rubu wamhã, â wa za tãma õ, wa'âbâ ãna, te te hâ'rẽne da, ub're dahâimana u'âsi zém nhomri'wai hawimhã. 7 Uburé marĩ iwasété na ai'uté'wa norĩ ma, te za uburé ã hã tãma 're hâimana za'ra. Tawamhã wa hã ite 'Re ihâimana u'âsi mono na, wa za tãma 're ĩhâimana za'ra. Ĩ'ra na te za duré ĩma 're hâimana za'ra. 8 Tane nherẽ, dama rob'manharĩ wasété zé pipa te, te te 're isazei utõrĩ za'ra mono norĩ hã duré 'Re ihâimana u'âsi mono na isimizazei'õ norĩ hã, duré marĩ iwasété uptabi na 're ihâimana za'ra mono norĩ hã, duré dapãrĩ'wa norĩ hã, duré dasina dahâimana na hâimana nhiséb ãna 're ihâimana za'ra mono norĩ hã, duré abzé tede'wa norĩ hã, duré romhâiba na 're iwata za'ra mono norĩ hã, duré uburé sadawa nhipese na 're ihâimana za'ra mono norĩ hã, ã norĩ hã te za 're simasa, unhama ro'o u'âsi wa, ẽtẽ ro'o nhizédé uzé pire wa. Ta hã maparane ãma dadâ te wasu'u.

9 Tawamhã 7 na hâiwa hawi romhuri'wa norĩ, 7 na u'awi 'masisi na tãma ihâimana za'ra hã, 7 na i'rãi rẽme dama rob'manharĩ pipa zéb ré ihâimana za'ra hã ma tô misi we ĩtẽme mo. Ãne te ĩzatõ, ta hã:

— We aimorĩ, pi'õ, mro da ihâimana ne hã te aima hâi'ré da. Ta hã Pone'ẽrebâ i'rare Mro da hã.

10 Tawamhã 'Re ihâimana u'âsi mono Pẽ'ẽzani hã ma tô duré ĩ'â. Te te ĩ'âri wamhã, hâiwa hawi romhuri'wa hã ma tô ĩzaprõ, ẽtẽ 'rãihâ isa'ẽne i'rãihâ uptabi u. Tame ma tô ĩma hâi'ré, Zeruzalẽ 'Ri nho'u Iwazé pe, hâiwa hawi we te isi'ra hã 'Re ihâimana u'âsi mono hawi. 11 Ta hã 'Re ihâimana u'âsi mono te rowa'a na te rowa'a, ẽtẽ ubuzi ne, ẽtẽ waipo zaspi na isisi ne. Duré rã uptabi di, ẽtẽ ubuzi zarob'a ne. 12 'Ri nho'õmo 'wawi wa'ra hã i'rãihâ uptabi na hã, duré isa'ẽtẽ na hã, 12 na 'ridawa isa'ẽne hã. Duré 'ridawa 'madâ'â'wa norĩ hã 12 na hâiwa hawi romhuri'wa norĩ hã 'ridawa mono bâ te rob'madâ'â za'ra. 'Ridawa isa'ẽtẽ na hã 12 na Izaraéu nhihudu norĩ wamri na rob'ui'éré hã te ãma tihâimana za'ra. 13 Bâtâ pusizém niwĩmhã si'ubdatõ 'ridawa za'ẽne hã, duré bâtâ zasizém niwĩmhã si'ubdatõ, duré hâiwa nhimire niwĩmhã si'ubdatõ, duré hâiwa nhimi'ẽ niwĩb zama si'ubdatõ, 'ridawa za'ẽne hã. 14 'Ri nho'õmo 'wawi wa'ra 'rãihâ hã 12 na ẽtẽ tob'rã na 'ri nhana'rata nhisiwi, wa'ra hã. Taha na ãma rob'ui'éré te ãma tihâiba, 12 na Pone'ẽrebâ i'rare zadawa wasu'u'wa norĩ nhisi hã.

