— 'Re ihâimana u'âsi mono ãma si 're wawata u'âsi za'ra wa'aba mono! Danho'reptuzé hã duré iwaihu'u pese uptabi hã duré isiptete uptabi hã, wate za'ra 'Re ihâimana u'âsi mono te na te 're hâimana za'ra. 2 E marĩ wa. Te te da'ãma 're i'arowairébé mono hã i'uwaibaba na si duré sena uptabi si. Ta hã ma tô ãma rowairébé, pi'õ siwa'âbâ zô 're isi'rui mono dama isa'ẽtẽ ãma, dahâimana nhiséb õ na dasina dahâimana na ti'a hã te te iwamnarĩ ãma. Tite romhuri'wa norĩ ma tô a'ruiwa'â, pi'õ te te 're i'a'mapãrĩ mono hã.

3 Tawamhã da'ahâ uptabi hã ma tô duré nharĩ za'ra ni, ãne:

— 'Re ihâimana u'âsi mono ãma si 're wawata u'âsi za'ra wa'aba mono! 'Ri nho'õmo za'ẽtẽ nhizé hã, õne u'âsi te za hâimo 're sizédé 'rãti u'âsi.

4 Tawamhã 24 na dama ipire norĩ hã, duré maparane si'uiwa na ropodo ihâiba ré norĩ zama, ma tô hi'rãtitõ rere. 'Re ihâimana u'âsi mono ãma te tiwata za'ra, Apito simasisizém na isãmra ãma. Ãne te ãma tiwata za'ra:

— Tane tô! 'Re ihâimana u'âsi mono ãma si 're wawata u'âsi za'ra wa'aba mono!

5 Tawamhã Apito simasisizém hawi ma tô damreme hã we tinha, ãne:

— Uburé wate za'ra 'Re ihâimana u'âsi mono ma romhuri'wa na 're i'aihâimana za'ra wa'aba mono norĩ, ma'ãpé ãma 're aiwata u'âsi za'ra wa'aba mono, uburé asiwi 're iwazé pese za'ra wa'aba mono norĩ hã, dama aipire na duré dama aiwapu na 're i'aihâimana za'ra wa'aba mono norĩ hã.

6 Tawamhã damreme, wa duré wapa da'ahâ uptabi wa damreme ne hã, niwamhã duré â'a'a za'ẽtẽ wa â a'a ne hã, niwamhã duré tãiwapsa'a ne te te inharĩ hã, ãne:

— 'Re ihâimana u'âsi mono ãma si 're wawata u'âsi za'ra wa'aba mono! E marĩ wa. Uburé Danhib'apito wate za'ra 'Re ihâimana u'âsi mono Iwaihu'u pese uptabi hã Apito na dama 're hâimana u'âsi mono wa! 7 Wa te ãma wasima rowẽ za'ra na, duré ãma 're wato za'ra mono, waihu'u pese uptabi wa! E marĩ wa. Bâdâ oto iwa waptã'ã wa, Pone'ẽrebâ i'rare imrozéb da hã. Duré pi'õ, ãma imro da hã ma tô sisa'ra pese. 8 Taha ma, ma tô sõmri ni i'uza ihâiwẽ uptabi hã ihâ si'ubuzi, ãma si'uza da.

I'uza ihâiwẽ uptabi hã te wasu'u, 'Re ihâimana u'âsi mono nhib'a'uwẽ norĩ, marĩ iwẽ te te 're i'manharĩ za'ra mono zé.

9 Tawamhã hâiwa hawi romhuri'wa hã ma tô ĩma tinha, ãne:

— Ma'ãpé ãma rob'ui'éré, ãhã na: “Tãma 're rowẽ uptabi za'ra mono di za, Pone'ẽrebâ i'rare za imrozéb u, sô idahârâ za'ra norĩ ma hã.”

Hâiwa hawi romhuri'wa hã ma duré ãma ĩma sisiwi, ãne:

— Ã hã tô sena uptabi 'Re ihâimana u'âsi mono mreme.

10 Tawamhã hâiwa hawi romhuri'wai papara wa tô ĩhi'rãtitõ aime, ãma ĩwata da aré. Tane nherẽ, ma tô ĩma tinha, ãne:

— Tô'ã! Tane hã 'manharĩ tõ! E marĩ wa. Wa hã duré romhuri'wa, asine hã 'Re ihâimana u'âsi mono ma, duré asiré isazei'wa norĩ siptete sina te te ãma i'uzusi za'ra ne hã, tô sena uptabi roti Zezusi te te ihâi'ré na. 'Re ihâimana u'âsi mono ãma si aiwata!

E marĩ wa. Tô sena roti Zezusi te te ihâi'ré hã, ta hã roti 'Re ihâimana u'âsi mono Pẽ'ẽzani tizadawa 'mahârâ'wa norĩ ma, te te 're i'awaihu'u mono.

