Babilonia iwaptã'ãzé
18
Ãne parimhã, wa tô duré 'madâ hâiwa hawi romhuri'wa, hâiwa hawi we te te si'rai ré hã. Ta hã simiroti pire uptabi di. Duré ti'ai ãma hã ite rowa'a ma tô uburé rowa'a. 2 Ta hã hârâ nhiptete uptabi na ma tô hâ, ãne:— Ma tô oto waptãrã! Babilonia 'ri nho'u dama isa'ẽne, ma tô oto waptãrã! Ãhã na hã tame te oto wa'uburé norĩ hã 're hâimana za'ra, uburé iwasété uptabi norĩ hã. Sipu'u pese na te si iwasété norĩ hã iwa 're hâimana za'ra, da te dasiwi 're iwẽ'õ pese za'ra mono norĩ hã. 3 E marĩ wa. Dawamri mono bâ 're idahâimana za'ra mono hã ma tô uburé âhuri ni, ite uva 'rãi wa'u isé isiptede hã, â sipãrĩ na 're dasi'rãiwamnarĩ za'ra mono wa, marĩ iwasété uptabi na si 're idahâimana za'ra mono ne, 're dahâimana za'ra mono da. Apito norĩ ropâ 're ihâimana za'ra mono hã ma tô ãma siwasété za'ra, dahâimana nhiséb ãna dasina dahâimana na ãma hâimana za'ra wa. Duré ti'ai ãma roptede'wa norĩ hã ma tô ãma sisibro pese za'ra, pi'õ sibrob za'ẽtẽ na 're ihâimana mono na.
4 Tawamhã wa tô duré wapa damreme aimawi hã, hâiwa hawi we te te inharĩ hã, ãne:
— Ĩnhib'a'uwẽ norĩ, ma'ãpé ihawi aiwairébé aba, iwasété na isine ãma asiwasété za'ra wa'aba tõ da, duré robzépada za sô iwatobro za'ra hã, te te ai'upi za'ra wa'aba tõ da.
5 E marĩ wa. Iwasété za'ra hã hâiwa u ma tô tiza'wari 'rãihâ. Duré 'Re ihâimana u'âsi mono hã ma tô ãma sipo're pu'u, marĩ iwasédé te te 're i'manharĩ mono zém na.
6 Marĩ hã te te aima i'manharĩ za'ra wa'aba zé hã, tãma 'manharĩ za'ra wa'aba apâ, aiwab da. Marĩ te te i'manharĩzém nhipai u ãma tãma wapto wa'aba, iwa'âbâ na.
Hâsizé ite hã tãma 'masisi pese za'ra wa'aba, uva 'rãi wa'u isé uptabi na, uva 'rãi wa'u âhuri aba da, te te asô isa'ra pese za'ra wa'aba nhipai u.
7 Robzépada hã sa'ẽtẽ na tãma sõmri za'ra wa'aba, duré robzei'õ zama. Sibro wẽ na duré sina 're iwata mono zé te te sima ipisutu zarina, tãma pisutu za'ra wa'aba. E marĩ wa. Ta hã te te sina rosa'rata wa, ãne: “Apito sipi'õ na wa 're ĩhâimana. Wa hã ĩmrotõ nei õ di. Niwa ĩwi robzei'õ waihu'u õ di za!”
8 Ãne wa, tô misi bâtâ 're, te za rob'manharĩ pipa hã isisi rere, dahâzé norĩ hã duré marĩ zépada hã, duré mrab zama. Tawamhã unhama na te za ãma sazu ni za.
E marĩ wa. 'Re ihâimana u'âsi mono Uburé Danhib'apito te te ãma irowairébé hã, waihu'u pese uptabi wa.