15 Tawamhã hâiwa hawi romhuri'wa te te ĩma inharĩ hã, tinhib'rata te 're ti'â, wedewaré ẽtẽ waipo pré oru 'manharĩ, 'ri nho'u te te ãma ipibuzéb da hã, duré 'ridawa za'ẽtẽ norĩ hã duré 'ri nho'õmo 'wawi wa'ra zama. 16 'Ri nho'õmo zada'ré pibuzé hã aiwapsi maparane si'uiwa na. Ina're pibuzé hã duré i'a're pibuzé me aiwa. Tawamhã hâiwa hawi romhuri'wa hã ma tô 'ri nho'u hã pibu, wede waré oru 'manharĩ na. Tawamhã ina're pibuzé hã 2.200 kilometru na ma watobro, duré i'a're pibuzé hã duré isihâ pibuzéb zama aiwapsi. 17 Tawamhã hâiwa hawi romhuri'wa hã ma tô duré pibu, 'ri nho'õmo 'wawi wa'ra. Te te pibui wamhã, 64 metru na ma ipibuzé hã watobro. Ti'ai ãma da te 're iropibu za'ra mono zéb zarina, ipibuzé hã. 18 'Ri nho'õmo 'wawi wa'ra hã ẽtẽ waipo zaspi na isisi na i'manharĩ hã. Duré 'ri nho'u hã ẽtẽ waipo pré oru uptabi na si i'manharĩ hã, isarob'a uptabi simhi ne. 19 'Ri nho'õmo 'wawi wa'ra nhana'rata norĩ hã, iwamnarĩ hã imono bâ ẽtẽ waipo norĩ sipu'u pese na 're ihâimana za'ra mono na. Imorĩ'rada hã ẽtẽ waipo zaspi na i'manharĩ hã. Duré maparane ãma hã ẽtẽ waipo, safira na isisi na. Duré si'ubdatõ ãma hã ẽtẽ waipo, agata na isisi na. Duré maparane si'uiwa na ãma hã ẽtẽ waipo, esmerauda na isisi na. 20 Duré imrotõ ãma hã ẽtẽ waipo, sardonica na isisi na. Duré imropâ ãma hã ẽtẽ waipo, sardiu na isisi na. Duré 7 ãma hã ẽtẽ waipo, crizolitu na isisi na. Duré 8 ãma hã ẽtẽ waipo, berilu na isisi na. Duré 9 ãma hã topaziu na isisi na. Duré 10 ãma hã crisoprazu na isisi na. Duré 11 ãma hã zasitu na isisi na. Duré 12 ãma hã ametista na isisi na hã. Ã norĩ na 'ri nho'õmo 'wawi wa'ra 'rãihâ i'manharĩ za'ra hã. 21 'Ri nho'õmo 'wawi wa'ra na 'ridawa isa'ẽne 12 na ihâimana za'ra hã a'é tõmo wawẽ ne pérola na misi si hã i'manharĩ za'ra. 'Ri nhi'riti nho'u bâdâdi isa'ẽne hã ẽtẽ waipo oru uptabi na si i'manharĩ, isarob'a simhi ne hã.

22 Tawamhã 'ri nho'õmo 'remhã, 'Re ihâimana u'âsi mono nhorõwa 'ri 'rãihâ hã te 'mai'madâ'â õ di. E marĩ wa. 'Ri nho'õmo te 'Ri 'rãihâ hã tô Uburé Danhib'apito 'Re ihâimana u'âsi mono Iwaihu'u pese uptabi oto 're hâimana mono wa, duré Pone'ẽrebâ i'rare zama. 23 'Ri nho'õmo 'remhã bâdâ te te 're irob'uiwẽ mono da hã sadai õ di oto, duré a'amo zama, 'Re ihâimana u'âsi mono waihu'u pe hã za iwa te te 're rob'uiwẽ mono wa, duré Pone'ẽrebâ i'rare hã isimirowa'azém na za 're hâimana mono wa. 24 Tawamhã dawamri mono bâ 're idahâimana za'ra mono hã te za isimirowa'a na 're danomro. Duré ti'ai ãma apito norĩ hã te za tinhibro hã te te 're ãwisi za'ra, 'ri nho'u itéb u hã. 25 'Ri nho'õmo 'wawi wa'ra na 'ridawa isa'ẽne hã te za sitob ãna 're simasab u'âsi, tamemhã mara õ wa za. 26 Dawamri mono bâ 're idahâimana za'ra mono hã te za danhibro iwa'âbâ za'ẽtẽ mono hã da te 're ãwisi za'ra. 27 Tane nherẽ, 'ri nho'õmo u hã sisisi õ di za, marĩ wamnarĩ na 're ihâimana za'ra mono hã, duré ni'wam norĩ marĩ siséb ãna te te 're i'manharĩ wasété za'ra mono norĩ hã, duré sadawa nhipese na 're ihâimana za'ra mono norĩ hã. Ibaihâ na rob'ui'éré dahâimanazé isi'utõrĩ'õ ãma za 're idahâimana za'ra mono norĩ nhisi na ihâimana za'ra norĩ si te za asisi, 'ri nho'õmo u hã, Pone'ẽrebâ i'rare te Ibaihâ na 're ihâimana za'ra mono norĩ si.