4 Taha parimhã, wa tô duré 'madâ'â za'ra, apito simasisizé isimasa hã. Taha na te asimro, isimiroti pire, da te tãma isõmri za'ra norĩ hã te te da'ãma 're irowairébé za'ra mono da hã. Tawamhã wa tô duré 'madâ'â za'ra, Zezusi hã rowasu'u sena na te te ihâi'ré hã te te 're wasu'u za'ra mono 'ru te, duré 'Re ihâimana u'âsi mono nhimiroti zahi u'âbâ, da te i'rãnhihâri za'ra norĩ pẽ'ẽzani hã. Ta norĩ hã ropoto siwamnarĩ ãma dame 're iwata za'ra mono õ, duré isine ihâiba 'manharĩ ãma zama. Duré iwaihu'uzé da te dame ãma i'ui'éré za'ra õ, i'uihâi ãma niwamhã isib'rata ãma zama. Ta norĩ hã ma tô apâ tihâiwa'utu za'ra. Te duré pire na 're hâimana za'ra, Cristuhu siré miu na wahu isi'utõrĩ 'remhã. 5 Ã hã imorĩ'rata ãma dahâiwa'utuzé. (Isi'atarẽme norĩ hã apâ dame hâiwa'utu za'ra õ di, miu na wahu si'utõrĩ õ ré hã). 6 Imorĩ'rata na dahâiwa'utuzéb ãma dame ihâimana za'ra norĩ ma hã tãma 're rowẽ uptabi za'ra mono di. Duré wẽ uptabi na te za 're hâimana za'ra, maparane ãma dadâ hã siptete na tãma hâimana za'ra õ wa, dâ'â zahu za'ra õ wa za. 'Re ihâimana u'âsi mono ma sasedoti na te za 're hâimana za'ra, duré Cristuhu ma zama. Te za duré isiré pire na 're hâimana za'ra, miu na wahu isi'utõrĩ 'remhã.

7 Tawamhã miu na wahu si'utõrĩ parimhã, Satanasi hã te za wazere ni, isabzém hawi. 8 Te za watobro, sadawa nhipese na dawamri mono bâ te te dama arob'rãmi da, daro mono bâ tô romnhisi zahuré hã, Gogui duré Magogui. Tawamhã Satanasi hã te za da'rã'õtõ, dasi'wapé da, da'ahâ uptabi na â poré zaihâ na supara 're isimi'wara mono ne.

9 Tawamhã ropâ ma tô ropé. Te te ropéi mono wamhã, ma tô siwi uirĩ, 'Re ihâimana u'âsi mono nhib'a'uwẽ norĩ 're ihâimana za'ra mono zé hã, tô 'ri nho'u 'Re ihâimana u'âsi mono te te 're isawi pese mono. Tane nherẽ, uzâ hã 'Re ihâimana u'âsi mono hâiwa hawi ma tô we sãmra. Taha na ma tô uprosi pese, ta norĩ hã. 10 Tawamhã Wa'uburé te te dama 're i'arob'rãmi mono hã ma tô me ni, unhama ro'o u'âsi u, ẽtẽ ro'o nhizédé uzé pire u, ropoto siwamnarĩ, da te imezéb u duré senai'õ na 'Re ihâimana u'âsi mono zadawa 'mahârâ'wa zama. Tawamhã tame te za te te 're robzépata u'âsi za'ra, bâtâ na duré mara na zama õne u'âsi.

11 Tawamhã wa tô duré 'madâ Apito simasisizé irã hã, duré iwa isãmra zama. Tawamhã ti'a duré hâiwa zama ma tô aimani zahuré isõ'remhã. Ni'wa te te oto sõpẽtẽ waihu'u zahuré õ di. 12 Tawamhã wa tô duré 'madâ'â za'ra idâ'â za'ra norĩ hã, dama ipire norĩ duré dama iwapu norĩ zama, Apito simasisizém nho're hâiwi isimasa hã. Tawamhã ibaihâ norĩ hã ma tô sõzi za'ra ni. Ma tô duré 'ridawa ni ibaihâ ihâiba amo hã. Ta hã ibaihâ na rob'ui'éré dahâimanazé isi'utõrĩ'õ ãma za 're idahâimana u'âsi za'ra mono norĩ nhisi na. Tawamhã idâ'â norĩ ãma rowairébé hã ma tô tihâiba, marĩ te te 're i'manharĩ za'ra mono zéb zarina, ibaihâ na ãma rob'ui'éré hã ihâimana za'ra zarina. 13 Tawamhã â poré hã ma tô tisõ dadâ hã rowairébé'wai ma, â poré mono bâ iwa 're idasi'utõrĩ mono hã. Tawamhã dadâ'âzé hã duré adâ 're ihâimana za'ra mono zéb zama, ma tô duré iwa idâ'â norĩ hã tãma sõmri zahuré. Tawamhã idâ'â norĩ ãma ma tô rowairébé hã tihâiba, hâiba mono bâ marĩ te te 're i'manharĩ za'ra mono zéb zarina. 14 Tawamhã dadâ'âzé hã duré adâ 're ihâimana za'ra mono zéb zama, ma tô wabzuri ni, unhama ro'o u'âsi u. Ã hã unhama ro'o u'â hã maparane ãma dadâ, te wasu'u. 15 Ni'wam norĩ, ibaihâ na rob'ui'éré dahâimanazé isi'utõrĩ'õ ãma za 're idahâimana u'âsi za'ra mono norĩ nhisi na, dame ihâimana za'ra õ hã ma tô unhama ro'o u'âsi u sãmra ni.