9 Apito norĩ ropâ te te 're ida'a'madâ'â za'ra mono hã, tô õ hã pi'õi ãma dasina dahâimana danhiséb ãna ãma isiwasété za'ra norĩ hã duré isiré sibro wẽ na 're ihâimana za'ra mono hã te za 're sadari za'ra za. Te za duré ti'ru'ru za, da te ãma isazuzé romnhizé te te 'madâ'â za'ra wamhã. 10 Tawamhã romhâ na te za aimasa za, pahi za'ra wa, isiré tãma rob'manharĩ pipa te te sépata za'ra tõ da. Ãne te za nharĩ za'ra:
— Aima ropipa uptabi di! Babilonia 'ri nho'u dama isa'ẽne duré isiptede, aima ropipa uptabi di tô! Misi bâtâ pibuzéb 'rep si waptu na ma tô asô wi, aima rob'manharĩ pipa hã.
11 Tawamhã ropâ rowede'wa norĩ hã te za 're sadari za'ra. Te za duré robzé te, i'u'âbâ aiwa'õ za'ra, ni'wa hã te te oto tiwi rob'uipra za'ra õ wa. 12 Ni'wa ite ẽtẽ waipo pré oru hã te te oto uipra õ di, duré ẽtẽ waipo prã prata hã, duré ẽtẽ ubuzi i'upsãtã mono bâ iwa'âbâ za'ẽne hã, duré a'é tõmo wawẽ ne pérola na isisi hã, duré zazahâ ihâi wẽ uptabi hã, duré zazahâ ihâpré dâ hã, duré wede iwa'âbâ za'ẽne i'upsãtã mono bâ cedru na isisi hã, duré elefãti 'wa'ratahi na rob'manharĩ mono hã, duré ẽtẽ topsada brõzi na rob'manharĩ mono hã, duré isi'uwazi na rob'manharĩ mono hã, duré marmori ẽtẽ su'u nhisi na rob'manharĩ mono zama. 13 Ni'wa hã te te oto duré tiwi 're uipra waihu'u za'ra mono õ di za, canela na dasaiwarĩrĩzé hã duré aimawi norĩ dasaiwarĩrĩzé i'upsãtã mono bâ hã, duré 'ri 're zadazezé, duré dasihâiba'u'rézéb da hã, duré wede wa'u isadaze iwa'âbâ za'ẽne hã. Duré ni'wa hã te te oto tiwi 're uipra za'ra mono õ di za, ã norĩ hã: uva 'rãi wa'u isé hã, duré azeitona 'rãi wa'u to hã, duré amnho trigu zu hã, duré amnho trigu i'rãi ré hã, duré powawẽ hã, duré pone'ẽrebâ norĩ hã, duré awaru norĩ hã, duré wedewara zapore norĩ hã, duré wada'uri zarina titede'wai ma romhuri'wa norĩ hã, duré aimawi a'uwẽ norĩ zama. 14 Tawamhã rowede'wa norĩ hã te za 'ri nho'õmo ma nharĩ za'ra, ãne:
— Uburé pese marĩ iwẽ zô 're irob'ruiwapari mono hã ma tô si'utõrĩ. Uburé asibro hã ma tô oto i'anhimini pe, duré aiwasu'u za'ẽtẽ na 're i'aihâimana mono zéb zama. Ta norĩ hã oto sõpẽtẽ waihu'u za'ra õ di za.
15 Tawamhã roptede'wa norĩ tame 'ri nho'õmo na 're isisibro pese za'ra mono norĩ hã, te za romhâ na aimasa, pahi te, isiré da te tãma rob'manharĩ pipa za'ra õ'umnhasite. Tane nherẽ, te za 're sadari za'ra. Te za duré ãma aiwa'õ za'ra, ãne:
16 — 'Ri nho'u dama isa'ẽne, aima ropipa uptabi di! Aima ropipa uptabi di tô, da'uza ihâiwẽ uptabi na aré 're i'asi'uza mono hã, duré da'uza ihâpré pese na duré ihâpré dâ iwa'âbâ za'ẽtẽ na, duré ẽtẽ waipo pré oru 'manharĩ na 're i'asiwamnarĩ mono hã, duré ẽtẽ ubuzi iwa'âbâ za'ẽtẽ na duré a'é tõmo wawẽ ne pérola na isisi na zama. 17 Tane nherẽ, misi bâtâ pibuzé isi'utõrĩ 're, ma tô ã hã 'ri nho'õmo wi danhibro hã tiwi ai'utõrĩ pese!