11 Taha parimhã, wa tô duré 'madâ, hâiwa isi'ridawa na. Tawamhã wa tô 'madâ, awaru i'a we isihâi'ré hã. Isisi isãmra nhisi hã sena na Dama I'umnhasi na duré isisi amo hã, Tô sena uptabi na. Ta hã te i'uwaibaba na si te te da'ãma 're arowairébé. I'uwaibaba na si te duré 're si'wapé. 12 Ito hã unhama ro'o ne, duré isõprezé hã ahâ uptabi di. Isisi na rob'ui'éré hã te ãma tihâiba, ni'wa te te iwaihu'u'õ hã, õhõ ma si iwaihu'u pe hã. 13 I'uza ihâpa hã dawapru na sapré di. Taha nhisi hã “'Re ihâimana u'âsi mono mreme” na. 14 Hâiwa hawi dasi'wapéi 'manharĩ'wa norĩ hã te isarina si'ré, awaru i'a na, duré i'uza ihâi wẽ uptabi, ihâirã uptabi na ihâiwamnarĩ õ na. 15 Awaru i'a na isãmra zadai'ré hawimhã te aipra, sib'ézé 'wapa i'wa si'uiwa na i'wa pe hã. Taha na te za da'ãma ai'uté, ti'ai ãma dawamri mono bâ 're idahâimana wasété za'ra mono ãma. Simiwada'uri nhiptete na te za te te 're da'ab'madâ'â. Uva 'rãi watizé ẽtẽ're 'manharĩ 're, iwa'u zô da te 're iwati pese za'ra mono ne, tane te za te te 're 'manharĩ, 'Re ihâimana u'âsi mono zahizé hã te te 're dawati pese za'ra mono da. 16 Tawamhã i'uza ihâpa na duré izada'õtõ na zama, isisi na rob'ui'éré hã, ãne: “Õhõ si misi Apito uptabi hã, ti'ai ãma uburé apito norĩ nhipai u. Duré Uburé Danhib'apito uptabi, ti'ai ãma danhib'apito norĩ nhipai u.”

17 Tawamhã wa tô 'madâ hâiwa hawi romhuri'wa, bâtâ nhisiwi isa hã hâiwi. Ta hã hârâ 'rãihâ na te hâ, uburé si norĩ hâimo uptabi 're isisa'rei mono norĩ zô, ãne:

— We asa'rei wa'aba, duré asina ubumroi wa'aba, 'Re ihâimana u'âsi mono te, dasa sa'ẽtẽ uptabi na ihâimana u, 18 ti'ai ãma apito norĩ nhi na asaihuri aba da, duré dasi'wapéi 'manharĩ'wa norĩ nhib'apito norĩ nhi na, duré dasi'wapéi 'manharĩ'wa norĩ nhi na, duré awaru nhi na, duré awaru 'mapraba'wa norĩ nhi na, duré uburé pese daro mono bâ 're idahâimana za'ra mono norĩ nhi na, titede'wai ma wada'uri zarina romhuri'wa norĩ nhi na niwamhã sima iwẽ na 're ihâimana za'ra mono norĩ nhi na, duré dama pire na niwamhã dama wapu na 're ihâimana za'ra mono norĩ nhi na zama.

19 Tawamhã ropoto siwamnarĩ^a wa tô duré 'madâ, duré daro mono bâ apito norĩ 're ihâimana za'ra mono norĩ zama, duré ite dasi'wapéi 'manharĩ'wa norĩ zama isi'rã'õtõ na, awaru i'a na isãmra hã te te siwi 'wapé da, duré ite dasi'wapéi 'manharĩ'wa norĩ zama. 20 Tane nherẽ, ropoto siwamnarĩ hã ma tô âri ni, duré senai'õ na 'Re ihâimana u'âsi mono zadawa 'mahârâ'wa zama, ropoto siwamnarĩ zadawa para te te 're iromhõsi mono hã. Te te 're iromhõsi mono na ma tô te te dama 're arob'rãmi, ropoto siwamnarĩ nhisi na da te i'ui'éré za'ra norĩ ma, duré ropoto siwamnarĩ hâiba 'manharĩ ãma iwata za'ra norĩ ma zama. Tawamhã ropoto siwamnarĩ hã duré senai'õ na 'Re ihâimana u'âsi mono zadawa 'mahârâ'wa zama, ma tô hâiba ré wabzuri ni, unhama ro'o u'âsi u, ẽtẽ ro'o nhizédé uzé pire u. 21 Ite dasi'wapéi 'manharĩ'wa norĩ hã ma tô uprosi ni sib'ézé 'wapa i'wa si'uiwa na, awaru i'a na isãmra zadai'ré hawi isipra na. Tawamhã uburé si norĩ hã ma tô inhi hã tihu, te te i'mahâpãrĩ pese za'ra zéb u.