Tawamhã uburé uba're wa rob'madâ'â'wa norĩ hã, duré uba're na 're isisa'rei mono hã, duré uba're na ine'wa norĩ hã, duré â poré na tinhimarĩ te te 're isõpẽtẽ za'ra mono norĩ hã ma tô romhâ na aimasa. 18 Tawamhã 'ri nho'õmo nhizé te te siwi 'madâ'â wamhã, ma tô 're sadari za'ra, ãne:
— Ã hã 'ri nho'u dama isa'ẽtẽ ne hã, niwa 'ri nho'u i'maihâimana õ.
19 Tawamhã rob'ru te, ma tô robzapru hã ti'rã nhisiwi sa'wari za'ra. Siwa'õ za'ra sina, ma tô duré 're sadari za'ra, ãne:
— 'Ri nho'u dama isa'ẽne aima ropipa uptabi di! Aima ropipa uptabi di tô! Asibro aima 're ihâimana mono zéb ãma, ma tô ni'wam norĩ hã tinhibro pese za'ra, uba're â poré wa tãma 're ihâimana za'ra mono norĩ hã. Ta norĩ hã misi bâtâ pibuzéb 're, waptu na ma tô uburé tinhibro hã simini za'ra.
20 Tahawa, hâiwa ãma 're i'aihâimana za'ra wa'aba mono norĩ, ma'ãpé 're ato za'ra wa'aba mono, ã hã 'ri nho'u dama isa'ẽne isiprubzém na! 'Re ihâimana u'âsi mono nhib'a'uwẽ norĩ, asima rowẽ za'ra wa'aba, duré isadawa wasu'u'wa norĩ, duré isadawa 'mahârâ'wa norĩ! E marĩ wa. 'Re ihâimana u'âsi mono hã te te ãma rowairébé wa, te te aima 're i'manharĩ wasété za'ra wa'aba mono wa'rãmi.
21 Tawamhã hâiwa hawi romhuri'wa isimiwada'uri pire hã ma tô ẽtẽ tõmo wawẽ sarõtõ, amnho zubzém ne hã. Ta hã ma tô time, â poré wa. Te te me sina, ma tô tinha, ãne:
— Ãne te za 'ri nho'u dama isa'ẽne Babilonia hã me ni rob u, sa'ẽtẽ uptabi. Tawamhã niwa, ni'wa te te oto i'madâ'â da hã waihu'u õ di. 22 Harpa na duré flauta na duré danhimnhihârâzém na rowamreme hã, duré isõ're'wa norĩ nho're hã, niwa da te iwapari zahu za'ra da hã mare di za! Duré marĩ mono bâ rob'manharĩ waihu'u pese 'wa norĩ, niwa ai'remhã da te i'manhopẽtẽ da hã mare uptabi di oto. Duré ẽtẽ tõmo wawẽ 'manharĩ na amnho da te 're isub za'ra mono zé ruru hã niwa, ai'remhã da te iwapari za'ra da hã mare uptabi di oto. 23 Duré niwa rob'uiwẽzé hã ai'remhã te te oto irob'uiwẽ da hã mare uptabi di za. Duré niwa aibâ za imro da mreme, ai'remhã da te iwapari za'ra da hã mare uptabi di, duré pi'õ za imro da mreme zama. Ai're rowede'wa norĩ ropâ dama siptete uptabi na ma tô 're hâimana za'ra. Duré a hã 're ida'azazu wasété mono zarina ma tô ropâ 're idahâimana za'ra mono norĩ ma hã i'arob'rã.
24 'Ri nho'u dama isa'ẽne Babilonia ma, ma tô rob'manharĩ pipa hã tihâiba, 'Re ihâimana u'âsi mono zadawa 'mahârâ'wa norĩ wapru hã iwa da te sõpẽtẽ wa, duré 'Re ihâimana u'âsi mono nhib'a'uwẽ norĩ wapru zama, duré uburé ti'ai wa, da te 're isimroi mono norĩ wapru zama.